ޔުނައިޓެޑް ޢަރަބް އެމިރޭޓްސް (ޔޫއޭއީ)އިން ވާގިވެރިވާ ހަނގުރާމަވެރިން ދެކުނު ޔަމަނުގައި ބަޣާވާތްކޮށްފިއެވެ.

އާދިއްތަ ދުވަހު ނެރުއްވި ބަޔާނެއްގައި ޔަމަނުގެ ބޮޑުވަޒީރު އަޙުމަދު ބިން ދަޣަރް ވިދާޅުވީ ބަނދަރުމަތީ ރަށެއް ކަމަށްވާ ޢަދަނުގައި ހުރި ސަރުކާރު އޮފީސްތައް ހަނގުރާމަވެރިން ހިފާފައިވާ ކަމަށާއި، އެއީ ބަޣާވާތެއް ކަމަށެވެ.

ބޮޑުވަޒީރު ނެރުއްވި ބަޔާނުގައި ވިދާޅުވީ '"ޢަދަނުގައި ހިނގަމުންދާ ކަންކަމަކީ ވަރަށް ނުރައްކާތެރި ކަމެއް" ކަމަށެވެ. އަދި އެކަމުގެ ސަބަބުން ޔަމަނުގެ ސަލާމަތާއި ރައްކާތެރިކަމަށް އަސަރު ކުރަމުންދާކަމަށެވެ.

"ޢަދަނުގައި މިހިނގި ކަންކަމަކީ ޙޫޠީ ބާޣީން ސަންޢާގައި ހިންގި ޖަރީމާތަކާއި ތަފާތެއް ނެތް ކަންކަން"، ބޮޑުވަޒީރު ދަޣަރް ވިދާޅުވިއެވެ.

އާދިއްތަ ދުވަހު ޢަދަނުގައި ރައީސް އަބްދު ރައްބު މަންސޫރު ޙާދީގެ ސިފައިންނާއި ހަނގުރާމަވެރިންނާއި ދެމެދު ވަރުގަދަ ކުރިމަތިލުންތަކެއް ހިނގިއެވެ. ޙާދީގެ ސަރުކާރަކީ ސަޢޫދީއިން މަދަދުވެރިވާ ސަރުކާރަކަށްވާއިރު، ޢަދަނަށް ވެރިވެގަތް ހަނގުރާމަވެރިންނަކީ ޔޫއޭއީއިން ވާގިވެރިވާ ހަނގުރާމަވެރިންނެވެ. ދެކުނު ޔަމަނުގައި ސަޢޫދީއަށްވުރެ މިހާރު ބާރުގަދައީ ޔޫއޭއީގެއެވެ. 

ޔަމަނުގެ ދެކުނުގައި ޙަރަކާތްތެރިވާ ސަދަން ޓްރާންސިޝަނަލް ކައުންސިލްއަކީ ދެކުނު ޔަމަނުގައި ވަކިވެގަތުމަށް މަސައްކަތްކުރާ ޖަމާޢަތެކެވެ. އެޖަމާޢަތުން މިދިޔަ ހަފްތާގައި ރައީސް ހާދީއަށް ވަނީ އެމަނިކުފާނުގެ ބޮޑުވަޒީރު މަޤާމުން ދުރުކޮށް، ކެބިނެޓް އުވާލުމަށް ހަފްތާއެއްގެ މުހުލަތު ދީފައެވެ. އަދި ހަފްތާއެއްގެ ތެރޭގައި އެކަން ނުކޮށްފިނަމަ ބަޣާވާތްކުރާނެކަމުގެ އިންޒާރު އެޖަމާޢަތުން ދިނެވެ. އެޖަމާޢަތުން ދިން މުހުލަތު ހަމަވެފައިވަނީ އާދިއްތަ ދުވަހަށެވެ.

ހާދީ ވަނީ މިމައްސަލައިގެ ތެރެއަށް ސަޢޫދީއިން ވަދެ، ޢަދަން މައި ސަރުކާރުގެ ބާރުގެ ދަށަށް ގެނައުމަށް އެހީވެދިނުމަށް ގޮވާލައްވާފައެވެ.

ޔަމަނުގެ ދެކުނުގައި ހަރަކާތްތެރިވާ ހަނގުރާމަވެރިން ޖަވާބުދާރީވަނީ ޒުބައިދީ ކިޔާ ހަނގުރާމަވެރިޔަކަށެވެ. ހޫޠީންނާއި ދެކޮޅަށް ކުރި ހަނގުރާމައިގައި ޢަދަނުގައި ތިބި ހަނގުރާމަވެރިން ފަހަތަށް ޖައްސާލުމުން ރައީސް ހާދީ ވަނީ ޒުބައިދީއަށް ޢަދަނުގެ ވެރިކަން ދެއްވާފައެވެ. އެހެން ނަމަވެސް ދެފަރާތުގެ މެދުގައި މައްސަލަ ޖެހި، ދެކޮޅުވެރިވީ، ވަކިވެގަތުމަށް ޒުބައިދީ ކުރާ މަސައްކަތަކަށް ޔޫއޭއީއިން ވާގިވެރިވާކަން ފަޅާއެރި ހިސާބުންނެވެ. ޔޫއޭއީ  ޔަމަނުގެ ހަނގުރާމައިގެ ތެރެއަށް ވަނީ ސަޢޫދީގެ ގުޅިފައިވާ ކޯލިޝަންގެ ތެރެއިން 2015 ވަނަ އަހަރުގެ މާޗް މަހުގެ ތެރޭގައެވެ.

ދެކުނު ޔަމަނުގައި ޔޫއޭއީގެ އަތްގަދަކޮށް، ހަނގުރާމަވެރިންގެ ބާރުވެސް ގަދަކޮށްފައިވާއިރު، ސަންޢާގައި ޤާއިމްކޮށްފައިވާ ސަޢޫދީއިން މަދަދުވެރިވާ ހާދީގެ މައި ސަރުކާރުގެ ބާރު ދަނީ ކުޑަވަމުންނެވެ. އަދި ޙޫޠީ ހަނގުރާމަވެރިން އަނެއްކާވެސް ދަނީ ބާރު ގަދަކުރަމުންނެވެ.

ޔަމަނު ހަނގުރާމައިގައި މިހާތަނަށް 10 ހާހަށްވުރެ ގިނަ މީހުން މަރުވެފައިވާއިރު، މިހަނގުރާމައިގެ ޝިކާރަޔަކަށް ވެފައިވާ އެތައް މިލިއަން ބަޔަކު ޔަމަނުގައި އެބަތިއްބެވެ. އަދި އެޤައުމުގައި ހަލުވިކަމާއިއެކު ކޮލެރާ ފެތުރެމުންދާއިރު، ޔަމަނަށް ބޭނުންވާ އަސާސީ އެހީތައް ނުލިބޭކަމަށް އެހީދޭ ޖަމާޢަތްތަކުން ބުނެއެވެ.