ޅ. ހިންނަވަރުގެ ބަނދަރު ވަނީ ބޭނުން ނުކުރެވޭ ވަރަށް ހަލާކުވެފައި ކަމަށް އެރަށު ކައުންސިލްގެ ރައީސް އަބްދުﷲ އިބްރާހިމް ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ހިންނަވަރު ކައުންސިލްގެ ރައީސް އަބްދުﷲ އިބްރާހިމް ވިދާޅުވީ، ހިންނަވަރުގެ އެއްވެސް ބަނދަރެއް ބޭނުން ކުރަން މިހާރު އެކަށީގެން ނުވާ ކަމަށެވެ. އަދި އެންމެ ފަހުން ގާއިމް ކުރެވުނު ބަނދަރު ވަރަށް ބޮޑަށް އަރިއަޅާލައިފައިވާ ކަން ފާހަގަކޮށް އޭނާ ވިދާޅުވީ، ބަނދަރު އެއްވެސް ވަރަކަށް ބޭނުން ކުރަން އެކަށީގެން ނުވާ ކަމަށެވެ.
މީގެ އިތުރުން ބަނދަރުގެ ތޮށިގަނޑަށް ލިބިފައިވާ ގެއްލުންތަކުގެ ސަބަބުން ތޮށިމަތިން ރާޅު އަރާކަމަށާއި، ބޭރު ތޮއްޓާ މޫދުގެ ލޮނުގަނޑު އެއް ހަމައެއްގައި ހުންނަ ކަމަށް އޭނާ މައުލޫމާތު ދެއްވިއެވެ. އަދި އެ ރަށަކީ ރާއްޖޭގެ އެކި ކަންކޮޅުތަކުގެ މަސްވެރިން އަބަދުވެސް އެކި ކަންކަމުގައި ކައިރިކުރާ ރަށަކަށް ވާއިރު ބަނދަރު އޮންނަނީ ފުރިފައި ކަމަށް އަބްދުﷲ އިބްރާހިމް ވިދާޅުވިއެވެ.
އަބްދުﷲ އިބްރާހިމް އިތުރަށް ވިދާޅުވީ، ބޮޑެތި ދޯނި ފަހަރަށް ބަނދަރާ ކައިރި ނުކުރެވޭ ވަރަށް ހަލާކުވެފައިވާ ކަމަށެވެ. އަދި ބަނދަރަށް ވަންނަ ދިމާލުގައި ހުރި ނެރު ބައްތިތައްވެސް ހުރީ ހަލާކުވެފައިވާ ކަމަށް ވިދާޅުވިއެވެ. މިހާރު އެންމެ ބޮޑު އުއްމީދަކީ ބަނދަރު އަޕްގްރޭޑް ކުރުމުގެ މަސައްކަތް ވީ އެންމެ އަވަހަކަށް ފެށި، ރަށަށް ލަފާފުރުމުގައި ހުރި ދަތިތަކަށް ހައްލެއް ލިބުން ކަމަށް ވިދާޅުވިއެވެ.
ޅ. ހިންނަވަރު ބަނދަރު ހެދުމުގެ މަސައްކަތް މިހާރު ގޮސްފައިވާ ހިސާބަށް ބަލާއިރު، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަަކްޗަރ އިން ބުނެފައިވަނީ މި މަޝްރޫއުގެ ޕްރިލިމިނަރީ ކޮންސެޕްޓަށް ކައުންސިލުން ދީފައިވާ ކޮމެންޓްތައް ރިވިއު ކުރުމަށްފަހު ޓެކްނިކަލީ ގެންނަން ޖެހޭ ބަދަލުތައް ގެންނަން ނިންމާފައިވާ ކަމަށެވެ. މި މަޝްރޫއުއަށް 2020 ވަނަ އަހަރު ކަނޑައަޅާފައިވާ ބަޖެޓަކީ 12،000،000 ދިވެހި ރުފިޔާއެވެ.
