މަގޫދޫ ބަނދަރު ހެދުމުގެ މަޝްރޫއު ފުރިހަމަ ކަމާއެކު ނިންމާލެވެނެ ކަމުގެ ފުރިހަމަ ޔަގީންކަން އެބައޮތް ކަމަށް އެރަށު ކައުންސިލްގެ ރައީސް ވިދާޅުވެއްޖެއެވެ.
މަގޫދޫ ބަނދަރު ހެދުމުގެ މަޝްރޫއު ވަނީ ޕްލޭން ކުރެވިފައެވެ. މިކަމުގެ މައުލޫމާތު ހިއްސާ ކުރައްވާ ރާއްޖެއެމްވީއަށް މައުލޫމާތު ދެއްވަމުން އެ ރަށު ކައުންސިލްގެ ރައީސް ފަތުހުﷲ ނަސީރު ވިދާޅުވީ މިހާރުވެސް އެރަށުގައި ބަނދަރެއް އޮންނަކަމަށެވެ. ނަމަވެސް މި ބަނދަރަށް ތަފާތު އެކި މައްސަލަ ދިމާވާ ކަމަށެވެ.
އެގޮތުން މޫސުން ގޯސްވާ ދުވަސްވަރު ވެލިއެރުމުގެ މައްސަލަ އިންތިހާއަށް ދިމާވާކަމަށާއި، މިހާރު އެތައް ފަހަރެއްގެ މަތިން ވެލިތައް ނެގި ނަމަވެސް މި މައްސަލަ އަދިވެސް ދިމާވަމުން އަންނަ ކަމަށް ފަތުހުﷲ ވިދާޅުވިއެވެ. އަދި އެ ރަށުގެ ކަންނެލި ދޯނިތަކަށް މިކަމުގެ ސަބަބުން އެތަކެއް ދަތިތަކެއް ދިމާވާ ކަމަށާ ހާއްސަކޮށް ޖާގައިގެ ދަތިކަން ދިމާވާކަމަށް އޭނާ ވަނީ ފާހަގަ ކުރައްވާފައެވެ.
އޭނާ އިތުރަށް ވިދާޅުވީ މި މަޝްރޫއުއާ މެދު ގިނަ ހުވަފެންތަކެއް ދެކޭ ކަމަށާއި، މި މަޝްރޫއު ކާމިޔާބު ކަމާއެކު ނިންމާލެވޭނެ ކަމުގެ 100 އިންސައްތަ ޔަގީންކަން އެބައޮތް ކަމަށްވެސް ވިދާޅުވިއެވެ. އަދި އަލަށް ގާއިމް ކުރެވޭ ބަނދަރާއެކު ވެލި ވަނުމުގެ މައްސަލައަށް ހައްލެއް ލިބިގެންދާނެ ކަމަށް އުއްމީދު ކުރެވޭ ކަމަށްވެސް އޭނާ ފާހަގަކުރެއްވިއެވެ. އަދި މި މައްސަލަ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އާއި އެ ދާއިރާގެ މަޖިލީސް މެންބަރު ކޮށްދެއްވަމުން ގެންދަވާ މަސައްކަތްތަކަށް ޝުކުރު އަދާކުރައްވާ ކަމަށްވެސް ފަތުހުﷲ ވިދާޅުވިއެވެ.
މިނިސްޓްރި އޮފް ނެޝެނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ޕްލޭންކޮށްފައިވާ މި މަޝްރޫއުގެ މަސައްކަތުގެ ޕްރިލިމިނަރީ ކޮންސެޕްޓް ހެދި ކައުންސިލްއާ ހިއްސާ ކުރެވި ކޮމެންޓްތައް ރިވިއު ކުރުމަށްފަހު ރިވައިޒްޑް ކުރެހުން ކައުންސިލްގެ އެޕްރޫވަލްއަށް ވަނީ ފޮނުވާފައެވެ. މިއީ ދިވެހި ސަރުކާރުގެ ބަޖެޓުން ފަންޑު ކުރާ މަޝްރޫއު އަކަށް ވީއިރު 2020 ވަނަ އަހަރަށް ކަނޑައެޅިފައިވާ ބަޖެޓަކީ 18،250،000ރ. އެވެ.
