އާބާދީގައި 1200 މީހުން ވެސް ހަމަ ނުވާ މާލެ އަތޮޅު ހުރާ ކައުންސިލަކީ އެ ރަށުގެ ރައްޔިތުންނަށް ބޭނުންވާ ހިދުމަތްތަށް ފޯރުކޮށްދިނުމުގައި ނަމޫނާ ކައުންސިލެކޭ ބުނެގެންވެސް ފަރު ޖައްސާލެވޭކަށް ނެތެވެ. އެހެނީ މި ރަށުގައި ފޯރުކޮށްދޭ ހުރިހާ އަސާސީ ޚިދުމަތްތަކެއް ފޯރުކޮށްދެނީ އެ ރަށު ކައުންސިލުންނެވެ. ކަރަންޓާއި ފެނާ އަދި ނަރުދަމާގެ ޚިދުމަތް ވެސް ފޯރުކޮށްދެނީ ހަމަ އެ ރަށު ކައުންސިލުންނެވެ. ރަށުގެ ޕްރީސްކޫލް ހިންގަނީވެސް ހަމަ އެ ކައުންސިލުންނެވެ.

ހުރާ ކައުންސިލުން މި ހުރިހާ ޚިދުމަތްތަކެއްވެސް ރަށަށް ފޯރުކޮށްދެނީ އެ ރަށު ކައުންސިލަށް ވަންނަ އާމްދަނީގެ އިތުރުން ސަރުކާރުން ފޯރުކޮށްދޭ ބަޖެޓުގެވެސް އެހީގައެވެ. އެހެން ކައުންސިލްތަކާއި ތަފާތުވާ އެންމެ ބޮޑު އެއް ކަމަކީ، ސަރުކާރުން ހަމަޖައްސައިދޭ ބަޖެޓުގެ އިތުރަށް، ކައުންސިލަށް ލިބޭ އާމްދަނީންވެސް ކަންކަމަށް އިތުރަށް ޚަރަދުކޮށްގެންވެސް ކަންކަން ކުރަން ތައްޔާރަށް ތިބުމެވެ. ރާއްޖެއެމްވީއަށް މައުލޫމާތު ދެމުން ހުރާ ކައުންސިލްގެ ނައިބު ރައީސް ފަޔާޒް އިބްރާހިމް ވިދާޅުވީ އެއްވެސް ކަމެއްގައި ސަރުކާރުން ހުރިހާ ޚަރަދެއް ކުރުމުގެ ބަދަލުގައި، އެ ކައުންސިލުން މަސައްކަތް ކުރަމުން އަންނަނީ ކައުންސިލަށް ލިބޭ އާމްދަނީވެސް އޭގައި ހިމަނައިގެން ސަރުކާރުގެ އެއްބާރުލުމާއި އެކީ ޕްރޮޖެކްޓުތައް ހިންގުމަށެވެ.

"އަޅުގަނޑުމެން މި ކުރާ ކަންތައްތަކުގައި އެއް ފަހަރުވެސް ސަރުކާރަކަށް ނުދައްނަވަން މުޅި ޕްރޮޖެކްޓް ހިންގައިދޭށޭ. އަޅުގަނޑުމެން ކައުންސިލުން (ބޭނުންވަނީ) ކޮންމެ ކަމެއް ކުރާ އިރުވެސް (ސަރުކާރުން) އެހީތެރިކަމެއް ފޯރުކޮށްދޭށޭ" ފަޔާޒް ވިދާޅުވިއެވެ. 

ހުރާގެ ނަރުދަމާގެ ޚިދުމަތަށް ބަލާލާ އިރު ކައުންސިލުން އެ ޚިދުމަތްތައް ފޯރުކޮށްދީފައިވަނީ، ހުރާއާއި އެއް ފަޅެއްގެ ތެރޭގައި އޮންނަ ފޯ ސީޒަންސް ކުޑަ ހުރާގެ އެކޮމޮޑޭޝަން ބްލޮކްއަށް ދޫކޮށްފައިވާ ބިމުން އެޑްވާންސްގެ ގޮތުގައި ކައުންސިލުން ނެގި 15 މިލިއަން ރުފިޔާއިންނެވެ. ފަޔާޒް ވިދާޅުވީ އެ ފައިސާއިން ކައުންސިލުން ނަރުދަމާ އަޅަން ނިންމީ އޭރު އެ ރަށުގެ 160 ގެއަކަށް ނަރުދަމާގެ ޚިދުމަތް ނުލިބި އޮތުމުން ކަމަށެވެ. ފަހުން ސަރުކާރުން އެ ޕްރޮޖެކްޓަށް ހަރަދު ކުރި ފައިސާގެ ތެރެއިން 7.8 މިލިއަން ރުފިޔާ ދިންކަމުގައިވީ ނަމަވެސް، ފާހަގަކޮށްލަން ޖެހޭ ކަމަކީ އެ ރަށު ކައުންސިލުން މި މަސައްކަތް ފެށީ އަމިއްލަ އިސްނެގުމުގައި ކަމެވެ.

ހުރާ އިންޖީނު ގެ އެ ރަށު ކައުންސިލުން ހިންގާ އިރު، އިންޖީނުގެ ހިންގައިގެން ލިބޭ ފައިދާއިން ރަށު ކައުންސިލުން ކުރަމުންދާ މަސައްކަތަކީ އެ ރަށުގެ ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތެވެ. އެ ގޮތުން މިހާރުވެސް އެ ރަށުގައި ކުރީގައި ހުރި ކަރަންޓު ކޭބަލްތައް ބަދަލުކުރުމުގެ މަސައްކަތް އެ ރަށު ކައުންސިލުން ދަނީ ކުރަމުންނެވެ. އަދި ސަރުކާރުގެ 50 އިންސައްތަ އެހީއާއި އެކު ހަމަ އެ ކައުންސިލުން ދަނީ އާ ޖަނަރޭޓަރެއް ގަތުމުގެ މަސައްކަތް ކުރަމުންނެވެ. މި ހުރިހާ ކަމަކަށް ޖުމުލަ 9.7 މިލިއަން ރުފިޔާ ހަރަދުވާއިރު، ސަރުކާރުގެ ބަޖެޓުން މި ކަމަށް ހަރަދުކުރަނީ އެންމެ 2.5 މިލިއަން ރުފިޔާއެވެ. ރާއްޖެއެމްވީއަށް މައުލޫމާތު ދެއްވަމުން އެ ރަށު އިންޖީނުގެ ހިންގުމާއި ހަވާލުވެގެން ހުންނެވި އަބްދުﷲ ނާޒިމް ވިދާޅުވީ މިހާރު ކުރިއަށްދާ ކަރަންޓް ޚިދުމަތް ތަރައްގީ ކުރުމުގެ 3 ވަނަ ފޭސް ނިމުމުން ރަށުގައި ހުރި ގޭބިސީތަކާއި، ގެސްޓްހައުސްތަކާއި އެހެނިހެން ވިޔަފާރިތަކަށް ކަރަންޓު ފޯރުވައިދިނުމުގައި އެއްވެސް ދަތިތަކެއް ކުރިމަތި ނުވާނެ ކަމަށެވެ.

މީގެ އިތުރުން، ހުރާ ކައުންސިލުން ވަނީ ރަށުގައި އަޅާފައި ހުރި ފުޓްސަލް ދަނޑު އިތުރަށް ބޮޑު ކުރުމަށް 1.5 މިލިއަން ރުފިޔާ ޚަރަދުކޮށްފައެވެ. އެ ރަށު ޕްރީ ސްކޫލްވެސް ހިންގަނީ ހަމަ ހުރާ ކައުންސިލުންނެވެ. އަދި މިހާރު ހުރާ ކައުންސިލުން ދަނީ ކުރީގެ ނައިބު ރައީސް އަދި މަޝްހޫރު ވިޔަފާރިވެރިޔާ މުޙައްމަދު ވަހީދުއްދީންގެ ދީލަތި އެހީއާއި އެކު ޒުވާނުން ކަސްރަތު ކުރުމަށް ހަދާފައިވާ ޖިމެއް ވެސް ހުޅުވުމުގެ މަސައްކަތް ކުރަމުންނެވެ. މިހެން ގޮސް އެތައް އެތައް ކަމެއް ކުރިއަށް އޮތް ތަނުގައިވެސް ރައްޔިތުންގެ މަންފާއާއި ލާބައަށްޓަކައި ކައުންސިލުން ރާވާފައިވާކަމަށް ކައުންސިލުގެ ނައިބު ރައީސް ފަޔާޒް ވިދާޅުވިއެވެ.

ލާމަރުކަޒީ ނިޒާމެއްގެ ދަށުން ރައްޔިތުންނަށް ޚިދުމަތް ފޯރުކޮށްދޭން އިންތިހާބު ކޮށްފައިވާ ކައުންސިލުން މި ދަނީ ރައްޔިތުންނަށް ޚިދުމަތް ފޯރުކޮށްދިނުމުގައި އެހެން ކައުންސިލްތަކަށް މިސާލު ދައްކަމުންނެވެ. ވިޔަފާރިތަކަށް ދޫކޮށްފައިވާ ބިންތަކާއި އިންޖީނުގެ ހިންގައިގެން ލިބޭ އާމްދަނީން މުޅި ރަށް ހިންގާއިރު، ރައްޔިތުންނަށް ޚިދުމަތް ފޯރުވައިދިނުމުގައި ކ.ހުރާ ކައުންސިލް ވަރެއް ހަމަ ނެތެވެ.