''ކުޑައީ ރާއްޖެ، އަޑު ވަރަށް ބާރު''

ރަހުމެއް ކުލުނެއް ނެތެވެ. ގެދޮރު ސުންނާފަތިކޮށް ބިމާ ހަމަކުރަނީއެވެ. ޅަ ދަރިންގެ ކުރިމަތީގައި މައިންނާއި ބަފައިން ޝަހީދު ކުރަނީއެވެ. ތުއްތު ކުދިންގެ ރުއިމުން މުޅި ފަޒާ ވަނީ ގުގުމާފައެވެ. ސަލާމަތަށް އެދި އުއްމަތަށް ގޮވަނީއެވެ. ނުބައި ނުލަފާ ޔަހޫދީންގެ އަނިޔާވެރި އަމަލުތަކުން ފަލަސްތީނު ބިމުގައި ލޭގެ ކޯރުތައް ދެމެނީއެވެ. އެތައް އާއިލާއެއް ނިކަމެތިވެ އެހީތެރިކަމަށް އެދި އާދޭސްކުރަނީއެވެ. މިއަޑުތަކާއި މަންޒަރުތައް ބަލަން ތިބުމަކީ ދިވެހިން ބޭނުންވާ ކަމެއް ނޫނެވެ.

ގާޒައާއި އެތައް މޭލެއްގެ ދުރުގައި ދިވެހިރާއްޖެ އޮތްކަމުގައި ވިޔަސް މިއަދު ދިވެހިންގެ ލޭ ހޫނުވެ ކެކެމުންދެއެވެ. ދިވެހިން ތިބީ ފަލަސްތީނާއެކުކަން ހާމަކޮށްދިނުމުގެ ގޮތުން ތަފާތު އެކި ހަރަކާތްތައް ދަނީ ހިންގަމުންނެވެ. ފަލަސްތީނަށް ފައިސާގެ އެހީތެރިކަން ފޯރުކޮށްދިނުމަށް ވެސް ތަފާތު ހަރަކާތްތައް އެބަ ހިންގައެވެ. ސޯޝަލް މީޑިއާ ވަނީ ފަލަސްތީނުގެ ދިދައިން ފުރާލާފައެވެ.

ކޮވިޑް-19ގެ ހަތަރު ވަނަ ރާޅާއެކު ބަލީގެ ހާލަތު ގޯސްވެ ސިއްހީ ޚިދުމަތްތެރިން ހޭބޯނާރާ މަސައްކަތް ކުރަމުންދާއިރު، އެޓީމުގެ ފަރާތުން ވެސް ފަލަސްތީނަށް އޮތް ލޯބި ފެނިގެން ދިޔައެވެ. ޕަރސަނަލް ޕްރޮޓެކްޓްޓިވް އެކިއުޕްމެންޓް (ޕީޕީއީ) ގައި ވެސް ފަލަސްތީނުގެ ދިދައެވެ. ފަލަސްތީނުގެ ގައުމީ ކުލަތަކުން މުޅި މާލެ ވަނީ ޒީނަތްތެރި ކޮށްފައެވެ.

މާލޭގެ މަގުތަކާއި ދުއްވާ ވެހިކަލްތަކުގެ އިތުރުން ގެގޭގެ ބެލްކަނި ވެސް ފަލަސްތީނުގެ ދިދަތަކުން ވަނީ ފުރާލާފައެވެ. ކޮވިޑް-19ގެ މި ޕެންޑަމިކްގައި މަގުމައްޗަށް އެއްވެ ނޫޅެވުނު ކަމުގައި ވިޔަސް ދިވެހިންގެ ހިތްތަކުގައި ފަލަސްތީނަށް ދެވިފައިވާ ލޯތްބާއި ގަދަރު މިވަރުން ފުރިހަމައަށް ވަޒަންކޮށްލެވެއެވެ. މިވަރުން ފުއްދާލައިގެން ތިބީކީނޫނެވެ. އޮޑި ދޯނިފަހަރުން ފެށިގެންގޮސް ރަށްރަށުގެ މަލަމަތި ވެސް މިއަދު ޒީނަތްތެރި ކުރެވިފައިވަނީ ފަލަސްތީނުގެ ދިދަތަކުންނެވެ.

އަންގާރަ ދުވަހު ހަވީރު ޒުވާނުންތަކެއް އިސްނަގައިގެން ''މޯލްޑިވްސް ވިތް ފަލަސްތީން'' ނަމުގެ ވަނީ ޚާއްސަ ހަރަކާތެއް ކުރިއަށް ގެންގޮސްފައެވެ. ވީހާވެސް ގިނަ ރައްޔިތުން ބެލްކަނިތަކަށް ނުކުމެ ފަލަސްތީނާ އެއްކޮޅަށް އަޑު އުފުލުމަށް ގޮވާލި ގޮވާލުމަށް ދިވެހި ރައްޔިތުން އިޖާބަ ދިނީ ވަރަށް ފުރިހަމައަށެވެ. މިހަރަކާތް އިންތިޒާމް ކުރުމަށް އިސްކޮށް އުޅުނު މާޝާ މުހައްމަދު ތަސްނީމް ބުނީ ކުރިއަށް އޮތްތަނުގައި ވެސް ފަލަސްތީނާއެކު ދިވެހިން ތިބިކަން ހާމަކޮށްދިނުމުގެ ގޮތުން ތަފާތު ހަރަކާތްތައް ކުރިއަށް ގެންދާނެ ކަމަށެވެ.

މިއަދު މާލޭގެ އިތުރުން މުޅި ރާއްޖޭގެ އެކިކަންކޮޅުތަކުން ވެސް އެއް ވާނެއްގައި ގޮވަމުން ދިޔައީ ''އަހަރުމެން މިތިބީ ފަލަސްތީނާއެކު'' މިހެންނެވެ. މާޒީއަށް ނަޒަރު ހިންގާލާއިރު ވެސް ދިވެހިންނަކީ އަބަދުވެސް އަނިޔާއާ ދެކޮޅަށް އެންމެ ފުރަތަމަ ނުކުންނަ މީހުންކަން ހާމަވެއެވެ. އިސްރާއީލުން މެދުކެނޑުމެއްނެތި ގާޒާއަށް ދެމުންދާ އުދުވާނީ ހަމަލާތައް ދިވެހިން ދަނީ އަބަދުވެސް ކުށްވެރި ކުރަމުންނެވެ. ދިވެހިން އަބަދުވެސް ވާނީ މުސްލިމުންނާއި އެއްކޮޅަށް، އަނިޔާއާ ދެކޮޅަށް އަޑުއުފުލާ ބަޔަކަށްކަން މިވަނީ މުޅި ދުނިޔެއަށް ދައްކާދީފައެވެ.

އިސްރާއިލް ކުށްވެރިކޮށް ބޮޑެތި ގައުމުތަކާއި ބާރުގަދަ ގައުމުތައް ނުކުޅެދި ދުނިޔޭގެ އަމަނާއި ސުލްހައަށް މަސައްކަތްކުރާ އދ ވެސް ކުޑަކަކޫ ޖަހަންޖެހިފައިވާ މިދަނޑިވަޅުގައި، އަޅުގަނޑުމެންގެ މިކުޑަކުޑަ ގައުުމު ވަނީ ނަމޫނާ ދައްކާދީފައެވެ. ގައުމުގެ ދުލުން މިއަދު އަނެއްކާވެސް މިވަނީ ދިވެހިން އަބަދުވެސް ވާނީ މުސްލިމުންނާއި އެއްކޮޅަށް އަދި އަނިޔާއާ ދެކޮޅަށްކަން ހަރުއަޑުން ގޮވައި ހާމަކޮށްދީފައެވެ.