ބަންގްލަދޭޝްގައި ތިބި ރޮހިންޖާ މުސްލިމުން މިލިއަނަކަށް ވުރެ ގިނަ ކަމަށް، ކަމާ ބެހޭ ފަރާތްތަކުން ބުނެފިއެވެ.
މިއީ ކުރިން ބަންގްލަދޭޝްގައި ތިބި ކަމަށް އަންދާޒާކުރި ވަރަށް ވުރެ ގިނަ އަދަދެކެވެ.
ރޮހިންޖާ މުސްލިމުންގެ މައްސަލައިގައި އެންމެ ފަހުން އިވިގެން ދިޔަ އެއް އަޑަކީ، މިޔަންމާގެ އަސްކަރިއްޔާ އިން އެގައުމުގެ ރަކައިން ސްޓޭޓްގައި ދިރިއުޅެމުންދާ ރޮހިންޖާ ދަރިކޮޅު މީހުންނާ ދެކޮޅަށް ހިންގި ލާއިންސާނީ އޮޕަރޭޝަނުން ސަލާމަތްވުމަށް އެގައުމު ދޫކޮށް އަވަށްޓެރި ބަންގްލަދޭޝް އަށް ހިޖުރަކުރި ރެފިއުޖީން އެނބުރި ގައުމަށް ފޮނުވާނެ ގޮތަކާ މެދު ބަންގްލަދޭޝް އާއި މިޔަންމާ އިން އެއްބަސްވުމަކަށް އަތުވި ވާހަކައެވެ.
މިޔަންމާ އާއި ބަންގްލަދޭޝްއާ ދެމެދު ކުރެވުނު މަޝްވަރާތަކަށް ފަހު ހަފްތާއަކު 1500 ރެފިއުޖީން މިޔަންމާ އަށް ބަދަލު ކުރުމަށް އެގައުމުން އެއްބަސްވެފައިވާ ކަމަށް ބަންގްލަދޭޝް އިން ބުނެއެވެ. އަދި ބަންގްލަދޭޝްގެ ރެފިއުޖީ ކޭމްޕްތަކުގައި ތިބި މިޔަންމާގެ ހުރިހާ ރެފިއުޖީން ދެ އަހަރު ދުވަހުގެ ތެރޭގައި އަނބުރާ ގައުމަށް ފޮނުވާލުމަށް ބަންގްލަދޭޝް އިން ވަނީ އަމާޒު ހިފާފައެވެ.
މިޔަންމާގެ ރޮހިންޖާ މުސްލިމުންދާ މެދު އެގައުމުގެ އަސްކަރިއްޔާ އިން ލާއިންސާނީ އަމަލުތައް ހިންގާތާ އެތައް އަހަރުތަކެއްވެފައިވާއިރު، މިދިޔަ އަހަރު އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން އެގައުމުގެ ރޮހިންޖާ މުސްލިމުންދާ ދެކޮޅަށް އާ އޮޕަރޭޝަނެއް ފެށިއެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާ އިން ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަތް ދިޔައީ ފޭރިގަންނަމުންނެވެ. މިޔަންމާގެ އަސްކަރިއްޔާ އިން ފަށާފައިވާ އޮޕަރޭޝަނާ ބެހޭ ގޮތުން އދ. އިން ބުނެފައި ވަނީ އެއީ "ނަސްލެއް ނައްތާލުމުގެ" އޮޕަރޭޝަނެއް ކަމަށެވެ.
