ތުއްތުކުދިންނަށް ދޭ ކިރެއް ކަމަށްވާ ޑެއިރީ ގްރޫޕްގެ ލެކްޓަލިސް ބޭނުންކުރުމުން ކުދިން ބަލިވަމުންދާކަމުގެ ޝަކުވާތަކާ އެކު އެ މައްސަލަ ތަހުގީގު ކުރުމުގެ ގޮތުން ޑެއިރީ ގްރޫޕްގެ ލެކްޓަލިސް ސައިޓްތައް ފަރަންސޭސި ފުލުހުން ބަލަން ފަށައިފިއެވެ.

ސަލްމޮނެއްލާ ފެތުރެން ފެށުމާ އެކު 83 ގައުމަކުން، ކުޑަކުދިންގެ މި ހިކި ކިރުގެ 12 މިލިއަން ފޮށި ވަނީ އަނބުރާ ކުންފުންޏަށް ފޮނުވާލާފައެވެ.

ކުދިން ބަލިވެފައިވަނީ އެ ކިރު ބޮއެގެންކަމަށްބުނެ ބެލެނިވެރިންވަނީ ކުންފުންޏާ ދެކޮޅަށް ދައުވާ ހުށަހަޅާފައެވެ.

ފުލުހުން ބަލާފާސްކުރަމުންދާ ސައިޓްތަކުގެ ތެރޭގައި ފްރާންސްގެ ހުޅަނގު އުތުރުގެ ޚެޣޮންގައި ހުންނަ ފެކްޓަރީ ވެސް ހިމެނެއެވެ.

މި ފެކްޓަރީއަކީ ކިރުތަޣައްޔަރުވުން ފެށިފައި ވަނީ އެތަނުގެ ޑްރައިންގ ޓަވަރެއްގައި ކަމަށް ބެލެވިގެން މިދިޔަ މަހު ބަންދުކޮށްފައިވާ ތަނެކެވެ.

ލެކްޓަލިސްގެ ތަރުޖަމާނު ވެސް ވަނީ ފުލުހުން އެ ފެކްޓަރީ ބަލައި ފާސްކުރަމުންދާ ކަމަށް ކަށަވަރުކޮށްދީފައެވެ.

ފްރާންސްގެ މީޑިއާތަކުން ރިޕޯޓްކުރާ ގޮތުގައި ލަވާލްގެ ކައިރީގައި ހުންނަ އެ ކުންފުނީގެ އޮފީހަށް ވެސް ފުލުހުން ވަނީ ވަދެފައެވެ.

ރޮއިޓަރސް ނޫސް އޭޖެންސީން ބުނާ ގޮތުގައި ތަހުގީގު ކުރާ އޮފިޝަލުން ހޯދަމުންދަނީ ކިރު ތަޣައްޔަރުވި ގޮތް އެނގޭނެ ޓެކްނިކަލް ޑޭޓާތަކެވެ.

މިހާތަނަށް ފްރާންސުން 37 ކުއްޖަކު އަދި ސްޕެއިނުން އެއްކުއްޖަކަށް ކިރުގެ ސަބަބުން އަސަރުކޮށްފައިވާ ކަމަށް ރިޕޯޓްކޮށްފައިވާއިރު ގްރީސް އިން ވެސް އެފަދަ ކޭސްތަކެއް ރިޕޯޓްކޮށްފައިވާ ކަމަށް ބުނެވެއެވެ.

ފްރާންސުން ބަލިވި ކުދިންގެ ތެރެއިން 18 ކުއްޖަކަށް ހޮސްޕިޓަލުން ފަރުވާދޭން ޖެހިފައިވެއެވެ. ފްރާންސްގެ ޕަބްލިކް ހެލްތު އޭޖެންސީއާ ހަވާލާދީ އޭއެފްޕީ އިން ބުނާ ގޮތުގައި އެ ހުރިހާ ކުދިންގެ ހާލު އަންނަނީ ރަނގަޅުވަމުންނެވެ.

ދުނިޔޭގައި އެންމެ ފުޅާދާއިރާއެއްގައި ޑެއިރީ އުފެއްދުންތައް އުފައްދާ އެއް ގްރޫޕް ކަމަށްވާ ލެކްޓަލިސް އިން ބުނެފައިވާ ގޮތުގައި އެ ކުންފުނީގެ އުފެއްދުންތައް ތަޣައްޔަރުވެގެން ދިޔައީ ޚެޣޮންގައި ހުންނަ ފެކްޓަރީގެ ރިނޮވޭޝަން މަސައްކަތްތަކަކަށް ފަހުއެވެ.

ދާދިފަހުން ފްރާންސްގެ ނޫހަކަށް ދެއްވި އިންޓަވިއުއެއްގައި ޗީފް އެގްޒެކްޓިވް އެމަނުއެލް ބެސްނިއަރ ވަނީ ކިރުގެ ސަބަބުން ބަލިފެތުރުނުކަން ފޮރުވަން މަސައްކަތްކުރި ކަމަށް ބުނާ ވާހަކަ ދޮގުކުރައްވާފައެވެ.

މީގެ އިތުރުން އޭނާވަނީ ކިރުގެ ސަބަބުން ގެއްލުމެއް ދިމާވި ކޮންމެ އާއިލާއަކަށް ބަދަލުދިނުމަށް ވައުދުވެ ވަޑައިގެންފައެވެ.

ލެކްޓަލިސްގެ އަހަރީ ސޭލްސްއަކީ 21 ބިލިއަން އެމެރިކާ ޑޮލަރެވެ. އަދި ދުނިޔޭގެ 47 ގައުމެއްގައި 246 ޕްރޮޑަކްޝަން ސައިޓް ހުންނައިރު ހަމައެކަނި ފްރާންސްގައި ވެސް 15،000 މުވައްޒަފުން ތިބެއެވެ.

އެ ކުންފުނީގެ އުފެއްދުންތަކުގެ ތެރެއިން އަސަރުކޮށްފައި ވަނީ ޕިކޮޓް، މިލުމެލް، ސިލިއާ އަދި ތަރާނިސް ބްރޭންޑްގެ އުފެއްދުންތަކަށެވެ. އެ ހުރިހާ ބްރޭންޑެއް ވަނީ މިހާރު ބާޒާރުން ނަގާފައެވެ

ކުންފުނީގެ ތަރުޖަމާނު މިދިޔަ ހަފްތާގައި ބީބީސީގައި ވިދާޅުވީ ޔޫރަޕާއި، އޭޝިއާ، ލެޓިން އެމެރިކާ އަދި އެފްރިކާއިން ކިރުގެ ސަބަބުން އަސަރުކުރި ގައުމުތަކަށް މިހާރު އެކަން އަންގާފައިވާނެ ކަމަށެވެ. އިނގިރޭސިވިލާތް އެމެރިކާ އަދި އޮސްޓްރޭލިއާއަށް މި ކިރުގެ އަސަރުކޮށްފައި ނުވާ ކަމަށް އޭނާ ވިދާޅުވިއެވެ.

ސަލްމޮނެއްލާ ޖެހުމުން ބޭރަށް ހިންގުމާއި، ބަނޑު ފުއްޕުމާއި، ހޮޑުލެވުމާއި، ހަށިގަނޑުން އާދަޔާ ޚިލާފަށް ފެންމަދުވުން ފަދަ ކަންކަން ދިމާވެ ތުއްތު ކުދިންގެ ފުރާނައަށް ވެސް ނުރައްކާ ވެދާނެއެވެ.