ސިޔާސީ މަސައްކަތްތަކުގައި އަލުން ފެނިގެން ހިނގައިދާނެ ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އަދާލަތު ޕާޓީގައި އިސްކޮން އުޅުއްވި ޝަހީމް، އެ ޕާޓީން ވަކިވެވަޑައިގަތުމަށް ފަހު ސިޔާސީ މަޝްރަހުން ފެންނަނީ ވަރަށް މަދުންނެވެ. ދުވަސްތަކެއް ވަންދެން ސިޔާސީ ހަރަކާތްތަކާ ދުރުގައި ހުންނެވުމަށް ފަހު ހޮނިހިރު ދުވަހު ކުރެއްވި ޓްވީޓުގައި ވިދާޅުވެފައި ވަނީ "ސިޔާސީ މައިދާނުން އަލުން ފެނިގެން ހިނގާދާނެ" ކަމަށެވެ.
ޝަހީމް ސިޔާސީ މައިދާނުން އަލުން ފެނިގެން ހިނގާދާނެ ކަމަށް ވިދާޅުވެ ކުރެއްވި ޓްވީޓަށް ބައެއް މީހުން ވަނީ ރައްދުދީފައެވެ. އޭގެ ތެރެއިން ބައެއް މީހުން ވަނީ ޝަހީމް "ދުނިޔެވީ އެދުމާއި ފައިސާ އާއި އަމިއްލަ އެދުމުން ފޯވެފައި" ކަމަށް ތުހްމަތު ކުރައްވާފައެވެ. އަދި އަނެއް ބަޔަކު ބުނެފައިވަނީ ވަގުތު ފާއިތުވެއްޖެ ކަމަށާއި ދެން ސިޔާސީ މަޝްރަހުން ފެނުނަސް ސަރުކާރުދާނީ "ޗޮކުން" ކަމަށެވެ.
އެހެން ނަމަވެސް ޝަހީމަށް ތާއިދުކުރާ ބައެއް މީހުން ވަނީ އެ ނިންމުމަށް މަރުހަބާ ކިޔައިފައެވެ. އެގޮތުން ބައެއް މީހުން ބުނެފައި ވަނީ ސިޔާސީ މަޝްރަހުން އަލުން ފެނުމަށް ނިންމި ނިންމުމަކީ ރަނގަޅު ވިސްނުމެއް ކަމަށް ގަބޫލުކުރާ ކަމަށެވެ. އަދި ރައީސް އަބްދުﷲ ޔާމިން އަބްދުލް ގައްޔޫމްގެ ފަހަތްޕުޅުގައި ސާބިތުވެ ހުންނަވާނެ ކަމަށް ޔަގީންކުރާ ކަމަށް ވެސް ބައެއް މީހުން ބުނެފައިވެއެވެ.
ދާދިފަހުން ޝަހީމް ވަނީ ކުރިން ހުންނެވި އަދާލަތު ޕާޓީގެ އިސްވެރިންނަށް އިޝާރާތް ކުރައްވައި ބަހުގެ ހަމަލާތަކެއް ދެއްވާފައެވެ. ޝަހީމް ކުރެއްވި ޓްވީޓްގައި ވިދާޅުވެފައި ވަނީ "އެގޭގެ ބައެއް އަހުލުވެރިން ކުޑަ ކުއްޖާ އެއްލައިލީމަ އޭނާ ގޮސް އެހެން ތަނަކުން ހިޔާވަހިކަން ހޯދުމަކީ އެ ކުއްޖާގެ ކުށެއް ނޫން" ކަމަށެވެ. ބެލެވޭ ގޮތުން އޭނާ އެހެން ވިދާޅުވީ ސަރުކާރަށް ތާއިދުކުރައްވައިގެން ހުންނެވުމާ ގުޅިގެން ކިޔަމުންދާ ފާޑުކިޔުންތަކަށ ރައްދު ދެއްވައެވެ.
މި ސަރުކާރުގައި އެންމެ ފުރަތަމަ އިސްލާމިކް މިނިސްޓަރުކަން ކުރައްވާފައިވާ ޝަހީމް، މިހާރު ހުންނެވީ އިސްލާމިކް ޔުނިވަސިޓީގެ ޗާންސެލަރުގެ މަގާމުގަ އެވެ. ޝަހީމްގެ އަނބިކަނބަލުން ޕީޕީއެމްއާ ގުޅިވަޑައިގެންފައިވީ ނަމަވެސް ޝަހީމް އަދި ޕީޕީއެމްއާ ގުޅިވަޑައިގެންކަން އެނގިފައެއްނުވެއެވެ. ނަމަވެސް ފަހަކަށް އައިސް ޕީޕީއެމްގެ ޖަލްސާތަކުން ޝަހީމް ބައިވެރިވެވަޑައިގަންނަވައެވެ.
ސިޔާސީ ދާއިރާ އިން ޝަހީމް އަލުން ފެނިދާނެ ކަމަށް ވިދާޅުވެފައިވާ އިރު މި އަހަރުގެ ރިޔާސީ އިންތިހާބަށް ރައީސް ޔާމީންގެ ރަނިން މޭޓަކާ މެދު ދަނީ މަޝްވަރާތައް ކުރެވެމުންނެވެ. އަދި ޝަހީމްގެ މި ނިންމެވުމަކީ އެކަމަށް ޝައުގުވެރިވާ ކަމުގެ އިޝާރާތެއް ކަމަށް ފާޑުކިޔާ ބައެއް ފަރާތްތަކުން ބުނެފައި ވެއެވެ.
