އެމެރިކާގެ ރައީސް ޑޮނަލްޑް ޓްރަމްޕްގެ އެންމެ އިސް އިގްތިސާދީ މުޝީރު ގެރީ ކޯން އިސްތިއުފާ ދެއްވައިފިއެވެ.
އެމެރިކާއަށް އެތެރެކުރާ އެލުމެނިއަމާއި ދަގަނޑުން ޓެރިފެއް ނަގަން ރައީސް ޓްރަމްޕް ނިންމަވާފައިވާ ނިންމުމާ މެދު، މިނިވަން ވިޔަފާރިއަށް ތާއީދުކުރައްވާ ކޯން ހިތްޕުޅު ހަމަޖެހިވަޑައިނުގެން ހުންނެވި ކަމަށް ވަނީ ޚަބަރުތައް ފެތުރިފައެވެ.
ވައިޓް ހައުސް އިން ނެރެފައިވާ ބަޔާނެއްގައި ކޯން ވިދާޅުވެފައި ވަނީ ގައުމު ސަލާމަތްކޮށްދެވުމަކީ ޝަރަފެއް ކަމުގައި ދެކެވަޑައިގަންނަވާ ކަމަށެވެ.
ރައީސް ޓްރަމްޕްގެ ޓެކްސް ސިޔާސަތު ތަންފީޒުކޮށްދެއްވުމަށް މިދިޔަ އަހަރު ފަހުކޮޅު ބުރަ މަސައްކަތްޕުޅުތަކެއް ކުރައްވާފައިވާ އުމުރުފުޅުން 57 އަހަރުގެ ކޯން އާއި ރައީސް ޓްރަމްޕްގެ ގުޅުން ރަނގަޅު ކަމަށް ނުބެލެވޭ ކަމަށް ރިޕޯޓްތައް ބުނެއެވެ.
