ކުޅުދުއްފުށީގައި ޒަމާނީ ފެންވަރުގެ އިންޖީނުގެއެއް އިމާރާތް ކުރުމުގެ ބިންގާ އަޅައިފިއެވެ.
ފެނަކައިން އަތޮޅުތެރޭގެ އިންޖީނުގެތައް ބަދަލު ކުރުމަށް ކުރަމުން ގެންދާ ދަތުރުގެ ތެރެއިން މިއަދު ހެނދުނު ކުޅުދުއްފުށީ އިންޖީނުގޭގައި ބޭއްވި ރަސްމިއްޔާތުގައި އާ އިންޖީނުގޭގެ ބިންގާ ވަނީ އަޅުއްވައިދެއްވާފައިވެއެވެ. ބިންގާ އެޅުމުގެ މި ރަސްމިއްޔާތުގައި ފެނަކަ ކޯޕަރޭޝަންގެ މެނޭޖިންގ ޑިރެކްޓަރު އަހުމަދު ސައީދާއި ކުޅުދުއްފުށީ ދެ ދާއިރާގެ މަޖިލިސް މެމްބަރުން ވަނީ ބައިވެރިވެ ވަޑައިގަންފައެވެ.
ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުން ފެނަކަ ކޯޕަރޭޝަނުގެ އެމްޑީ އަހުމަދު ސައީދު ވިދާޅުވީ ކުޅުދުއްފުށި އައު އިންޖީނުގެ ވެގެންދާނީ އެންމެ މި ޒަމާނުގެ ޓެކްނޮލޮޖީއާއެކު ގާއިމުކުރެވިގެންދާނެ އިންޖީނުގެ އެއް ގޮތުގައި ކަމަށެވެ.
އައު އިންޖީނުގެ ހުޅުވިގެންދާއިރު ހަތަރު މެގަވޯޓްގެ ފަސް ބެޑް ބެހެއްޓިގެންދާނެކަމަށާ މީގެ ސަބަބުން ކުރިއަށް އޮތް 35 ވަރަކަށް އަހަރު ވެސް އިންޖީނުގެއަށް އެއްވެސް ބަދަލެއްގެންނަން ނުޖެހޭނެ ކަމަށް ސައީދުވަނީ ވިދާޅުވެފައެވެ.
މި މަސައްކަތަކީ 330 ދުވަސްތެރޭގައި ނިންމުމަށް އެއްބަސްވެފައިވާ މަޝްރޫއެކެވެ. އަދި މި މަޝްރޫއުއަށް 15،755،760.90 (ފަނަރަ މިލިއަން ހަތްލައްކަ ފަންސާސް ފަސްހާސް ހައްސަތޭކަ ފަސްދޮޅަސް ރުފިޔާ ނުވަދިހަ) ލާރި ހަރަދުކުރަން ވަނީ ހަމަޖެހިފައެވެ. ކުޅުދުއްފުށި އައު އިންޖީނު ވެގެންދާނީ މިހާތަނަށް އަތޮޅުތެރޭގައި ފެނަކައިން ގާއިމުކުރާ އެންމެ ބޮޑު އިންޖީނުގެ ގޮތުގައެވެ.
ރާއްޖެއެމްވީއަށް މީގެ ކުރިން ދިން އިންޓަވިޔުއެއްގައި ސައީދު ވިދާޅުވީ މި އަހަރު ނިމެންވާއިރަށް އެއްކޮށް މަސައްކަތް ނިންމާލެވޭނީ 28 ރަށެށްގެ އިންޖީނުގެތަކުގެ ކަމަށެވެ. އަދި މި ސަރުކާރުގެ އަމާޒަކީ 5 އަހަރު ނިމޭއިރު ރާއްޖޭގެ އެކި ކަންކޮޅުތަކުގައި ހުރި ހުރިހާ ބައު އިންޖީނުގެތައް ބަދަލުކޮށް ނިންމާލުން ކަމަށް ސައީދުވަނީ ވިދާޅުވެފައެވެ.
