މުމްބާއީގެ ފުލުހުންނަށް، ބޮލީވުޑްގެ ތަރި ފަރްހާން އަޚްތަރު 1000 ޕާސަނަލް ޕްރޮޓެކްޓިވް އިކުއިޕްމެންޓް (ޕީީޕީއީ) ހަދިޔާކޮށްފި އެވެ.
ފަރްހާން ބުނީ، ފުލުހުންނަށް ޕީޕީއީ ހަދިޔާކުރީ ކޮވިޑް-19 އާ ދެކޮޅަށް ފުލުހުން ކުރާ މަސައްކަތުގައި އެމީހުންގެ ރައްކާތެރިކަން ކަށަވަރުކޮށް ދިނުމަށް ކަމަށެވެ. ފުރަތަމަ ބެޗްގެ ޕީޕީއީ ސެޓްތައް ހަދިޔާކޮށްފައި ވަނީ މުމްބާއީގެ ވަކޮލާ ޕޮލިސް ސްޓޭޝަނަށެވެ. އެހެން މީހުންވެސް އޭނާ ފަދައިން ތަކެތި ހަދިޔާ ކުރުމަށް ފަރްހާން ވަނީ ބާރު އަޅާފަ އެވެ.
އިންޑިއާގައި ކޮވިޑް ފެތުރެމުން ދާތީ ބޮލީވުޑްގެ ތަރިންތައް ދަނީ އެހީތެރިކަން ފޯރުކޮށްދެމުންނެވެ. މި ވަގުތު ބޮލީވުޑްގެ މަސައްކަތްވެސް އޮތީ މަޑުޖެހިފަ އެވެ.
ފަރްހާން އަޚްތަރުގެ ފިލްމީ ދާއިރާގެ މަސައްކަތްތަކަށް ބަލާލާއިރު އޭނާ ދެން އެންމެ އަވަހަށް ފެންނާނީ އޯމް ޕްރަކާޝްގެ ''ޓޫފާން'' ފިލްމުންނެވެ. އެ ފިލްމުގައި އޭނާ ފެނިގެން ދާނީ ބޮކްސަރެއްގެ ރޯލުންނެވެ. މި ފިލްމު ކުރިން ރިލީޒް ކުރަން އޮތީ ސެޕްޓެންބަރު މަހުގެ 18 ވަނަ ދުވަހުއެވެ. އެކަމަކު އިންޑިއާގެ ފުރަބަންދާ އެކު ފިލްމު ރިލީޒް ކުރާ ތާރީޚު ލަސްވާނެ ކަމަށް ބެލެވެއެވެ.
