ރަޝިއާގެ ސްޕަޓްނިކް-ވީ ވެކްސިން އަންނަ ހަފްތާގައި ލިބޭނެކަމަށް އުއްމީދުކުރެވޭ ކަމަށް މެކްސިކޯގެ ރައީސް އަންދްރެސް މެނުއެލް ލޮޕޭޒް އޮބްރަޑާ ވިދާޅުވެއްޖެއެވެ.

ޓެލެގްރާމް ޗެނަލް މެދުވެރިކޮށް ހުކުރު ދުވަހު ދެއްވި ޚިތާބެއްގައި އަންދްރެސް ވިދާޅުވީ، އަންނަ ހަފްތާގައި މެކްސިކޯއަށް ސްޕަޓްނިކް-ވީ ވެކްސިންގެ ފުރަތަމަ ޑޯޒްތައް ލިބޭނެކަމުގެ އުއްމީދު ބޮޑު ކަމަށެވެ. އަދި ވެކްސިން ޖަހަން ފެށުމަކީ އެ ޤައުމުގައި ކޮވިޑުގެ ބަލިމަޑުކަން ކޮންޓްރޯލް ކުރުމަށް އެޅޭނެ އެންމެ މުހިއްމު ފިޔަވަޅުކަން އަންދްރޭސް ފާހަގަ ކުރައްވާފައިވެއެވެ.

ރަޝިއާއިން އުފައްދާފައިވާ ސްޕަޓްނިކް ވެކްސިންގެ 24 މިލިއަން ޑޯޒް ކުރިއަށް އޮތް މަސްތަކުގައި ލިބޭނެ ކަމަށް އަންދްރެސް މީގެ ކުރިންވެސް ވިދާޅުވެފައިވެއެވެ.

ސްޕަޓްނިކް ވެކްސިންގެ އިތުރުން، މެކްސިކޯއިން ވަނީ ފައިޒަރ އަދި ބައޯއެންޓެކުން އުފެއްދި ވެކްސިނަށްވެސް ހުއްދަދީ، ބޭނުން ކުރަން ފަށާފައެވެ. އެގޮތުން މިހިނގާ ޖެނުއަރީ މަހުގެ 13 ވަނަ ދުވަހު ވެކްސިން ޖަހަން ފަށާފައިވާއިރު، އެންމެ ފުރަތަމަ ވެކްސިން ޖަހާފައިވަނީ ފްރަންޓްލައިންގައި މަސައްކަތް ކުރާ ސިއްޙީ އޮފިޝަލުންނަށެވެ.

މެކްސިކޯއިން މިހާތަނަށް 1.8 މިލިއަނަށްވުރެ ގިނަ މީހުންނަށް ކޮވިޑް ޖެހިފައިވާއިރު، 157،000ށް ވުރެ ގިނަ މީހުން ކޮވިޑް ޖެހިގެން މަރުވެފައިވެއެވެ.