ވީނުވީއެއް ނޭނގި ގެއްލިފައިވާ މެލޭޝިއާން އެއާލައިންސްގެ ބޯޓު MH370 ހޯދުމުގެ މަސައްކަތް އަލުން ފަށައިފިއެވެ.

ޗައިނާގެ ބެއިޖިންގއިން މެލޭޝިއާގެ ކުއަލަލަންޕޫރަށް ދަތުރުކުރަމުންދަނިކޮށް MH370 ގެއްލިފައި ވަނީ 2014 ވަނަ އަހަރުގެ މާރޗް މަހުއެވެ. ބޯޓު ގެއްލުނު އިރު އެ ބޯޓުގައި ފަސިންޖަރުންނާއި ފަޅުވެރިންނާ އެކު ޖުމްލަ 239 މީހުން ތިއްބެވެ. ބޯޓު ގެއްލުނު ހާދިސާ މިހާރު ގުނެނީ ދުނިޔޭގެ ވައިގެ ދަތުރުފަތުރުގެ އެންމެ ހައިރާން ކުރުވަނިވި އެއް ހާދިސާގެ ގޮތުގައެވެ.

ބޯޓު ހޯދުމުގެ މަސައްކަތް އަލުން ފަށާފައިވާ އިރު، މެލޭޝިއާ އިން މި މަސައްކަތް މިފަހަރު ހަވާލުކޮށްފައި ވަނީ އެމެރިކާގެ ފަރމެއް ކަމަށްވާ އޯޝަން އިންފިނިޓީއާއެވެ. އެ ކުންފުނިން 90 ދުވަހުގެ ތެރޭގައި MH370 ހޯދައިފި ނަމަ 70 މިލިއަން ޑޮލަރު ދިނުމަށް މެލޭޝިއާ އިން ވަނީ އެއްބަސްވެފައެވެ. މަސައްކަތާ ހަވާލުވެ، މި ޖެނުއަރީ މަހުގެ 3 ވަނަ ދުވަހު މަސައްކަތަށް ފުރި އޯޝަން އިންފިނިޓީގެ ކަނޑު ބޯޓު، ދި ސީބެޑް ކޮންސްޓްރަކްޓަރ، MH370 ހޯދުމުގެ މަސައްކަތް ރަސްމީ ގޮތުން ފަށާފައި ވަނީ ހޯމަ ދުވަހުއެވެ.

ރިޕޯޓްތައް ބުނާ ގޮތުގައި ދި ސީބެޑް ކޮންސްޓްރަކްޓަރ އިން MH370 ހޯދުމުގެ މަސައްކަތް ފަށާފައިވަނީ އޮސްޓްރޭލިއާގެ ސައިންޓިސްޓުން، MH370 ވެއްޓިފައިވާ ސަރަޙައްދު ކަމަށް އެންމެ ޔަޤީންކަމާ އެކު ލަފާކުރާ ސަރަޙައްދުންނެވެ.

ކަނޑުގެ އަޑިން އެއްލައްކަ ވިހި ހާސް އަކަކިލޯމީޓަރުގެ ސަރަޙައްދެއް ހޯދުމަށް ފަހު މެލޭޝިއާ އާއި އޮސްޓްރޭލިއާ އަދި ޗައިނާގެ ޓީމުތަކުން މި ބޯޓު ހޯދުން ހުއްޓާލާފައި ވަނީ ދެ އަހަރުގެ ސަރޗް އެންޑް ރެސްކިއު އޮޕަރޭޝަނަކަށް ފަހުއެވެ.