ފަލަސްތީނުގެ ރެފިއުޖީންނާއި ބެހޭ އދގެ އިދާރާއަށް ދޭ ބަޖެޓް ކުޑަކުރުމާއި ދެކޮޅަށް އެ އިދާރާގެ އެތައްހާސް ޔޫނިއަން މަސައްކަތްތެރިން މުޒާހަރާކޮށްފިއެވެ.

އެ މީހުންގެ ކަންބޮޑުވުމަކީ ބަޖެޓް ކަނޑާލުމުން ޚިދުމަތްތައް ހުއްޓި އަދި ޚިދުމަތްތައް ހުއްޓާލުމުން ޔޫއެންއާރްޑަބްލިއުއޭގެ އެ ސަރަހައްދުގެ އެތައްހާސް މުވައްޒަފުންނެއްގެ ކޮންޓްރެކްޓް އުވިގެން ދިއުމެވެ.

މިކަން ހިނގާފައި މިވަނީ އެ އޭޖެންސީއަށް އެމެރިކާއިން ދޭ އެތައް މިލިއަން ޑޮލަރެއްގެ އެހީ ކަނޑާލުމަށް ނިންމުމާއިއެކުއެވެ.

އެމެރިކާގެ ސްޓޭޓް ޑިޕާޓްމަންޓުން ވަނީ އެމެރިކާއިން ފަލަސްތީނުގެ ރެފިއުޖީންނަށް ދިނުމަށް ކަނޑައަޅާފައިވާ 125 މިލިއަން ޑޮލަރުގެ ގެ ތެރެއިން 65 މިލިއަން ޑޮލަރު ނުދީ ހިފަހައްޓާނެ ކަމަށް ޔުނައިޓެޑް ނޭޝަންސް ރިލީފް އެންޑް ވާރކްސް އެޖެންސީ (ޔޫއެންއާރުޑަބްލިޔުއޭ) އަށް އެންގުމަށް ނިންމާފައެވެ.

ލުބްނާން އާއި ސީރިއާ، އުރުދުން، ގާޒާ އަދި ހުޅަނގު އައްސޭރީގައި ދިރިއުޅެމުންދާ ފަލަސްތީނުގެ ރެފިއުޖީންނަށް އިޖްތިމާއީ، ތައުލީމީ، އަދި ސިއްހީ ޚިދުމަތްތައް ފޯރު ކޮށްދިނުމުގައި އިސްކޮށް ހަރަކާތްތެރި ވަމުން ދަނީ ޔޫއެންއާރުޑަބްލިޔުއޭ އެވެ.

އެހީގެ ގޮތުގައި ދިނުމަށް ކަނޑައަޅާފައިވާ ފައިސާ އިން 65 މިލިއަން ޑޮލަރު ހިފެހެއްޓި ނަމަވެސް އެމެރިކާ އިން ބުނެފައިވަނީ ކުރިން ދިނުމަށް ކަނޑައަޅާފައިވާ ފައިސާގެ ތެރެއިން 60 މިލިއަން ޑޮލަރު ޔޫއެންއާރުޑަބްލިޔުއޭ ގެ މަސައްކަތައް ހުއްޓުނަ ނުދިނުމުގެ ގޮތުން ދޭނެ ކަމަށެވެ.

ޔޫއެންއާރުޑަބްލިޔުއޭ ގެ އަހަރީ ބަޖެޓް ގެ 30 އިން ސައްތަ އަކީ އެމެރިކާ އިން ދޭ އެހީއެވެ.