މި ހިނގާ ޖޫން މަހުގެ 14ވަނަ ދުވަހު އަމިއްލައަށް މަރުވި ސުޝާންތް ސިންގް ރާޖްޕުތް އެންމެފަހުން ކުޅުނު ފިލްމް "ދިލް ބޭޗާރާ" އަންނަ މަހު ރިލީޒް ކުރުމަށް ނިންމައިފިއެވެ.
އަންނަ ޖުލައި މަހުގެ 24ގައި މި ފިލްމް ރިލީޒް ކުރުމަށް ހަމަޖެހިފައިވަނީ އޮންލައިންކޮށް ސްޓީރިމިން ޕްލެޓްފޯމެއް ކަމަށް ޑިސްނީ ޕްލަސް ހޮޓްސްޓާއިންނެވެ.
މުކޭޝް ޗާބްރާ ފުރަތަމަ ޑައިރެކްޝަން ކަމަށްވާ "ދިލް ބޭޗާރާ"، ފިލްމަކީ ޖޯން ގްރީންގެ ކިޔުންތެރިންގެ މެދުގައި މަގްބޫލު ވާހަކައެއް ކަމަށްވާ "ދަ ފޯލްޓް އިން އަވަރ ސްޓާރޒް" އަސްލަކަށް ބަލައިގެން ހަދާފައިވާ ފިލްމެކެވެ.
ހެއްވާ މަޖާ އަދި ލޯބީގެ ކަންތައްތަކެއް ދައްކުވައިދޭ މި ފިލްމްގައި ސުޝާންތްއާއި އެކު ލީޑްރޯލުން ފެނިގެންދާނީ ބޮލީވުޑަށް އަލަށް ތަޢާރަފްވެގެންދާ ސަންޖަނާ ސަންގީއެވެ. މީގެ އިތުރުން މި ފިލްމްގައި ސައިފް އަލީ ޚާން ފެނިގެންދާނެއެވެ.
ސުޝާންތްގެ ކުއްލި މަރާއި ގުޅިގެން ސަންޖަނާ އޭނާގެ އިންސްޓަގްރާމްގައި ހިއްސާކޮށްފައިވާ ޕޯސްޓެއްގައި މި ފިލްމަކީ އެންމެންނަށް ދޭ ހަދިޔާއެއް ކަމަށް ވަނީ ބުނެފައެވެ. މިފިލް އެންމެންނަށް ވެސް ހިލޭ ބަލައިލެވޭނެ ކަމަށް ވަނީ ބުނެފައެވެ.
