ރޮކްސްޓާއެއްގެ ގޮތުގައި މޯލްޑިވިއަން އައިޑޮލްގެ ފުރަތަމަ ސީޒަނުން ވިދާލި މުހައްމަދު މުއައްޒިންގެ ފުރަތަމަ އަލްބަމް "ރެދަން" މިދިޔަމަހުގެ 19 ވަނަ ދުވަހު ރިލީޒްކޮށްފައިވާއިރު އެ އަލްބަމަށް އެހުންތެރިން ފަރާތުން ބޮޑު ތަރުހީބެއް ލިބެމުންދާ ކަމަށް އޭނާ ބުނެފިއެވެ.
ރާއްޖެ ޓީވީގެ "ކުލަ ސްކްރީން" ޕްރޮގްރާމަށް ދިން އިންޓަވިއުގައި މުއައްޒިން ބުނެފައިވަނީ އަމިއްލަ ރާގުގެ ހަ ލަވަ ހިމެނޭ މި އަލްބަމްގެ ލަވަތައް ލަވަފޮށިން އަޑު އަހައިލެވޭނެ ކަމަށެވެ. މި އަލްބަމްގައި ރޮކް ލަވަތަކުގެ އިތުރުން އެހެން ޖޮންރާތަކުގެ ލަވަތައް ވެސް ހިމެނޭނެ ކަމަށް މުއައްޒިން ބުންޏެވެ.
ލޯބީގެ ލަވަތަކުގެ އިތުރުން މުޖުތަމައުގައި ހިނގާ ބައެއް ކަންތައްތައް އަދި މުއައްޒިންގެ އަމިއްލަ ދިރިއުޅުމުގައި ދިމާވެފައިވާ ކަންތައްތަކުގެ މައްޗަށް ބިނާކޮށް ހަދާފައިވާ ލަވަތައް މި އަލްބަމްގައި ހިމެނޭނެ ކަމަށް މުއައްޒިން ބުޏެވެ.
މި އަލްބަމްގައި ހިމެނޭ ލަވަތަކުގެ ވީޑިއޯ މަހެއްހާ ދުވަހުގެ ތެރޭގައި ނެރެވޭނެ ކަމަށް މުއައްޒިން ބުންޏެވެ.
މީގެ ކުރިން މުއައްޒިން ރިލީޒްކޮށްފައިވާ "ލޭކޮކާ" އަކީ ވެސް އެ އަލްބަމްގެ ލަވަ އެއްކަމަށް މުއައްޒިން ބުންޏެވެ.
