ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫން ހައްޔަރުކުރުމަށް ނެރުނު އަމުރާއި ޝަރީއަތް ނިމެންދެން ބަންދުގައި ބަހައްޓަން ކްރިމިނަލް ކޯޓުން ކުރި އަމުރު ބާތިލްކުރަން ހައި ކޯޓުގައި މައްސަލަ އިސްތިއުނާފު ކުރިފަހުން ހުކުމެއް ނުކުރެވި ފަސް މަސްވެއްޖެ އެވެ.

ފާރިސް ހައްޔަރުކުރުމަށް ކްރިމިނަލް ކޯޓުން ނެރުނު އަމުރާއި އަދި އެ އަމުރުގެ ދަށުން ހައްޔަރުކޮށް، ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން, ތުހްމަތު ކުރެވޭ ރިޝްވަތު ހުށަހެޅުމުގެ ކުށުގެ ދައުވާގެ އަޑުއެހުން ނިމެންދެން ބަންދުގައި ބަހައްޓަން ކުރި އަމުރު ހައި ކޯޓުގައި އިސްތިއުނާފުކުރީ މިދިޔަ ޖުލައި މަހު އެވެ. އަދި އެ މައްސަލަ ހައިކޯޓުން ބަލައިގެންފައިވަނީ ޖުލައި 25 ވަނަ ދުވަހު އެވެ.

ފާރިސް ހައްޔަރުކުރުމަށް ނެރުނު އަމުރުގެ ދަށުން، ޖުލައި 18 ވަނަ ދުވަހު އޭނާ ހައްޔަރުކުރުމަށް ފަހު، ބަންދާއި މެދު ގޮތެއް ނިންމުމަށް ޖުލައި 19 ވަނަ ދުވަހު ކްރިމިނަލް ކޯޓަށް ހާޒިރުކުރުން، ތުހުމަތު ކުރެވޭ މައްސަލައިގެ ތަހުގީގު ނިންމައި ދައުވާކޮށް ޝަރީއަތް ނިމެންދެން ހޯމް މިނިސްޓްރީއިން ކަނޑައަޅާ ތަނެއްގައި ބަންދުކުރުމަށް ވަނީ އަމުރުކޮށްފަ އެވެ.

ފާރިސް ހައްޔަރު ކުރުމަށްފަހު އޭނާގެ މައްޗަށް އުފުލި ދައުވާގައި ބުނެފައިވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ ހުށަހެޅުމަށް، މަޖިލިސް މެންބަރަކަށް ރިޝްވަތު ހުށަހަޅާފައިވާ ކަމަށެވެ.

ފާރިސް ދެއްވި ކަމަށްބުނާ ރިޝްވަތުގެ ފައިސާ ހިފައިގެން މަޖިލިސް މެމްބަރު ގާތަށް ދިޔަ ކަމަށް ތުހްމަތު ކުރެވޭ މީހާވެސް ހައްޔަރުކޮށްފައިވެ އެވެ. ނަމަވެސް އޭނާ ބަންދުގައި ނުބެހެއްޓޭނެ ކަމަށް ބުނެ ހައި ކޯޓުން ކޮށްފައިވާ ހުކުމުގައިވާ ގޮތުން ރިޝްވަތުގެ ކުށުގެ ތުހްމަތަކީ ޖިނާއީ އިޖްރާއަތުގެ ގާނޫނުގެ ދަށުން ބޮޑު ކުށެއްގެ ތުހްމަތު ކަމަށް ނުވާތީ ޝަރީއަތް ނިމެންދެން ބަންދުގައި ނުބެހެއްޓޭނެ ކަމަށެވެ. އެހެން ނަމަވެސް ރިޝްވަތުގެ ކުށަކީ ބޮޑު ކުށެއްގެ ތުހްމަތުކަމަށްބަލައި، ޝަރީއަތް ނިމެންދެން ބަންދުގައި ބަހައްޓަން ކްރިމިނަލް ކޯޓުން ކޮށްފައިވާ އަމުރު އޭގެ ފަހުންވެސް ބާތިލް ކޮށްފައިނުވެއެވެ.

ފާރިސްގެ ބަންދުގެ އިސްތިއުނާފީ މައްސަލާގައި އޯގަސްޓް މަހުގެ 9 ވަނަ ދުވަހު ބޭއްވި އަޑުއެހުމަށްފަހު އަޑުއެހުންތައް ނިމުނީ ކަމަށް މައްސަލަ ބެއްލެވި ބެންޗުން އިއުލާން ކުރެއްވި އެވެ. ނަމަވެސް އެ ބެންޗްގެ އިސް ފަނޑިޔާރަކަށް ސަމީރު އިންނަވަނިކޮށް އިސް ފަނޑިޔާރު އަބްދުﷲ ދީދީ ވަނީ އެ މައްސަލާގެ ފައިލްތައް ސަމީރު އަތްޕުޅުން ނަންގަވައި އޭނާ ސެކްޝަނަށް ގެންދަވާފަ އެވެ.

އަދި އެ މައްސަލަ ބެއްލެވި އެ ކޯޓުގެ އިސް ފަނޑިޔާރު އަބްދުﷲ ދީދީ އާއި ފަނޑިޔާރު އަހްމަދު ސަމީރާއި ފަނޑިޔާރު އަބްދުލް ރައޫފުގެ ބެންޗް ބަދަލު ކުރެއްވި އެވެ. އަލުން އެކުލަވާލި ބެންޗްގައި ފަނޑިޔާރު ސަމީރު ބޭރުކޮށް، ފަނޑިޔާރު ޝުޖާއު އުސްމާން ވަނީ ބެންޗުގެ ރިޔާސަތަށް ހަމަޖައްސަވާފަ އެވެ.

ހައި ކޯޓުގެ ދެކުނު ގޮތްޕައް ކަނޑައަޅުއްވާފައި ހުންނަވަނިކޮށް ފަނޑިޔާރު ޝުޖާއު އުސްމާން އެ ބެންޗަށް ގެންނެވީ  ތިން މަސްދުވަހުގެ ނިޔަލަށް މާލޭގެ ހައި ކޯޓުގައި މަސައްކަތް ކުރެއްވުމަށް ސުޕްރީމް ކޯޓުން ނެރުއްވި އަމުރެއްގެ ދަށުންނެވެ. ނަމަވެސް އޭނާ މާލޭ ކޯޓަށް ބަދަލުކުރި ތިން މަސް ދުވަސް ހަމަވިއިރުވެސް ފާރިސްގެ މައްސަލާގައި ހުކުމެއް ނުކުރެވުނެވެ.

ފާރިސް ބަންދުގައި ހުންނެވި މި ދުވަސްތަކުގެ ތެރޭގައި އިސްތިއުނާފުގެ މައްސަލަ އަވަސްކޮށްދޭން އެކި ފަހަރުގެ މަތިން ހައި ކޯޓުގަ އާއި ސުޕްރީމް ކޯޓުގައި އެދިފަ އެވެ.  ފާރިސްއާމެދު ކޮށްފައިވާ ތުހްމަތު ކުރާ ކުށަކީ ޖިނާއީ އިޖްރާއަތުގެ ގާނޫނުގެ ދަށުން ބޮޑު ކުށެއްގެ ތުހްމަތު ނޫން ކަމަށް ހައި ކޯޓުންވެސް ނިންމާފައިވާތީ އޭނާ ދޫކޮށްލުމުގެ އަމުރެއް ނެރެދިނުމަށް ޕްރޮސެކިއުޓާ ޖެނަރަލްއަށްވެސް ވަކީލުން ހުށަހެޅުއްވި އެވެ.

ރިޝްވަތު ހުށަހެޅުމުގެ ކުށުގައި ޖުލައި 18 ގައި ފާރިސް ބަންދު ކޮށްފައިވާއިރު އޭނާގެ މައްޗަށް އެކުށުގައި ދައުވާ އުފުލީ އޯގަސްޓް މަހުގެ 17 ވަނަ ދުވަހު އެވެ.

އެ މައްސަލައިގައި އޭނާ ހައްޔަރުކޮށް ބަންދުކޮށްފައިވާއިރު، ޝަޙްސް އޮޅުވާލުމުގެ ދައުވާކޮށް އޭނާގެ މައްޗަށް ކްރިމިނަލް ކޯޓުގައި ޝަރީއަތެއް ދަނީ ހިންގަމުންނެވެ