އިންޑިއާގެ ހެލިކޮޕްޓަރުގައި އަންގާރަ ދުވަހުވެސް ބަލި މީހުން އުފުލިކަން ފާހަގަކުރައްވައި، ރާއްޖެއަށް އިންޑިއާއިން ކޮށްދޭ ކަންތައް އިންޑިއާ ސަފީރު އަކިލޭޝް މިޝްރާ ހަނދާންކޮށްދެއްވައިފިއެވެ.
ބުދަ ދުވަހުގެ ރޭ މިޝްރާ ކުރެއްވި ޓްވީޓެއްގައިވަނީ ހާލު ދެރަ ބަލި 2 މީހަކު އުނގޫފާރުން މާލެއަށް އިންޑިއާގެ ހެލިކޮޕްޓަރުގައި ގެނެސްފައިވާ ކަމަށާއި، މިއީ އެއް ދަތުރެއްގައި ހާލުދެރަ ބަލި 2 މީހަކު މިގޮތަށް ރާއްޖޭގައި އުފުލި ފުރަތަމަ ފަހަރުކަމަށެވެ. އަދި ހެލިކޮޕްޓަރު އޮޕަރޭޓްކުރި އިންޑިއާ ކަނޑުގެ ސިފައިންނަށް ސަފީރު މިޝްރާވަނީ ޝުކުރު އަދާކުރައްވާފައެވެ.
India-Maldives cooperation #MedicalEvacuation (19 Dec) of 2 critically-ill patients Ibrahim Manik (82 Yrs) & Ms Zaahida Adam (57 Yrs) from Ungafaru,#RaaAtoll to Malé. It was 1st time the helicopter undertook Medevac of 2 critical patients in the same sortie. Thanks @indiannavy pic.twitter.com/BVHXgSg60h
— Akhilesh Mishra (@AkhileshIFS) December 20, 2017
އުމުރުން 82 އަހަރުގެ ފިރިހެނަކާއި 57 އަހަރުގެ އަންހެނަކު އިންޑިއާގެ އަސްކަރީ ހެލިކޮޕްޓަރެއްގައި އުނގޫފާރުން މާލެ ގެނައިކަން އަކިލޭޝް މިޝްރާ ފާހަގަކުރެއްވިއިރު، އެމަނިކުފާނާއި ބައްދަލުކުރި މައްސަލައިގައި ގއ އަތޮޅު ކައުންސިލްގެ ހުރިހާ ކައުންސިލަރުން ވަނީ ސަސްޕެންޑްކޮށްފައެވެ. އަދި ސަރުކާރުން ގެންދަނީ އިންޑިއާ އެކަހެރިކޮށް، އިންޑިއާއާއި ވާދަވެރި ޗައިނާއާ ގުޅުން ބަދަހިކުރަމުންނެވެ. މިމައްސަލައިގައި އިންޑިއާގެ ޚާރިޖިއްޔާއިން ބުނީ ދިވެހިރާއްޖެއިން އިންޑިއާ އިސްކުރާނެކަމަށް އުއްމީދުކުރާކަމަށެވެ.
އިންޑިއާގެ ބައެއް ސިޔާސީ ބޭފުޅުން ގެންދަވަނީ ޗައިނާއަށްވުރެ ބޮޑަށް އިންޑިއާއިން ދިވެހިރާއްޖެއަށް އެހީތެރިވަމުންދާ ކަމަށް ބުނެ، ރާއްޖެއިން ޗައިނާއާ ގުޅުން ބަދަހިކުރުމަށް ރާއްޖޭގެ ޚާރިޖީ ސިޔާސަތަކަށް ގެނައި ބަދަލަށް ފާޑުވިދާޅުވަމުންނެވެ.
