ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް، ފުލުހުންގެ ދައުރު އަދާކުރުމަށް ދަތިކުރުމުގެ ކުށް ސާބިތްވާ ކަމަށް ކްރިމިނަލް ކޯޓުން ނިންމާ އެހުކުމް ތަންފީޒުކޮށް ނިމުނު އިރު ވެސް، މަހުލޫފްގެ ފަރާތުން ހައިކޯޓަށް ހުށަހެޅި އިސްތިއުނާފުގެ މައްސަލަ ކޯޓުގައި ކުރިއަކަށް ނުދާތީ އާއިލާ އިން ކަންބޮޑުވުން ފާޅުކޮށްފިއެވެ.
މަހްލޫފްގެ އާއިލާއިން ބުނީ މަހުލޫފްގެ ފަރާތުން ހައިކޯޓަށް ހުށަހެޅި އިސްތިއުނާފްގެ މައްސަލަ ކުރިއަށް ނުގޮސް ހުއްޓިފައި އޮންނަތާ އެތައް ދުވަހެއް ވެފައިވާއިރު، މަހްލޫފްގެ މައްޗަށް ކޮށްފައިވާ ހަ މަސްދުވަހުގެ ޖަލު ހުކުމް މި ޖެނުއަރީ މަހުގެ 17 ވަނަ ދުވަހު ހަމަވެފައިވާ ކަމަށެވެ. އަދި އެ މައުލޫމާތު ހިމެނޭ ލިޔުމެއް މޯލްޑިވްސް ކަރެކްޝަނަލް ސާރވިސްއިން ދީފައިވާ ކަމަށް ވެސް މަހްލޫފްގެ އަނބިކަނބަލުން ނަޒުރާ ނަސީމް ވިދާޅުވި އެވެ.
އެލިޔުމުގައި ވާގޮތުން ޖަލުގައި މަހުލޫފް މިހާރު ތަންފީޒު ކުރަމުން ގެންދަނީ އަމުރަށް ނުކިޔަމަންތެރިވުމުގެ ކުށް ސާބިތުކޮށް ކްރިމިނަލް ކޯޓުން ކުރި ހުކުމެވެ. އެއީ ހަތަރު މަހާއި 24 ދުވަހުގެ ހުކުމެކެވެ. އެހުކުމް ތަންފީޒުކޮށް ނިމެނީ އަންނަ ޖޫން މަހުގެ 6 ވަނަ ދުވަހަށެވެ.
ހައިކޯޓަށް ހުށަހަޅާފައިވާ މައްސަލަތައް ހުއްޓިފައިވާތީ މަހްލޫފްގެ އާއިލާއިން ބުނީ އެކަމަށް ވަރަށް ބޮޑަށް ކަންބޮޑުވާ ކަމަށެވެ. އަދި މަހްލޫފަށް ލިބެންޖެހޭ ހައްގުތަކާ ގުޅޭ ދެ މައްސަލައެއް ހިއުމަން ރައިޓް ކޮމިޝަން އޮފްދަ މޯލްޑިވްސް (އެޗްއާރުސީއެމް)އަށް ވެސް ހުށަހަޅާފައިވާއިރު އެދެ މައްސަލައާމެދު މިހާތަނަށް އެކޮމިޝަނުން ގޮތެއް ނިންމާފައިނުވާ ކަމަށް ވެސް މަހްލޫފްގެ އާއިލާއިން ބުނެއެވެ.
މަހްލޫފްގެ މައްޗަށް ހިންގާފައިވާ އެ ދެ ޝަރީއަތާއި ކޯޓުން ކޮށްފައިވާ އެ ދެ ހުކުމް މަހްލޫފްގެ ފަރާތުން ވަނީ ޔޫއެން، ވޯރކިންގ ގްރޫޕް އޮން އަރބިޓްރަރީ ޑިޓެންޝަނަށް ހުށަހަޅާފަ އެވެ.
