ޤަތަރާ ދެކޮޅަށް އެޤައުމުގެ އަވަށްޓެރި ގަލްފުގެ ޤައުމުތަކުން އަޅާފައިވާ ފިޔަވަޅުތައް ބަލައިނުގަނެވޭނެ ކަމަށާއި، ގަލްފުގެ ޤައުމުތަކުގެ ޢަމަލުތައް އިންސާފުވެރި ނޫން ކަަމަށް އީރާނުގެ ރައީސް ޙަސަން ރޫޙާނީ ވިދާޅުވެއްޖެއެވެ.
ރޫޙާނީ މިހެން ވިދާޅުވީ އީރާނުގެ ވެރިރަށް ތެހެރާންގައި ޤަތަރުގެ އެޑްވައިޒަރީ ކައުންސިލްގެ ރައީސް އަހުމަދު ބިން އަބްދުﷲ އަލް މަޙްމޫދުއާ އެކު ބައްދަލުކުރެއްވުމަށް ފަހުއެވެ.
ރޫޙާނީ ވިދާޅުވީ ގަލްފުގެ ޤައުމުތަކުގެ މެދުގައި އެއްބަސް ނުވެވޭ ކަންތައްތަކެއް ހުރި ނަމަ އެކަންތައްތައް ޙައްލުކުރަން ޖެހޭނީ ވާހަކަ ދައްކައިގެން ކަމަށް އީރާނުން ޤަބޫލުކުރާކަމަށެެވެ.
އީރާނާ އެކު ޤަތަރުން ބާއްވަމުން އަންނަ ގާތްގުޅުމަކީ ޤަތަރާ އެކު އޮންނަ ގުޅުން ކަނޑާލުމަށް ޢަރަބި ޤައުމުތަކުން ނިންމި އެއް ސަބަބެވެ. ރޫޙާނީ ވިދާޅުވީ ޤަތަރާ އެކު އޮންނަ ގުޅުން އީރާނުން އަބަދުވެސް ދަމަހައްޓާނެ ކަމަށެވެ. އަދި ޤަތަރުން ވެސް ވަނީ އިރާނުން އެޤައުމާ އެކު އޮންނަ ގުޅުން ދަމަހައްޓާތީ އެކަމަށް ޝުކުރު އަދާކޮށްފައެވެ.
ޤަތަރުގެ މައްސަލައިގައި ފާއިތުވި އަށް މަސްދުވަހު ގަލްފުގެ މަސްރަހު ވަރަށް ބޮޑަށް ހޫނުވެފައިވާއިރު، ޤަތަރުގެ ވައިގެ ސިފައިން ޔޫއޭއީގެ މަތިންދާބޯޓުތަކަކަށް ޖެއްސުންކުރި ކަމަށް ބުނާ މައްސަލައެއް އަބޫދާބީ އިން ވަނީ ސިވިލް އޭވިއޭޝަނާ ބެހޭ ބައިނަލްއަޤްވާމީ އިދާރާ އައިކާއޯއަށް ހުށަހަޅާފައެވެ.
ޔޫއޭއީ އިން ފުރައިގެން ބަޙްރައިން އަށް ދަތުރުކުރި ދެ މަތިންދާބޯޓަކަށް ޤަތަރުގެ ވައިގެ ސަރަހައްދުގައި އެ ގައުމުގެ ވައިގެ ސިފައިންގެ ޖެޓްތަކުން ޖެއްސުންކޮށް ހުރަސްއެޅި ކަމަށް ޔޫއޭއީ އިން ދަނީ ބުނަމުންނެވެ. އެހެން ނަމަވެސް ޤަތަރުން އެކަން ދޮގުކުރެއެވެ. ސަޢޫދީ އާއި ޔޫއޭއީ އަދި ބަޙްރައިން އިން ޤަތަރާ އެކު އޮންނަ ގުޅުން ކަނޑާލައި، ޤަތަރުގެ އެއްވެސް މަތިންދާބޯޓެއް އަދި ޤަތަރަށް ދަތުރުކުރާ މަތިންދާބޯޓެއް ވެސް އެޤައުމުގެ ވައިގެ ސަރަހައްދު ބޭނުންކުރުން މަނާކުރިއެވެ. ޤަތަރުގެ ވަށައިގެންވާ ޤައުމުތަކުން އެފިޔަވަޅު އެޅި ނަމަވެސް ޤަތަރުން އެޤައުމުގެ ވައިގެ ސަރަހައްދު އެހެން ޤައުމުތަކުގެ އުޅަނދުތަކަށް ބަންދެއް ނުކުރެއެވެ.
މީގެ އިތުރުން ޤަތަރުގެ ޝާހީ ޢާއިލާގެ ބޭފުޅަކު އެބޭފުޅާގެ ނުރުހުމުގައި ޔޫއޭއީގެ ވެރިރަށް އަބޫދާބީގައި ބަންދުކޮށްގެން ގެންގުޅޭ ކަމަށް އެބޭފުޅާ ވަނީ ވިދާޅުވެފައެވެ. އަދި ބުދަ ދުވަހު ޤަތަރުގެ ޝާހީ އާއިލާގެ ބޭފުޅާ ޔޫއޭއީ އިން ކުވައިތަށް ގެންގޮސް، ކުވައިތުގައި ވަނީ ސިއްހީ ފަރުވާދިނުމަށް އެޑްމިޓްކޮށްފައެވެ.
