ސަރުކާރުން މިހާތަނަށް 1.6 ބިލިއަން ރުފިޔާ ޚަރަދުކޮށްގެން 47 ރަށެއްގެ ބަނދަރު ހަދާ ނިންމާފައިވާ ކަމަށް ހައުސިންގ މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ބަނދަރު ހެދުމުގެ މަޝްރޫއުތަކާ ގުޅޭ ތަފާސްހިސާބުތަކަކާއެކު މިނިސްޓަރު މުއިއްޒު ކުރެއްވި ޓުވީޓެއްގައި ވިދާޅުވެފައިވާ ގޮތުގައި މިހާތަނަށް 1.6 ބިލިއަން ރުފިޔާގެ ބަނދަރު ނިމިފައިވުމުން، ރާއްޖޭގެ އެކިކަންކޮޅުތަކުގައި ބަނދަރު ހެދުމަށް ރައީސް އަބްދުﷲ ޔާމީން ދެއްވާ އިސްކަން ހާމަވެއެވެ.
Raajjeeyge eki kankolhugai bandharu hehdhevumah Raees Yameen dhevvaa iskan: mihaathanah Rf 1.6billion ge bandharu nimmavaafaivey. pic.twitter.com/zs7JA5ERGN
— Dr.Mohamed Muizzu (@MMuizzu) December 24, 2017
މިނިސްޓަރު އާންމުކުރެއްވި ތަފާސްހިސާބުތަކުގައިވާ ގޮތުގައި، 78 ރަށެއްގެ ބަނދަރު ހެދުމަށް 2.5 ބިލިއަން ރުފިޔާ ޚަރަދުކުރަން ވަނީ ނިންމާފައެވެ. އޭގެ ތެރޭގައި ހިމެނެނީ މިހާރު ނިމިފައިވާ 47 ބަނދަރަކަށް ޚަރަދުކުރަންޖެހުނު 1.6 ބިލިއަން ރުފިޔާއާއި، މިހާރު މަސައްކަތް ކުރިއަށްދާ 31 ބަނދަރަކަށް ޚަރަދުވާ 900 މިލިއަން ރުފިޔާއެވެ.
ތަފާސްހިސާބުތަކުގައިވާ ގޮތުގައި، 2014 ވަނަ އަހަރުގެ ތެރޭގައި ނުވަ ބަނދަރެއް ވަނީ ނިންމާފަ އެވެ. 2015 ވަނަ އަހަރުގެ ތެރޭގައިވެސް ނުވަ ބަނދަރެއް ނިންމާފައިވާއިރު، 2016 ވަނަ އަހަރުގެ ތެރޭގައި 12 ބަނދަރެއް ވަނީ ނިންމާފައެވެ. މިއަހަރުގެ ތެރޭގައި 17 ބަނދަރެއް ނިމިފައިވާ ކަމަށް ތަފާސްހިސާބުތަކުގައިވެއެވެ.
