އިންޑިއާގައި ކޮވިޑް-19 އަށް ޖަހާ ވެކްސިންތައް ރައްކާތެރިކަމަށް އެގައުމުގެ ޔޫނިއަން ހެލްތު މިނިސްޓަރ ހަރޝް ވަރްދަން ވިދާޅުވެއްޖެއެވެ.

ނޫސްވެރިންނާ ވާހަކަދައްކަވަމުން މިނިސްޓަރ ވަނީ ވެކްސިން ޖަހާފައިވާ ބައެއް ފަރާތްތައް މަރުވެގެން ރިޕޯޓްކޮށްފައިވާ ކަމަށާއި އެހެން ނަމަވެސް އެއީ ވެކްސިންގެ ސަބަބުން މަރުވި މަރެއްކަން ސާބިތުވެފައި ނުވާކަމަށެވެ. އަދި އިންޑިއާގެ އާބާދީގެ 60 ލައްކައެއްހާ މީހުންނަށް ވެކްސިން ޖަހާފައިވާ އިރު، ސައިޑް އިފެކްޓްތައް ރިޕޯޓްކުރަނީ 0.000312 އިންސައްތަ މީހުން ކަމަށް ވެސް މިނިސްޓަރ ހަރޝް ވަރްދަން ވިދާޅުވިއެވެ.

މިނިސްޓަރ ވަނީ ވެކްސިންތައް ރައްކާތެރިކަމަށާއި، ވެކްސިންގެ ރައްކާތެރިކަމާ މެދު ޝައްކު އުފެދޭނަމަ އެ ޝައްކުކުރުންތައް ހުއްޓާލުމަށް ވިދާޅުވެފައެވެ.

މިހާރުވެސް ހަތް ވެކްސިނެއްގެ މަސައްކަތް އެބަ ކުރެވޭ ކަމަށް މިނިސްޓަރ ވިދާޅުވެފައިވާ އިރު، އިންޑިއާގައި މިވަގުތު ބޭނުން ކުރަމުން ދަނީ ދެ ވެކްސިނެކެވެ. އެއީ އިންޑިއާގެ އަމިއްލަ ކުންފުންޏެއް ކަމަށްވާ ބާރަތް ބަޔޯޓެކުން ކޮވިޑް-19 އަށް ފެއްދި ކޮވެކްސް ވެކްސިނާއި އެސްޓްރަޒެނެކާ އާއި އޮކްސްފޯޑް ޔުނިވާސިޓީގެ ރިސަރޗްގެ މައްޗަށް ސިރަމް އިންސްޓިޓިއުޓް އޮފް އިންޑިއާއިން އުފައްދާފައިވާ ކޮވިޝީލްޑް ވެކްސިނެވެ.

ދުނިޔޭގައި ހިންގޭ އެންމެ ބޮޑު އެއް ވެކްސިނޭޝަން ޕްރޮގްރާމް ޖެނުއަރީ މަހުގެ 16 ވަނަ ދުވަހު އިންޑިއާގައި ފަށާފައިވާއިރު، އިންޑިއާގެ އާބާދީގެ ހުރިހާ ރައްޔިތުންނަށް ވެކްސިން ޖެހުމަކީ އެގައުމުގެ އަމާޒެވެ.

އިންޑިއާއިން ވަނީ އެގައުމުގައި އުފައްދާ ވެކްސިންތައް އަވައްޓެރި ގައުމުތަކަށް ހަދިޔާ ވެސް ކޮށްފައެވެ. އޭގެ ތެރޭގައި ދިވެހި ރާއްޖެއާއި ލަންކާގެ އިތުރުން ބޫޓާން އަދި ނޭޕާލް ހިމެނެއެވެ.