ޗައިނާގެ ސިނޯވެކް ބައޯޓެކުން ކޮވިޑަށް އުފެއްދި ވެކްސިން އާންމުންގެ ގަޔަށް ޖެހުމަށް ޗައިނާގެ މެޑިކަލް ޕްރޮޑަކްޓްސް ރެގިޔުލޭޓަރ އިން ހޮނިހިރު ދުވަހު ހުއްދަދީފައިވާ ކަމަށް އެކުންފުނިން ބުނެފިއެވެ.
ސިނޯވެކްގެ ކޮވިޑް ވެކްސިނަށް އާންމު ބޭނުމަށް ހުއްދަދީފައިވާއިރު މިއީ ޗައިނާގައި ހުއްދަ ދިން ދެ ވަނަ ވެކްސިނެވެ. މީގެކުރިން ޑިސެމްބަރ މަހު ހުއްދަދީފައިވަނީ ޗައިނާ ސަރުކާރު ހިއްސާވާ ޗައިނާ ނޭޝަނަލް ފަރމަޝޫޓިކަލް ގްރޫޕް ކަމުގައިވާ ސިނޯފަރމް އިން އުފައްދާފައިވާ ވެކްސިނަށެވެ.
މި ދެކެވްސިނަށް ޗައިނާގެ މެޑިކަލް ޕްރޮޑަކްޓްސް ރެގިޔުލޭޓަރ އިން ހުއްދަދިން ނަމަވެސް ޗައިނާގައި އަންނަނީ މިދިޔަ އަހަރުގެ ޖޫން މަހުން ފެށިގެން ވެކްސިން ދެމުންނެވެ. އެގޮތުން ސިނޯވެކް އާއި ސިނޯފަރމް އިން އުފައްދާފައިވާ ދެ ވެކްސިނެއް ޗައިނާގައި އަންނަނީ ޖަހަމުންނެވެ. އެގޮތުން މިހާތަނަށް އައިއިރު 31 މިލިއަން ޑޯޒް ވަނީ ޖަހާފައެވެ. ވެކްސިން ޖަހަމުންދަނީ ވައިރަސްގެ އަސަރު އެންމެ ބޮޑަށް ކުރާ މީހުންނަށެވެ. މީގެއިތުރުން ޗައިނާގެ ސެންސިނޯ ބައޮލޮޖިކްސްގެ ވެކްސިން އަންނަނީ އެގައުމުގެ ސިފައިންނަށް ޖަހަމުންނެވެ.
ސިނޯވެކްގެ ވެކްސިން މިހާރުވެސް އިންޑޮނޭޝިޔާ، ތުރުކީ، ބްރެޒިލް، ޗިލީ، ކޮލަމްބިއާ، އުރުގުއާއީ އަދި ލާއޯސްގައި އިމަރޖެންސީކޮށް ޖެހުމަށް ވަނީ ހުއްދަދީފައެވެ.
ސިނޯވެކްގެ ވެކްސިން ބޭނުންކުރުމުގެ ހުއްދަ ދީފައިމިވަނީ ބޭރު ގައުމުތަކުގައި ކުރިޔަށް ގެންދިޔަ ޓްރެއަލްތަކަށް ބެލުމަށްފަހުއެވެ. ސިނޯވެކް ވެކްސިންގެ 1 ބިލިއަން ޑޯޒް އަހަރެއްގެ ތެރޭގައި އުފެއްދޭނެކަމަށް އެކުންފުނިން ވަނީ ބުނެފައެވެ.
މީގެއިތުރުން ޗައިނާއިން ވަނީ ކޮވެކްސް ފެސިލިޓީއަށް 10 މިލިއަން ވެކްސިން ޑޯޒް ދޭނެކަމަށް ބުނެފައެވެ. ކޮވެކްސް އަކީ ދުނިޔޭގެ ސިއްހަތު ޖަމިއްޔާ ޑަބްލިޔުއެޗްއޯއިން ގައުމުތަކަށް ހަމަހަމަކަމާއެކު ވެކްސިން ފޯރުކޮށްދިނުމަށް އުފައްދާފައިވާ ޕްރޮގްރާމެކެވެ.
ސިނޯވެކް ވެކްސިންގެ ޗައިނާގައި ކުރިޔަށް ގެންދިޔަ ފޭސް 1 އަދި ފޭސް 2 ގެ ޓްރެއަލްގެ ނަތީޖާ ދައްކާގޮތުން އެވެކްސިނުން އުމުރުން ދުވަސްވީ މީހުންގެ ހަށިގަނޑުގައި ވައިރަސް އާ ދެކޮޅަށް އެންޓިބޮޑީސް އުފައްދައިދެއެވެ. އެވެކްސިން ވަނީ އުމުރުން 3 އަހަރާއި 17 އަހަރާ ދެމެދުގެ ކުދިންގެ ގަޔަށްވެސް ޖަހައިގެން ޓެސްޓްކޮށްފައެވެ.
ސިނޯވެކުން ބުނާގޮތުގައި އުމުރުން 60 އަހަރާއި 60 އަހަރުން މަތީގެ މީހުންނަށް މިވެކްސިން ވައިރަސް އާ ދެކޮޅަށް މަސައްކަތްކުރާ މިންވަރު ވަނީ ވަކިވަރެއްގައި ހިފެހެއްޓިފައެވެ.
ސިނޯވެކް ވެކްސިންގެ ފޭސް ތިނެއްގެ ޓްރެއަލް ބްރެޒިލް އާއި ތުރުކީ އަދި އިންޑޮނޭޝިޔާގައި ވަނީ ކުރިޔަށް ގެންގޮސްފައެވެ. މި ޓްރެއަލްތަކުގެ ނަތީޖާތައް ވަކިވަކިން ވަނީ ކޮންމެ ގައުމަކުންވެސް ހާމަކޮށްފައެވެ.
އެގޮތުން ބްރެޒިލްގައި ކުރިޔަށް ގެންދިޔަ ޓްރެއަލްގެ ނަތީޖާ ދައްކާގޮތުން ވެކްސިންގެ ކާމިޔާބުގެ މިންވަރު އުޅެނީ 50.65 އިންސައްތައިގައެވެ. ބްރެޒިލްގައި ކުރިޔަށް ގެންދިޔަ ޓްރެއަލްގައި 12،369 ސިއްހީ މަސައްކަތްތެރިންގެ ގަޔަށް ވެކްސިން ވަނީ ޖަހާފައެވެ.
ތުރުކީގައި ކުރިޔަށް ގެންދިޔަ ޓްރެއަލް އަށް ބަލާއިރު ވެކްސިންގެ ކާމިޔާބު މިންވަރު އުޅެނީ 91.25 އިންސައްތައިގައެވެ. އިންޑޮނޭޝިޔާގައި ވެކްސިންގެ ކަމިޔާބު އިންސައްތައަކީ 65.3 ކެވެ.
ބްރެޒިލްގައި ވެކްސިން ކާމިޔާބު މިންވަރު ދަށްވެފައިވަނީ ޓްރެއަލްގައި ބޭނުންކޮށްފައިވަނީ އެންމެ ކުރީ ސަފުގައި މަސައްކަތްކުރާ ސިއްހީ މަސައްކަތްތެރިންނަށް ވުމުން ކަމަށް ސިނޯވެކުން ވަނީ ބުނެފައެވެ.
