ކޮވިޑަށް ޕޮޒިޓިވްވި ކޮލަންބިއާގެ ޑިފެންސް މިނިސްޓަރ ކާލޯސް ހޯލްމްސް ޓްރުޖީލޯ އައިސީޔޫގައި ފަރުވާދޭން ފަށައިފިއެވެ.

ކޮލަންބިއާގެ ރައީސް އޮފީހުން ނެރުނު ބަޔާނެއްގައި ބުނެފައިވަނީ މި މަހުގެ 12 ވަނަ ދުވަހު މިނިސްޓަރ ކާލޯސް ކޮވިޑަށް ޕޮޒިޓިވްވެފައިވާއިރު އޭނާ ހޭނައްތާލުމަށްފަހު ވެންޓިލޭޓަރުގެ އެހީގައި ފަރުވާދެމުންދާ ކަމަށެވެ. އެ ބަޔާނުގައި ބުނެފައި ވަނީ މިވަގުތު މިނިސްޓަރގެ ހާލު ސްޓޭބަލް ކަމަށެވެ. އެހެންނަމަވެސް މިވަގުތު އޭނާއަށް ފޯރުކޮށްދެމުންދަނީ ކޮން ސިއްހީ ފަރުވާއެއް ކަމެއް ހާމަކޮށްފައެއް ނުވެއެވެ.

ޑިފެންސް މިނިސްޓަރ ކާލޯސްގެ އުމުރަކީ 69 އަހަރެވެ.

އެންމެ ފުރަތަމަ މިނިސްޓަރ ކާލޯސް ޕޮޒިޓިވްވުމާއި ގުޅިގެން އެ ޤައުމުގެ ޑިފެންސް މިނިސްޓްރީން ބުނެފައިވަނީ ވައިރަސްއަށް ޕޮޒިޓިވްވި ނަމަވެސް ވަޗުއަލްކޮށް މަޤާމުގެ މަސްޢޫލިއްޔަތު އަދާ ކުރައްވަމުން ގެންދަވާނެ ކަމަށެވެ. އެހެންނަމަވެސް އޭގެ އެއްދުވަސް ފަހުން ކާލޯސް ހޮސްޕިޓަލަށް ގެންދެވި، އޭގެ ފަހުން އޭނާ ވަނީ ހޮސްޕިޓަލުގައެވެ.

ހޯމަ ދުވަހު މިލިޓަރީ ފޯސްގެ ޖެނެރަލް ކޮމާންޑަރ ވަނީ ކާލޯސް ރަނގަޅުވެ އަނބުރާ މަސައްކަތަށް ނިކުމެވެންދެން އެކްޓިންގ ޑިފެންސް މިނިސްޓަރުގެ މަޤާމަށް ޢައްޔަންކުރައްވާފައެވެ.