ރޮކް އެންޑް ރޯލް ގެ އެންމެ މަގުބޫލު ގިޓާރިސްޓް، އެޑީ ވެން ހެލެން މަރުވެއްޖެއެވެ.

އުމުރުން 65 އަހަރުގެ އެޑީ މަރުވީ ސެންޓާ މޮނިކާ ހޮސްޕިޓަލްގައި ކެންސަރަށް ފަރުވާ ހޯދަމުން ދަނިކޮށެވެ. އޮކްޓޯބަރު 10 ވަނަ ދުވަހު އެޑީގެ ދަރިފުޅު ވުލްފް ވެން ހެލެން ވަނީ ބައްޕަ މަރުވިކަން ހާމަކޮށް ސޯޝަލް މީޑިއާގައި މެސެޖެއް ހިއްސާކޮށްފައެވެ.

އެ މެސެޖުގައި އޭނާގެ ދަރިފުޅު ބުނެފައިވަނީ އެއީ މީހަކަށް ލިބޭނެ އެންމެ ރަނގަޅު ބައްޕަ ކަމަށާއި ސްޓޭޖް މަތީގައި އާއި އޮފް ސްޓޭޖްގައި ބައްޕައާ އެކީގައި ހޭދަ ކުރި ކޮންމެ ވަގުތަކީ ވެސް "ގިފްޓެއް" ކަމަށެވެ. ބައްޕަ މަރުވުމުން ހިތް ކުދިކުދިވެއްޖެ ކަމަށާއި ބައްޕަ ވަކިވެގެން ދިޔުމުން ލިބުނު ހިތާމައިން އަރައިނުގަނެވޭނެ ކަމަށެވެ.

އެޑީ މަރުވިއިރު އޭނާގެ ދަރިފުޅު ވުލްފް އާއި އޭނާގެ ބޭބެ އެލެކްސް އަދި އަންހެނުން ޖެނީ ކައިރީގައި ތިއްބި ކަމަށް މީޑިއާ ރިޕޯޓުތައް ބުނެއެވެ.

އެޑީ އަކީ 1972 ގައި ފެށި ވެން ހެލެން ބޭންޑް ގެ ލީޑް ގިޓާރިސްޓް އަދި ސޯންގް ރައިޓާރކަން ފާހަގަކޮށްލެވެއެވެ. މި ބޭންޑު އެކުލަވާލީ އޭނާ އާއި އޭނާގެ ބޭބެ ޑްރަމާރ އަލެކްސް ވެން ހެލެން، ބޭސިސްޓް މާރކް ސްޓޯން އަދި ސިންގަރ ޑޭވިޑް ލީ ރޮތް އާއި އެކުއެވެ.