ދިވެހި ރައްޔިތުންގެ ޕާޓީ (ޑީއާރްޕީ)އަށް 3000 މެންބަރުން ހަމަކޮށްފިއެވެ.
ޑީއާރްޕީއަށް މެންބަރުން ހަމަވިކަމަށް އަންގާ އިލެކްޝަންސް ކޮމިޝަނުން ވަނީ ބުދަ ދުވަހު އެ ޕާރޓީއަށް ސިޓީއެއް ފޮނުވާފައެވެ.
މޫކައި ހޮޓަލްގައި އެ ޕާޓީގެ ފަރާތުން ބޭއްވި ޕްރެސް ކޮންފަރެންސް އެއްގައި ވާހަކަ ދައްކަވަމުން އެ ޕާޓީގެ ރައީސް އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުއްﷲ ޖާބިރު ވަނީ އަހަރު ނިމިގެންދާއިރު ފާޓީގެ އަމާޒަކީ ރާއްޖޭގައި ދެވަަނައަށް އެންމެ މެންބަރުން ގިނަ ޕާޓީއަށް ވުން ކަމަށް ވިދާޅުވެފައެވެ. އަދި 2023 ވަނަ އަހަރުގެ ރިޔާސީ އިންތިހާބާ ހަމައަށް ދާއިރު ޕާޓީގައި 80000 މެންބަރުން ރަޖިސްޓްރީ ކުރުމަށް މަސައްކަތް ކުރާނެ ކަމަށް އެ މަނިކުފާނު ވިދާޅުވިއެވެ.
އެ މަނިކުފާނު އިތުރަށް ވިދާޅުވީ ޑީއާރްޕީ ވެގެންދާނީ ސަރުކާރު ޒިންމާދާރު ކުރުވާ ފުރިހަމަ އިދިކޮޅު ސިޔާސީ ޕާޓީއަށް ކަމުގައެވެ. މިހާރުވެސް ރައްޔިތުންގެ މަޖީލީހުގެ ތެރޭގައި ޑީއާރްޕީ ތަމްސީލުކުރަމުން ދާކަމަށް ވިދާޅުވެ އެ މަނިކުފާނު ވިދާޅުވީ މަޖިލީހުގެ ތެރެއިން އަށްވަރަކަށް އަމިއްލަ މެންބަރުން މިހާރު ވެސް ޑީއަރްޕީއާ ގުޅުމުގެ ވާހަކަ ދައްކާވާފައިވާކަމަށެވެ.
ޖާބިރު ވަނީ މި ބައްދަލުވުމުގައި 2023 ވަނަ އަހަރުގެ ރިޔާސީ އިންތިހާބަށް ޑީއާރްޕީގެ ފަރާތުން ކެނޑިޑޭޓަކު ނެރޭނެ ކަމަށްވެސް ވިދާޅުވެފައެވެ.
ދެން އަޅުގަނޑެއް ނުހުއްޓާނަން. އަޅުގަނޑު ދާގޮތަށް ގޮސް އިރާދަ ކުރެއްވިއްޔާ 2023 ވަނަ އަހަރުގެ ރާއްޖޭގެ އިންތިހާބަށް ޑީއާރްޕީ އިން ބޭފުޅަކު ނެރޭނަން. އެއީ ކޮން ބޭފުޅެއްތޯ ނިިންމާނީ ޑީއާރްޕީގެ އިއްޒަތްތެރި ލޮބުވެތި މެންބަރުން،ޑީއާރްޕީގެ ރައީސް އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުއްﷲ ޖާބިރު
ޑީއާރްޕީއަށް މެންބަރުން އިތުރުކޮށް ޕާޓީ ޕްރޮމޯޓް ކުރުމުގެ ގޮތުން ބުރާސްފަތި ދުވަހު ސައިކަލު ބުރެއް ޖެހުމަށް ވަނީ ހަމަޖެހިފައެވެ.
ޕާޓީގެ ސެކްރެޓަރީޖެނެރަލް ނަހުލާ އަލީ ވިދާޅުވީ ސައިކަލް ބުރުގެ ހަރަކާތްތައް ކުރިއަށް ދާނީ ބުރާސްފަތި ދުވަހު ހަވީރު ހަތަރަކުން ހަޔަކަށް ކަމުގައެވެ. 4:00 އިން 5:00 އަށް ކުރިއަށް ދާނީ ޕާޓީގެ މެންބާރޝިޕް ފޯމް ފުރުމުގެ މަސައްކަތް ކަމަށާއި ސައިކަލް ބުރު ކުރިއަށް ދާނީ 5:00 އިން 6:00 އަށް ކަމަށް ނަހުލާ ވިދާޅުވިއެވެ.
މި ބައްދަލުވުމުގައި ޕާޓީގެ ރެޖިސްޓްރާ އަދި ރައްޔިތުންގެ މަޖިލީހުގެ މާފަންނު ދެކުނު ދާއިރާގެ ކުރީގެ މެންބަރު އަބްދުއްﷲ ރިފާއު ވަނީ ޑީއާރްޕީގެ ފަރާތުން އެ ޕާޓީގެ މެންބަރުންނަށް ހާއްސަކޮށްގެން އައިއޯއެސް އަދި އެންޑްރޮއިޑް ފޯނުތަކަށް ހާއްސަ މޯބައިލް އެޕެއް ތައްޔާރު ކުރުމުގެ މަސަައްކަތް ކުރަމުން ދާކަމަށް ވިދާޅުވެފައެވެ. އަދި އަވަަސް މުސްތަގްބަލެއްގައި ޕާރޓީގެ އޮފިޝަލް ވެބްސައިޓް ވެސް ލޯންޗް ކުރެވިގެން ދާނެ ކަމަށް ރިފާއު ވިދާޅުވިއެވެ.
ޑީއާރްޕީގެ މެންބަރުންނަށް ހާއްސަ މެންބަރޝިޕް ކާޑުތަކެއް ވެސް ދިނުމަށް ހަމަޖެހިފައިވާކަމަށް ރިފާއު ވިދާޅުވިއެވެ.
ޑީއަރްޕީގެ ރައީސް ކަމަށް އަބްދުއްﷲ ޖާބިރު ހަވާލުވުމަށް ފަހު ބޭއްވުނު އެންމެ ފުރަތަމަ ޕްރެސް ކޮންފަރެންސްގައި ވާހަކަ ދައްކަވަމުން އެ މަނިކުފާނުވަނީ ޑީއާރްޕީ އަކީ ޕާޓީގެ މެންބަރުންނާ ގުޅިގެން ހިންގާނެ ޕާޓީއެއް ކަމަށް ވިދާޅުވެފައެވެ. މި ޕާޓީ އަކީ އެއްވެސް ބޭފުޅެއްގެ އާއިލީ ޕާޓީ އެއް ނޫންކަމަށް ވިދާޅުވެ ޕާޓީގެ މަގާމްތަކަށް ކުރިމަތިލުމުގެ ފުރުސަތު ޕާޓީގެ ކޮންމެ މެންބަރަކަށް ވެސް އޮތްކަން އެމަނިކުފާނު ފާހަގަ ކުރެއްވިއެވެ.
