ކޮވިޑް-19އާއި ގުޅިގެން ގެސްޓްހައުސްތައް ބަންދު ކުރުމަށް ފަހުން ފަތުރުވެރިންނަށް އަލުން ހުޅުވައިފިއެވެ.
ރާއްޖޭގެ ލޯކަލް ޓުއަރިޒަމް އެންމެ ކުރިއަރާފައިވާ މާފުށީން ވަނީ އެ ރަށަށް ފުރަތަމަ ޒިޔާރަތް ކުރި ފަތުރުވެރިޔާއަށް މަރުހަބާ ކިޔާފައެވެ. މާފުށީ ކައުންސިލްގެ ރައީސް އުޘްމާސް ރަޝީދު ވިދާޅުވީ މާފުއްޓަށް ފުރަތަމަ ޒިޔާރަތް ކުރި ފަތުރުވެރިޔާއަށް ޓުއަރިޒަމް މިނިސްޓަރ އަބްދުﷲ މައުސޫމް މަރުހަބާ ކިޔުއްވާފައިވާ ކަމަށެވެ.
އަލަށް ފަތުރުވެރިންނަށް އެ ރަށް ހުޅުވާލި އިރު ހަތަރު ގެސްޓްހައުސްއަކުން ޙިދުމަތް ފަށާފައިވާކަން ފާހަގަކުރަމުން އުޘްމާން ވިދާޅުވީ އިތުރު ގެސްޓްހައުސްތައް ހުޅުވުމުގެ ހުއްދަ ދޫކުރަމުންދާ ކަމަށެވެ.
ބުރާސްފަތި ދުވަހު މާފުށީގައި ކުރިއަށްދިޔަ ހަރަކާތްތަކުގެ ތެރެއިން މިނިސްޓްރީގެ ފަރާތުން ވަނީ މާފުށީގެ ރައްޔިތުންނަށް ބެހުމަށްޓަކައި ރީ ޔޫސަބަލްް މާސްކް ކައުންސިލްއަށް ހަދިޔާކޮށްފައި ކަމަށާއި މީގެ އިތުރުން މިނިސްޓަރ މައުސޫމް ވަނީ 106 ކޮޓަރީގެ ކާނި ހޮޓެލް އެންޑް ސްޕަރ ވެސް ފަތުރުވެރި ކަމަށް އަލުން ހުޅުވައިދެއްވާފައެވެ.
ބުރާސްފަތި ދުވަހު އަލަށް ޒިޔާރަތް ކުރީ 4 ފަތުރުވެރިން ކަމަށްވާއިރު، މި މަހުގެ ތެރޭގައި ގިނަ ފަތުރުވެރިންތަކެއް އެ ރަށަށް ޒިޔާރަތް ކުރުމަށް ބުކިންގ ހަދާފައިވާ ކަމަށް އުޘްމާން ވިދާޅުވި އެވެ.
މާފުށީގެ ހުރިހާ ގެސްޓްހައުސްތައް އޮޕަރޭޝަން އަށް ގެނެވޭނީ ޑިސެމްބަރު މަހުގެ ތެރޭގައި ކަމަށް އޭނާ ވިދާޅުވި އެވެ.
މާފުއްޓަކީ ފަތުރުވެރިކަަމަށް ބަރޯސާވެފައިވާ ރަށެއް. ކޮވިޑްގެ މިހާލަތަކުގައި އަލުން އަނބުރާ މާފުށީގެ އިޤްތިޞާދު ކުރިއެރުވުމަށްޓަކައި ނަގަން ޖެހޭ ހުއްްދަތައް ނަގައިގެން މަސައްކަތްކޮށްފައިވަނީ އުނދަގުލުން. ނަމަވެސް ފަތުރުވެރި ރަށަކަށްވާއިރު އެކަން ހުއްޓިފައި އޮތުމަކީ ކަންބޮޑުވާ ކަމެއް.~ މާފުށީ ކައުންސިލްގެ ރައީސް އުޘްމާސް ރަޝީދު
އަދި މަސައްކަތް ކުރަނީ ދަތިތަކާއި އެކު މަސައްކަތްކޮށް ދަތިތަކުން އަރައިގަނެ އިޤްތިޞާދީ ގޮތުން ކުރިއަރައިގެން ދިއުން ކަމަށް އުޘްމާން ފާހަގަކުރެއްވި އެވެ.
ޓޫރިޒަމް އަލުން ފަށައިގަތުމަށް 9 ކައުންސިލަކުން ތައްޔާރުވެފައިވާއިރު، މިހާތަނަށް 35 ގެސްޓްހައުސް އެއް ހުޅުވުމުގެ ހުއްދަ ޓޫރިޒަމް މިނިސްޓްރީ އިން ދީފައިވާ ކަމަށް އެމިނިސްޓްރީން ވަނީ ހާމަކޮށްފަ އެވެ.
އެހެންކަމުން ގެސްޓްހައުސްތަކަށް ހުއްދަ ދޫކުރާއިރު އެޗްޕީއޭގެ ގައިޑްލައިންގެ ހުރިހާ ކަމެއް ފުރިހަމަވޭތޯ ޗެކް ކުރާނެ ކަމަށާއި ގައިޑްލައިނާ އެއްގޮތަށް ކަންކަން ކުރެވޭނެނަމަ އިގްތިސާދީ ހަރަކާތްތައް ހުއްޓާލަން ޖެހޭ ހިސާބަށް ނުދާނެ ކަމަށް ޓުއަރިޒަމް މިނިސްޓްރީން ވަނީ ބުނެފައެވެ.
އަދި ރިސޯޓްތަކުގެ ތަޖުރިބާ އަކީ ވެސް ގައިޑްލައިނާ އެއްގޮތަށް ކަންކަން ކުރިއަށް ގެންދިއުމުން ރަނގަޅަށް އެކަންވުން ކަމަށާއި، ރިސޯޓްތަކުގައި ފަތުރުވެރިންގެ ކޭސްތައް މަދު އަދި އައުޓްބްރޭކެއް ނެތްއިރު، ރަށްރަށުގައި ވެސް ގައިޑްލައިނާ އެއްގޮތަށް ދާނަމަ، ކަންކަން ރަނގަޅުވާނެ ކަމަށް މިނިސްޓްރީން ފާހަގަކުރެ އެވެ.
ގެސްޓްހައުސްތައް ބަންދުކޮށްފައި ހުރުމަށް ފަހު އަލުން ހުޅުވާލުމުގެ ހުއްދަ ދޭއިރު، ގެސްޓްހައުސްތައް ހުޅުވާލާ ރަށްތަކުގައި މާސްކު އެޅުން ވަނީ މަޖުބޫރުކޮށްފަ އެވެ.
ގެސްޓްހައުސް އޮޕަރޭޓް ކުރާ ރަށަކުން ގެސްޓްހައުސް އޮޕަރޭޓް ނުކުރާ ރަށަކަށް އާންމު އުސޫލުން ދަތުރު ކުރާނަމަ 14 ދުވަހުގެ ކަރަންޓީން މުއްދަތު ފުރިހަމަ ކުރަންޖޭހޭ ގޮތަށް އެޗްޕީއޭއިން ވަނީ ކަނޑައަޅާފައެވެ. އަދި ގެސްޓްހައުސް އޮޕަރޭޓްކުރާ ރަށްރަށުގައި އަމަލުކުރަންޖެހޭ ގައިޑްލައިންއެއް ވަނީ އެކުލަވާލާފައެވެ.
މި މަހުގެ 15 ގައި އަތޮޅުތެރޭގައި ގެސްޓްހައުސްތައް ހުޅުވާލުމަށް ހުއްދަ ދިން ނަމަވެސް ގްރޭޓަރ މާލޭ ސަރައްހައްދުގައި ގެސްޓްހައުސްތައް ހުޅުވާނެ ތާރީޚެއް އަދި އިއުލާން ކޮށްފައެއް ނުވެއެވެ.
