މާލެއިން ފުރައިގެން ރ. އަތޮޅަށް ދަތުރު ކުރަމުން ދިޔަ "ފަޒާ" ދޯނި ދެ ދުވަސް ވީއިރުވެސް ފުން ނުކުރެވޭ ކަމަށް އެމްއެންޑީއެފުން ބުނެފި އެވެ. 

ހޮނިހިރު ދުވަހު އެމްއެންޑީއެފުން ބުނި ގޮތުގައި ދޯނި ފުންކުރުމުގެ މަސައްކަތް ދޯނިގެ ވެރިފަރާތުން ކުރަމުންދާއިރު، އެ މަސައްކަތުގައި އެމްއެންޑީއެފްގެ ނޯދަރން އޭރިއާގެ ސިފައިންގެ އެހީތެރިކަން ފޯރުކޮށްދެމުންދާ ކަމަށެވެ. 

ކޯސްޓްގާޑުގެ ޓީމް ހަރަކާތްތެރިވާން ފެށީ ހޮނިހިރު ދުވަހުގެ ހެނދުނު 09:00 އިން ފެށިގެންނެވެ. 

ބ. އޭދަފުށި ކައިރީގައި އޮންނަ ފަރަކަށް ފަޒާ ދޯނި އެރީ ބުދަ ދުވަހުގެ ރޭ ދަންވަރު 02:30 ހާއިރު އެވެ. މި ދޯނި ދަތުރުކުރަމުން ދިޔައީ ރ.އަތޮޅުގައި އަލަށް ހަދަމުންދާ ރިސޯޓަކަށް މުދާ ހިފައިގެންނެވެ. ދޯނި ފަރަށް އެރިއިރު، އޭގައި ދިވެއްސަކާއި ދެ ބިދޭސީއަކު ތިއްބެ އެވެ.