ތަހްރީކީ ތާލިބާން ޕާކިސްތާނުގެ ވެރިޔާ މުއްލާ ފަޒްލުﷲގެ ފިރެހެން ދަރި އާއި ޕާކިސްތާނުގެ ތާލިބާނުންގެ 20 މީހުން އެމެރިކާ އިން ދިން ޑްރޯން ހަމަލާއެއްގައި މަރާލައިފި ކަމަށް ތާލިބާނުންގެ ބަޔާނެއްގައި ބުނެފިއެވެ.

އިރުއުތުރުގެ ކުނާރް ޕްރޮވިންސްގައި އަބްދުﷲ ވެސް ހިމެނޭ ގޮތުން މި ހަނގުރާމަވެރިން މަރާލާފައިވަނީ، ތަހްރީކީ ތާލިބާން ޕާކިސްތާން (ޓީޕީޕީ)ގެ ކޭމްޕަކަށް ބުދަ ދުވަހު ދިން ހަމަލާގައި ކަމަށް އެ ޖަމާއަތުގެ ބަޔާނުގައި ބުނެފައިވެއެވެ.

އެ ބަޔާންވަނީ ޕާކިސްތާނުގެ ބަޖައުރު ޑިސްޓްރިކްޓްގެ ނޫސްވެރިންނަށް ފޮނުވާފައެެވެ.

ބަޔާނުގައި ބުނެފައިވާ ގޮތުގައި ހަނގުރާމަވެރިންގެ ފިދާއީން، ނުވަތަ ޖާނުން ފިދާވާ 20 މީހަކު މަރުވެފައިވާއިރު އިތުރު ހަ ހަނގުރާމަވެރިޔަކު ވަނީ ޒަޚަމްވެފައެވެ.

ޓީޓީޕީގެ ކޮމާންޑަރު ގުލް މުހައްމަދާއި ފިދާއީން ތަމްރީނުކުރާ ޔާސީން ވެސް މި ހަމަލާގައި މަރުވެފައިވާ ކަމަށް ޕާކިސްތާނުގެ ޑޯން ނޫހުންބުނެއެވެ.

އެމެރިކާ އާއި އަފްޣާނިސްތާނުގެ ފައުޖުތަކުން ޓީޓީޕީގެ ހަނގުރާމަވެރިންނަށް އަމާޒުކޮށް އެކަށީގެންވާ މަސައްކަތްތަކެއް ނުކުރާ ކަމަށް ޕާކިސްތާނުން އާއްމުކޮށް ތުހުމަތުކުރެއެވެ.