އަނެއްކާވެސް ޝާހީ އައު ކައިވެނިފުޅަކަށް ރާނީ އެލިޒަބަތާއި މުޅި އިނގިރޭސިވިލާތް ތައްޔާރުވާން ފަށައިފިއެވެ. ކައިވެނިފުޅުގެ ޚަބަރު މި ފެތުރުނީ ރާނީގެ ފިރިކަލުން ޕްރިންސް ފިލިޕް އަވަހާރަވިތާ ކިރިޔާ އެއްމަސް ފުރުނުތަނާއެވެ.
މިއީ 2011 ވަނަ އަހަރުން ފެށިގެން މިހާތަނަށް ޝާހީ ފަސްވަނަ ކައިވެނިފުޅެވެ. އޭގެ ތެރޭގައި ޕްރިންސް ވިލިއަމާއި ކޭޓް މިޑްލްޓަން 2011 ވަނަ އަހަރު ކުރެއްވި ކައިވެނިފުޅާއި 2018 ވަނަ އަހަރު ޕްރިންސް ހެރީ އާއި މޭގަން މާކްލްގެ ކައިވެނިފުޅާއި ޕްރިންސް އެންޑްރޫގެ ދަރިކަނބަލުން ޕްރިންސެސް ޔޫޖިނީގެ ކައިވެނިފުޅު ހިމެނެއެވެ.
ރާނީ އެލިޒަބަތުވެސް ހިމެނިވަޑައިގަންނަވާ ގޮތަށް ޝާހީ ޚާންދާނުގެ މެމްބަރުން ޝާހީ އައު ކައިވެނިފުޅަކަށް ތައްޔާރުވެވަޑައިގަންނަވަން ފެއްޓެވީ ސްޓެފާނީ ފިލިޕްސް އެކަމަނާގެ އެންގޭޖްމަންޓް އިއުލާން ކުރެއްވުމުންނެވެ. ސްޓެފާނީއަކީ ރާނީގެ ދަރިކަނބަލުން ޕްރިންސެސް އޭންގެ ދޮން ދަރިކަނބަލެކެވެ. ޕްރިންސެސް އޭންގެ ދެ ބޭފުޅުންކަމުގައިވާ ޒާރާ ފިލިޕްސް އާއި ޕީޓަރ ފިލިޕްސްގެ އެއްބައްޕާފުޅު ކޮއްކޯފުޅެވެ. ސްޓެފާނީގެ ބައްޕާފުޅަކީ ކެޕްޓަން މާރކް ފިލިޕްސްއެވެ. އެއީ ޕްރިންސެސް އޭންގެ ފުރަތަމަ ފިރިކަލުންނެވެ.
ސްޓެފާނީ އެންގޭޖްވެވަޑައިގަތީ ވިލިއަމް ހޯސިއާއޭ ކިޔުނު ޒުވާނަކާއެވެ. އެކަމަނާ ޔުނިވަރސިޓީ ތައުލީމު ނިންމެވީ ހުސްވި ވިހިވިހީގައެވެ. މިއީ ރާނީގެ ސީދާ އައުލާދު ނޫންކަމަށް ވިޔަސް ޝާހީ ޚާންދާނާ ގުޅިފައިވާ ބޭފުޅެއްގެ ކައިވެނިފުޅަކަށްވީމާ މި ރަސްމިއްޔާތުގެ ގިނަކަންކަން ދާނީ ސީދާ ރާނީގެ ބެއްލެވުމުގެ ދަށުންނެވެ. އަދި ޚަރަދުގެ ބޮޑުބައެއްވެސް ދެއްވާނީ ރާނީ ކަމަށް އެނގިފައިވެއެވެ.
