ފާއިތުވި ދެމަސް ދުވަހުގެ ތެރޭގައި ފުރަތަމަ ފަހަރަށް ޗައިނާގެ އެތެރެއިން ކޮވިޑް-19އަށް މީހަކު ޕޮޒިޓިވްވެގެން ރިޕޯޓްކޮށްފައިނުވާ ކަމަށް އެގައުމުގެ ނޭޝަނަލް ހެލްތު ކޮމިޝަނުން ބުނެފިއެވެ.

ޗައިނާގެ ނޭޝަނަލް ހެލްތު ކޮމިޝަނުން ބުނީ ފެބްރުއަރީ މަހުގެ 7 ވަނަ ދުވަހު އެގައުމުން ކޮވިޑަށް ޕޮޒިޓިވްވެފައިވަނީ 14 މީހުން ކަމަށެވެ. އެހެންނަމަވެސް މިއެންމެންނަކީ ވެސް އެގައުމަށް އެތެރެވި މީހުންކަމަށް ހެލްތު ކޮމިޝަނުން ބުނެއެވެ. މީގެތެރެއިން 7 މީހުންނަކީ ޝަންހާއީއަށް އެތެރެވި މީހުންނެވެ. ބާކީ ތިބި މީހުންނަކީ ގުއަންގޑޮންގއިން ފެނުނު މީހުންނެވެ.

މިއީ ޑިސެމްބަރ މަހުގެ 16 ވަނަ ދުވަހުގެ ފަހުން ޗައިނާގެ ތެރެއިން ކޮވިޑް ކޭސްތައް ފެންނަން ފެށި ފަހުން މީހަކު ވައިރަސްއަށް ޕޮޒިޓިވްނުވެ ދިޔަ ފުރަތަމަ ދުވަހެވެ. ޗައިނާގައި މިފަހުން ތިން ސަރަޙައްދެއްގައި ވަނީ ކޮވިޑް ކޭސްތައް އިތުރުވެފައެވެ. އެއާއެކު ވައިރަސް ފެތުރުން ކޮންޓްރޯލްކުރުމަށް ވަރުގަދަ ފިޔަވަޅުތަކެއް ވަނީ އަޅާފައެވެ.

އެގޮތުން ހޭބެއި ޕްރޮވިންސާއި ހެލިއޮންޖިއަންގ އަދި ޖިލިން ޕްރޮވިންސުން ވަނީ ބޮޑެތި ކްލަސްޓަރ ތަކެއް މިފަހުން ފެނިފައެވެ.

ޗައިނާގައި މިހާތަނަށް އައިއިރު ކޮވިޑް ޖެހުނު މީހުންގެ އަދަދު 89،706ށް އަރައެވެ. އަދި މިބަލީގައި މަރުވި މީހުންގެ އަދަދު 4،636ށް އަރައެވެ.