އޮކްސްފޯރޑް ޔުނިވަރސިޓީ އާއި އެސްޓްރަޒެނިކާ ގުޅިގެން ކޮވިޑް-19ށް އުފެއްދި ވެކްސިން ކުޑަކުދިންގެ ގަޔަށް ޖަހަން ރައްކާތެރިތޯ އާއި ދިފާއީ ނިޒާމު މަސައްކަތްކުރާ މިންވަރު ފުރަތަމަ ފަހަރަށް ދިރާސާކުރަން ފަށާފައިވާކަމަށް އޮކްސްފޯރޑް ޔުނިވަރސިޓީން ބުނެފިއެވެ.
އައު ޓްރެއަލް އާއެކު އުމުރުން 6 އަހަރާއި 17 އަހަރާ ދެމެދުގެ ކުދިންނަށް ވެކްސިނުންކުރާ އަސަރު ދެނެގަންނާނެއެވެ.
ޓްރެއަލް ކުރިޔަށް ގެންދާނެ ގޮތާއި ގުޅޭގޮތުން އޮކްސްފޯރޑުން ބުނީ މިމަސްތެރޭގައި 300 ވޮލަންޓިއަރުންނަށް ފުރަތަމަ ޑޯޒް ދޭނެކަމަށެވެ.
އެސްޓްރަޒެނިކާ ވެކްސިންގެ ދެ ޑޯޒް ދޭންޖެހޭއިރު މިވެކްސިނަކީ ޖެހުން އެންމެ ރައްކާތެރި އެއް ވެކްސިންކަމަށް ދުނިޔޭގެ ސިއްހަތު ޖަމިއްޔާއިންވެސް ވަނީ ބުނެފައެވެ. އަނެއްކޮޅުން އެވެކްސިނަކީ އަގު ހެޔޮ ފަސޭހައިން އެއްތަނުން އަނެއްތަނަށް އުފުލޭ ވެކްސިނެކެވެ.
އެސްޓްރަޒެނިކާއިން ޓަރގެޓް ކޮށްފައިވަނީ މިއަހަރު ތެރޭގައި 3 ބިލިއަން ޑޯޒް އުފެއްދުމަށެވެ. އަދި އޭޕްރީލް މަސް އަންނަންވާއިރަށް މަހަކު 200 މިލިއަން ޑޯޒް އުފެއްދުމަކީ އެކުންފުނީގެ އަމާޒެކެވެ.
