ލަންކާގެ ރިޔާސީ އިންތިޚާބުގައި އެޤައުމުގެ މިހާރުގެ ރައީސް މައިތިރިޕާލާ ސިރިސޭނާ ވާދަކުރައްވާނެ ކަމަށް ވެރިކަންކުރާ ކޯލިޝަންގައި ހިމެނޭ ފްރީޑަމް ޕާޓީ އިން ބުނެފިއެވެ.
ސްރީލަންކާ ފްރީޑަމް ޕާޓީ އިން ހަފްތާއަކު އެއްފަހަރު ބާއްވާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފިނޭންސް މިނިސްޓްރީގެ ސްޓޭޓް މިނިސްޓަރ ލަކްޝްމަން ޔާޕާ އަބޭވަރްދަނަ ވިދާޅުވީ އެޤައުމުގައި މިހާރު އޮތް ވެރިކަމުގެ ނިޒާމު ބަދަލު ނުވެއްޖެ ނަމަ އަދި ޤާނޫނު އަސާސީ އިސްލާޙު ނުކޮށްފި ނަމަ ދެވަނަ ދައުރަކަށް ސިރިސޭނާ ވާދަކުރައްވާނެ ކަމަށެވެ. އަބޭވަރްދަނަ ވިދާޅުވީ ސިރިސޭނާ އަށް ވުރެ އެމަޤާމަށް އެކަށީގެންވާ ބޭފުޅަކު ނެތް ކަމަށެވެ.
ސިރިސޭނާގެ ބަދަލުގައި ފްރީޑަމް ޕާޓީގެ ފަރާތުން މިހާރުގެ ސިވިލް އޭވިއޭޝަން މިނިސްޓަރ ނިމާލް ސިރިޕާލާ ޑިސިލްވާ ވެރިކަމަށް ކުރިމަތިލައްވާ ކަމަށް ވެސް އަޑުތައް ފެތުރުނެވެ. އެކަމާ ގުޅޭ ގޮތުން ނޫސްވެރިޔަކު ދެންނެވި ސުވާލަކަށް ޖަވާބު ދެއްވަމުން އަބޭވަރްދަނަ ވިދާޅުވީ ސިރިސޭނާ ދެވަނަ ދައުރަކަށް ވާދަނުކުރައްވަން ނިންމަވައިފި ނަމަ ނެރޭނެ ކެންޑިޑޭޓަކާ މެދު އެޕާޓީގެ ތެރޭގައި މަޝްވަރާކުރުމަށް ފަހު އެންމެ އެކަށީގެންވާ ކެންޑިޑޭޓެއް ނެރޭނެ ކަމަށެވެ.
އަބޭވަރްދަނަ ވިދާޅުވީ ޤާނޫނު އަސާސީ އިސްލާހުކޮށް، ވެރިކަމުގެ ނިޒާމަށް ގެންނަން ޖެހޭ ބަދަލުތައް ޤާނޫނު ހަދާ މަޖިލީހުން ގެންނަން ޖެހޭނެ ކަމަށެވެ.
ސިރިސޭނާ ވެރިކަމަށް ވަޑައިގަތީ ކުރީގެ ރައީސް މަހިންދަ ރާޖަޕަކްސަ އެމަނިކުފާނުގެ ވެރިކަމުގެ ދައުރު ހަމަނުވަނީސް ބޭއްވި ކުއްލި އިންތިޚާބު ކާމިޔާބުކުރައްވައިގެންނެވެ. އިންތިޚާބު ކާމިޔާބުކުރެއްވުމާ ހަމަޔަށް ސިރިސޭނާ ހުންނެވީ ރާޖަޕަކްސަގެ ސަރުކާރުގެ ހެލްތު މިނިސްޓަރުގެ މަޤާމުގައެވެ. އަދި ފްރީޑަމް ޕާޓީ އިން ވަކިވެވަޑައި ނުގެން، މިނިވަން ކެންޑިޑޭޓެއްގެ ގޮތުގައި އިދިކޮޅު މައި ޕާޓީ ޔޫއެންޕީއާ އެކު ކޯލިޝަން ހައްދަވައިގެން ރިޔާސީ އިންތިޚާބަށް ނިކުމެވަޑައިގަތެވެ. ސިރިސޭނާ އިންތިޚާބު ކާމިޔާބުކުރެއްވުމަށް ފަހު ފްރީޑަމް ޕާޓީގެ ކޮންޓްރޯލް ނެންގެވުމުން ރާޖަޕަކްސަ ވަނީ މިހާރު އާ ސިޔާސީ ޕާޓީއެއް ވެސް އުފައްދަވާފައެވެ.
ސިރިސޭނާ ވެރިކަމަށް ވަޑައިގެއްނެވިތާ މަދު ދުވަސްކޮޅެއްގެ ތެރޭގައި ޤާނޫނު އަސާސީ އިސްލާހުކޮށް، ވެރިކަމުގެ ދައުރު ހަ އަހަރުން ފަސް އަހަރަށް ބަދަލުކުރިއެވެ. އަދި ދާދި ފަހުން އެމަނިކުފާނަށް ހަ އަހަރު ވެރިކަން ކުރެއްވިދާނެތޯ ސާފުކުރުމަށް ސުޕްރީމް ކޯޓަށް ވެސް ވަޑައިގަތެވެ. ސުޕްރީމް ކޯޓުން ނިންމީ ސިރިސޭނާއަށް ވެރިކަމުގައި ހުންނެވޭނީ ޤާނޫނު އަސާސީއަށް ގެނެވުނު އިސްލާހާ އެއްގޮތަށް ފަސް އަހަރު ދުވަހު ކަމަށެވެ.
