އެމްއެމްޕީއާރްސީން ޚިޔާނާތްތެރިވީ ފައިސާގެ ތެރެއިން އޭރާއި މިހާރުގެ ސަރުކާރުގައި ތިއްބެވި އިސްވެރިންނަށާއި، މަޖިލިސް މެންބަރުންނަށާއި، ފަނޑިޔާރުންނާއި އަދި މުއައްސަސާތަކުގެ އިސްވެރިންތަކަކަށް މަންފާ ވެފައިވާކަމީ ފޮރުވޭނެ ހަގީގަތެއް ނޫންނެވެ. ނަމަވެސް ތުހުމަތުކުރެވޭ ކޮންމެ ފަހަރަކު އެކަމާއި ދެކޮޅު ހަދައެވެ. އެންމެ ކުރީގައި ހިމެނެނީ އެންމެ އަޑުގަޑަ ސިޔާސީ އިސް ފަރާތްތަކެވެ.

ދާދިފަހުން މަޖިލީހުގެ ރައީސް އަބްދުއްރަހީމާއި ގުޅުވައި މިފަދަ ވާހަކަތަކެއްވެސް ފެތުރުނެވެ. އަދި މިއީ ފުރަތަމަ ފަހަރެއްވެސް ނޫނެވެ. ނަމަވެސް އެމްއެމްޕީއަރުސީ ކޮރަޕްޝަން މައްސަލައިގައި ފުރިހަމަ ތަހުގީގެއް ހިންގައި އެ މައްސަލަ ބަލާނެ ކަމަށާއި އެ މައްސަލައިގައި ޖަވާބުދާރީވާން ތައްޔާރަށް ހުންނެވި ކަމުގައި ރައްޔިތުން މަޖިލިހުގެ ރައީސް އަބްދުއްރަހީމް އަބްދުﷲ ވިދާޅުވި ނަމަވެސް އެމަނިކުފާނުގެ ނަންވެސް މި ލިސްޓުގައި އޮތްކަމަށް ދެކެވޭ ވާހަކަތަށް ބާރުލިބޭ އިތުރުކަންކަންވެސް މިދަނީ އެނގި ހާމަވަމުންނެވެ.

މީގެ ކުރިން ހާމަވެފައިހުރި ކަންތައްތަކަށް ބަލާއިރު، އަބްދުލްރަހީމް އަބްދުﷲ އެސެޓް ރިކަވަރީ ކޮމިޝަނަށް ހާޒިރުކޮށް އެމްއެމްޕީއާރުސީ މައްސަލައިގައި ސުވާލުކުރެވުނެވެ. 300 މީހުންގެ ލިސްޓުގައި ހިމެނޭ ފަރާތްތަކާއި ސުވާލުކުރި އިރު އަބްދުއްރަހީމާއި ވެސް ސުވާލުކުރިއެވެ. ނަމަވެސް އޭނާ އެކަމަށް އިންކާރުކޮށް އެވާހަކަތައް ދޮގުކުރިއެވެ.

މީގެ އިތުރުން އެމްއެމްޕީއާރުސީގެ ހިޔާނާތުގެ ފައިސާ ރައްޔިތުންގެ މަޖިލީހުގެ ޕީޕީއެމްގެ ބައެއް މެމްބަރުންގެ ކެމްޕޭނަށް، ކުރީގެ ނައިބު ރައީސް އަހްމަދު އަދީބު ހޭދަކުރެއްވި ކަަމަށް ރައީސް އަބްދުﷲ ޔާމީން ވިދާޅުވެފައި ވަނިކޮށް، ފޮނަދޫ ދާއިރާގެ މެމްބަރު އަބްދުއްރަހީމް "އެތިކޮޅެއް" ހޯދަން އަދީބުގެ އަރިހުން އެދިވަޑައިގެންފައިވާ އޯޑިއޯއެއް ސޯޝަލް މީޑިއާގައި 2017 ގައި ލީކުވިއެވެ.

އެ އޯޑިއޯ އިން އެނގޭ ގޮތުގައި، ރައްޔިތުންގެ މަޖިލީހުގެ އިންތިހާބުގެ ކެމްޕޭން ތެރޭގައި ފޮނަދޫގައި ހުންނަވައިގެންނެވެ. އޭނާގެ ދާއިރާގައި ތިބި ވަރަށް ވަރުގަދަ ދެ އާއިލާއެއް ޕީޕީއެމަށް އަނބުރާލަން "އެތިކޮޅެއް" ބޭނުންވާ ކަމަށް އެ އޯޑިއޯގައި އަބްދުރަހީމް ވިދާޅުވެއެވެ. ނަމަވެސް އެ "އެތިކޮޅެއް" އެއީ ކޯއްޗެއްކަމެއް އެއިރު ސާފެއް ނުވެއެވެ. ނަމަވެސް އަނެއްކާވެސް ބުރަދަން ހުރި އިތުރުވާހަކަތެއް މިވަނީ ތިލަވާން ފަށާފައެވެ.

މިފަދައިން ދަންނަވަން މިޖެހުނީ އޭސީސީން ދެފައި އެއްތާކު މަޑުނުވެ ދެފަޔަށް ހިނިއަރައިގެން އުޅޭތީއެވެ. ސޯޝަލް މީޑިއާ އެކްޓިވިސްޓް ތޮއްޔިބު ޝަހީމް ދޫކޮށްލި އޭސީސީގެ ރިޕޯޓެއްގެ ބައެއްކަމަށް ބުނާ ލިޔުމެއްގައި ނިކަން ވާހަކަ އެބަހުއްޓެވެ.

މި ލިޔުމުގައިވަނީ މެންބަރުން ބޭނުންކުރަންޖެހޭ ކަމަށް ބުނެ ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ރިޔާޒު ބުނފައިވާ ބުނުމެއްގެ ވާހަކައެވެ. އެގޮތުން މަޖިލިސް މެންބަރު ލ. ފޮނަދޫ ދާއިރާގެ އަބްދުއްރަހީމް އަބްދުﷲ އެމްއެމްޕީއާރުސީގެ ފައިސާ ނަގުދު ފައިސާ ލިބިފައިވާކަމަށް ތުހުމަތުކުރެވޭތީވެ، އަބްދުއްރަހީމްގެ އާއިލާ މީހުންނާއި، އެފަރާތްތައް ކައިވެނިކޮށްގެން އުޅޭ ފަރާތްތަކަށް ފައިސާ ބަލުކޮށްފައިވާ ކަމަށް ތުހުމަތުކުރެވިގެން އެފަރާތަތްކުގެ އިންޓެލިޖެންސް މައުލޫމާތު ހޯދުމަށް އެދުމަށް އަބްދުއްރަހީމް އަކީ މައްލައިގެ ސިއްރު ހެއްކެއްގެ ގޮތުގައި ބޭނުންކުރަން ޖެހޭ ފަރާތެއްކަމަށް ބުނެ އެ ފައިސާ ގޮސްފައިވާ ގްރާސް ރޫޓް ހޯދުމަށް ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ރިޔާޒް މެދުވެރިކޮށް ފުލުހުން އެހީތެރިކަމަށް އެދުމުން އެހީތެރިކަން ދިނުމަށް އެކިއެކި ސަބަބުތައް ދައްކާ އެހީތެރިކަން ފޯރުކޮށްދީފައި ނުވާ ކަމަށެވެ.

މީގެ އިތުރުން މި ލިޔުމުގައި ބުނެފައިވަނީ އަބްދުއްރަހީމްގެ މައްޗަށް އެމްއެމްޕީއާރުސީގެ ފައިސާ ލިބިފައިވާކަން މުތުލަކަށް ޔަގީނާ ގާތަށް އެގެން އޮތްނަމަވެސް ދައުވާ ނުކުރުމަކީ އެންމެ ރަނގަޅުގޮތްކަމަށް މުހައްމަދު ރިޔާޒު ވިދާޅުވެފައިވާ ކަމަށް ވެސް މި ލިޔުމުގައިވެއެވެ.

ކޮންމެއަކަސް މި ލިޔުމަކީ އޭސީސީގެ ރިޕޯޓުގެ ބައެއްކަން ޔަގީންކަމާއެކު ބުނެވިދާނެއެވެ. ސަބަބުތަކެއްވެސް ހުރުމުންނެވެ. އެއީ އެންޓި ކޮރަޕްޝަން ކޮމިޝަނުން ކުރިއަށް ގެންދިޔަ އެމްއެމްޕީއާރުސީ ތަހުގީގު ބަޔާނުގެ ސަފުހާއެއް ކަމަށް ބުނެ ތޮއްޔިބު މިދިޔަ އޮގަސްޓް މަހު އެކްސްގައި ހިއްސާކުރި މައުލޫމާތާއި ގުޅިގެން އޭސީސީން އެދިގެން ފުލުހުން އެނާ ހާޒިރުކޮށް ބަޔާން ނެގުމެވެ. އަދި އޭސީސީން މިކަން ދޮގުވެސް ނުކުރެއެވެ.

ތޮއްޔިބު ބުނެފައިވަނީ އޭނާ ފުލުހަަށް ހާޒިރުކޮށް ބަޔާން ނެގީ އެ މައްސަލަ އޭސީސީން ފުލުހުންނަށް ހުށަހެޅުމުން ކަމަށެވެ.

ތޮއްޔިބު ލީކު ކުރި ލިޔުމަކީ އޭސީސީގެ އެއްޗެއް ނޫންކަމަށް އޭރު ބުނި ނަމަވެސް، އޭސީސީން ދެއްކި ވާހަކައިގެ ބުރަދަނެއް ނެތެވެ. އޭސީސީގެ ލިޔުމެއް ނޫން ނަމަވެސް އޭސީސީން މި މައްސަލައިގައި ތެޅިފޮޅެންވީ ސަބަބެއްވެސް ނެތެވެ. އޭސީސީން މި މައްސަލައިގައި ލޮލަށް ނިދި ނައިސް މިކަންކަން ފޮރުވަން މަސައްކަތް ކުރާކަމީ މިއަދު ފެންނަން އޮތް ހަގީގަތެކެވެ.