ވިލާ ކޮލެޖުގެ ފަރާތުން ޖެނުއަރީ 2021 ގައި އަލަށް ތަޢާރަފް ކުރާ އިންޖިނިއަރިންގްގެ 4 ޕްރޮގްރާމެއް ލޯންޗު ކޮށްފިއެވެ.
އެގޮތުން ލޯންޗު ކުރި ޕްރޮގްރާމްތަކަކީ ފައުންޑޭޝަން އިން އިންޖިނިއަރިންގް، ބެޗެލަރ އޮފް އިލެކްޓރިކަލް އެންޑް އިލެކްޓްރޯނިކްސް އިންޖިނިއަރިންގް (އޮނަރސް)، ބެޗެލަރ އޮފް މެކޭނިކަލް އިނޖިނިއަރިންގް (އޮނަރސް) އަދި ބެޗެލަރ އޮފް މެކަޓްރޯނިކްސް އިންޖިނިއަރިންގް (އޮނަރސް) އެވެ.
މި ކޯސްތައް ލޯންޗުކޮށްފައި ވަނީ އެކަމަކަށްޓަކައި ބޭއްވި ޚާއްސަ ވަރޗުއަލް ރަސްމިއްޔާތަކުންނެވެ. މި ރަސްމިއްޔާތުގައި، ޕްރޮގްރާމްތައް ލޯންޗު ކޮށްދެއްވީ ނައިބު ރައީސް، ފައިސަލް ނަސީމެވެ. އަދި މިނިސްޓަރ އޮފް ކޮމިއުނިކޭޝަންސް، ސައިންސް އެންޑް ޓެކްނޮލޮޖީ، މުޙައްމަދު މަލީޙު ޖަމާލު ވެސް ވަނީ މި ރަސްމިއްޔާތުގައި ވާހަކަފުޅު ދައްކަވާފައެވެ.
މި ޕްރޮގްރާމްތައް ލޯންޗު ކުރެއްވުމުގެ ގޮތުން ދެއްކެވި ވާހަކަފުޅުގައި، ނައިބު ރައީސް، ފައިސަލް ނަސީމް ވަނީ ޤައުމަށް މިފަދަ ދާއިރާތަކުން ހުނަރުވެރިން ވަރަށް ބޮޑަށް ބޭނުންވެފައިވާ ދަނޑިވަޅެއްގައި ވިލާ ކޮލެޖުން މިފަދަ ޚާއްސަ ޕްރޮގްރާމްތަކެއް ތަޢާރަފް ކުރުމުގެ ސަބަބުން، އެކަން ވަރަށް ޚާއްސަ ގޮތެއްގައި ފާހަގަ ކުރައްވާފައެވެ.
މި ރަސްމިއްޔާތުގައި މިނިސްޓަރ އޮފް ކޮމިއުނިއުނިކޭޝަން، ސައިންސް އެންޑް ޓެކްނޮލޮޖީ، މުޙައްމަދު މަލީޙު ޖަމާލު ދެއްކެވި ވާހަކަފުޅުގައި، ކޯވިޑް-19 ގެ މިޙާލަތުގައި، ދިވެހި އިޤްތިޞާދަށް ބޮޑެތި ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައި، ދިވެހި ޒުވާނުންނަށްޓަކައި މިފަދަ ޕްރޮގްރާމްތަކެއް ތަޢާރަފްވެގެން ދިޔުމަކީ ނުހަނު މުހިންމު ކަމެއްކަން ފާހަގަ ކުރެއްވިއެވެ.
ރަސްމިއްޔާތު ފެއްޓެވުމުގެ ގޮތުން ވިލާ ކޮލެޖުގެ ރެކްޓަރ، ޑރ. ޢަޙްމަދު އަންވަރު ދެއްކެވި ވާހަކަފުޅުގައި ވިލާ ކޮލެޖުގެ ޗެއަރމަން، ހޮނަރަބަލް ޑރ. ޤާސިމް އިބްރާހިމްގެ ވިސްނުންފުޅުގެ ދަށުން ވިލާ ކޮލެޖުން މި ފަށާ އިންޖިނިއަރިންގްގެ ޕްރޮގްރާމްތަކުން ދިވެހި ދަރިވަރުންނަށް ވަރަށް ބޮޑެތި ފައިދާތަކެއް ކުރާނެ އުންމީދު ކުރައްވާ ކަމަށް ވިދާޅުވިއެވެ.
މި ރަސްމިއްޔާތުގައި ލޯންޗު ކުރި ޕްރޮގްރާމްތަކާއި ބެހޭ ތަފްޞީލީ މަޢުލޫމާތު ދެއްވަމުން ވިލާ ކޮލެޖުގެ ވައިސް ރެކްޓަރ، ޑރ. ޢަލީ ނަޖީބު ވިދާޅުވީ މި ޕްރޮގްރާމްތަކުގެ ސަބަބުން އިންޖިނިއަރިންގްގެ ދާއިރާއިން ފުންނާބުއުސް ދަސްވެނިން ބިނާ ކުރެވިގެންދާނެ ކަމަށެވެ.
ހަމަ އެހެންމެ އިންޑަސްޓްރީ، 4 ވަނަ އިންޤިލާބަކާއި ދިމާލަށް މިސްރާބު ޖަހާފައިވާއިރު، މި ކޯހުން އެންމެ ފުރިހަމަ ގޮތުގައި ދަރިވަރުން އެކަމަށްޓަކައި ތަމްރީނު ކުރެވިގެންދާނެ ކަމަށް، ޑރ. ނަޖީބު ވިދާޅުވިއެވެ.
މި ރަސްމިއްޔާތުގައި އިންޖިނިއަރިންގްގެ ދާއިރާގެ ތަޖުރިބާކާރެއް ކަމަށްވާ ފެނަކަ ކޯޕޮރޭޝަންގެ ޓެކްނިކަލް ސަރވިސް އެންޑް ގްރީން އެނަރޖީގެ ޑިރެކްޓަރ އަޙްމަދު ނާޝިތު ވަނީ އިންޖިނިއަރިނގްގެ ދައިރާގައި ހުރި ފުރުޞަތުތަކާއި އިންޑަސްޓްރީއަށް މިފަދަ ޕްރޮގްރާމްތަކުގެ މުހިންމުކަމުގެ މައްޗަށް ވަނީ އަލިއަޅުވާލާ ވާހަކަފުޅު ދައްކަވާފައެވެ.
އެގޮތުން އިންޑަސްޓްރީގައި މިހާރުވެސް ޓެކްނިކަލް ދާއިރާއިން މުޅިންހެން ދިވެހި ބޭފުޅުން ހަރަކާތްތެރި ވަމުން ދާއިރު، މި ދާއިރާއިން އިތުރު ދިވެހިން ތަމްރީނުވެގެން ދިޔުމަކީ ނުހަނު ބޭނުންތެރިކަމެއް ކަމަށް ނާޝިތު ވިދާޅުވިއެވެ. އަދި ހަމަ އެއާއެކު، އިންޖިނިއަރިންގްގެ ދާއިރާއިން ރާއްޖޭގައި ވަޒީފާގެ އެތައް ފުރުސަތުތަކެއް މިހާރުވެސް ފަހިވެފައި ހުރިކަމަށް ވިދާޅުވިއެވެ.
މީގެ އިތުރުން، މިވަގުތު ރާއްޖެއިން ބޭރުގައި އިންޖިނިއަރިންގްގެ ދާއިރާއިން ތަޢުލީމް ހާސިލް ކުރަމުންދާ ދަރިވަރެއް ވެސް ވަނީ މި ރަސްމިއްޔާތުގައި ބައިވެރިވެ، މިފަދަ ޕްރޮގްރާމްތަކުން ކުރިއަށް ދިޔުމުގެ ފުރުސަތު، އަމިއްލަ ފަސްގަނޑުން ލިބެން ހުރުމުގެ މުހިންމުކަން ފާހަގަ ކޮށްފައެވެ.
ވިލާ ކޮލެޖުން އިންޖިނިއަރިންގް ޕްރޮގްރާމްތަކާއެކު ޖުމްލަ 90ށްވުރެ ގިނަ ޕްރޮގްރާމް ޖެނުއަރީ 2021 ގައި ފެށުމަށް ވަނީ ހަމަޖެހިފައެވެ.
މި ޕްރޮގްރާމްތަކަށް އެޕްލައި ކުރުމުގެ ފުރުސަތު މިހާރު ހުޅުވިފައިވާއިރު، އެޕްލައި ކުރުމުގެ އެންމެ ފަހު ތާރީޚަކީ، 19 ޑިސެމްބަރ 2020 އެވެ.
