ޓީޗަރުންގެ މުސާރަ ބޮޑު ކުރުމަށްޓަކައި މުސާރައިގެ އޮނިގަނޑަށް ބަދަލު ގެންނަވައިފި ކަމަށާއި، އެކަން ވަރަށް އަވަހަށް އިއުލާނު ކުރައްވާނެ ކަމަށް އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވެއްޖެއެވެ.
ބުރާސްފަތި ދުވަހު އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ، ޓީޗަރުންނަށް ލިބޭ އުޖޫރަ ބޮޑު ކުރުމަކީ ރައީސް ސޯލިހުގެ ރިޔާސީ ވައުދުފުޅެއް ކަމަށާއި، އެކަމަށްޓަކައި ރައީސް އޮފީހާއި މަޝްވަރާކޮށް މުސާރައިގެ އޮނިގަނޑަށް ބަދަލުގެނެވިފައިވާ ކަމަށެވެ.
އަދި އެކަން ވަރަށް އަވަހަށް އިއުލާނު ކުރައްވާނެ ކަމަށްވެސް މިނިސްޓަރ ވިދާޅުވިއެވެ.
ރައީސް އޮފީހާ ގުޅިގެން އޮނިގަނޑުތަކަށް ބަދަލުތަކެއް އަޅުގަނޑުމެން ގެނެސްފިން، އެއީ މުދައްރިސުންގެ މުސާރަ ބޮޑު ކުރުމަށްޓަކައި، އަދި އޯވަރޓައިމްވެސް އަޅުގަނޑުމެންނަށް ގެނެވޭނެ ހެޔޮ ބަދަލުތައް މިދަނީ މަޝްވަރާކުރަމުން، އަދި ހަމަ ވަރަށް އަވަސް މުއްދަތެއްގެ ތެރޭގައި މިކަން އަޅުގަނޑުމެން އިއުލާނު ކުރާނަން، އަދި ހަމަ އޭގެ އިތުރުން އެހެނިހެން އިނާޔަތްތައް މުދައްރިސުންނަށް ހޯދައިދިނުމަށްވެސް އެބަ މަސައްކަތް ކުރަންއެޑިއުކޭޝަން މިނިސްޓަރ ޑރ. އާއިޝަތު އަލީ
މިނިސްޓަރ އިތުރަށް ވިދާޅުވީ، ކިޔަވައިދިނުމުގެ ދާއިރާއަށް ޝައުޤުވެރިވާ ކުދިން މަދުވާކަން ފާހަގަކުރެވިފައިވާ ކަމަށާއި، އެހެން ދިމާވާ އެއް ސަބަބަކީވެސް ޓީޗަރުން ކުރާ މަސައްކަތަށް އެކަށީގެންވާ އުޖޫރައެއް ނުލިބުން ކަމަށެވެ. އެގޮތުން ކުރިއަށް އޮތް ތާނގައި ޓީޗިނގް ދާއިރާއިން ކުރިއަށްދާން ބޭނުންވާ ކުދިންނަށް ޝައުޤުވެރިވާނެ ފަދަ އިނާޔަތްތަކެއް ކަނޑައެޅުމުގެ މަސައްކަތް ކުރައްވަމުންދާ ކަމަށް މިނިސްޓަރ ވިދާޅުވިއެވެ.
މިދާއިރާއަށް ޝައުޤުވެރިވާ ކުދިން ވަރަށް މަދުއެބަވޭ، ޝައުޤުވެރިކަން ދަށްވަނީ ހަޤީޤަތުގައި އެޓްރެކްޓިވް ޕެކޭޖެއް އަޅުގަނޑުމެންނަށް އޮފަރ ނުކުރެވޭތީ، އެހެންވީމާ އަޅުގަނޑުމެންގެ ހަމަ މިނިސްޓްރީގެ މައިގަނޑު އެއް ވިސްނުން އެއީ ޓީޗިންގ މިއީ އެޓްރެކްޓިވް ޕްރޮފެޝަނަކަށް ހެދުން، އެމަގަށް ވިސްނާފައި ހަޤީޤަތުގައި އަޅުގަނޑުމެން ޓީޗަރުންގެ އިނާޔަތްތައް ރަނގަޅު ކުރުމާއި މުސާރަ ރަނގަޅު ކުރުމާ މިކަންކަމަށް މި އެންފޯސް ކުރަނީއެޑިއުކޭޝަން މިނިސްޓަރ ޑރ. އާއިޝަތު އަލީ
ޓީޗަރުންގެ މުސާރަ ބޮޑުކޮށް ، ޓީޗަރުންނަށްދޭ އިނާޔަތްތައް ފަހި ކުރުމުގެ މަސައްކަތް މިނިސްޓްރީން ކުރަމުންދާއިރު، ސުކޫލު ތަކުގައި ކިޔަވައިދޭ އުސޫލަށްވެސް ބޮޑެތި ބަދަލުތަކެއް ގެނައުމަށް މިނިސްޓްރީން ދަނީ ވިސްނަމުންނެވެ. އެގޮތުން މިނިސްޓްރީން ބުނީ، މުސާރައާއި އުޖޫރަ އިތުރު ކުރުމުގެ އިތުރުންވެސް ކިޔަވައި ދިނުމުގެ ދާއިރާއަށް ކުދިން ޝައުޤުވެރި ކުރުވުމަށް މުސްތަޤުބަލުގައި ގިނަ ކަންކަން ރާވާފައިވާ ކަމަށެވެ.
