ހދ. ނޮޅިވަރަމުން މޫދަށް އެރި އުޅެނިކޮށް ގެއްލުނު އަންހެނަކު  ހޯދުމުގެ މަސައްކަތް ފަށައިފި އެވެ.

ފުލުހުން ބުނީ މިހާދިސާ ހިނގައިގެން އުޅޭ ކަމުގެ މައުލޫމާތު ފުލުުހުންނަށް ލިބިފައިވަނީ ބުދަ ދުވަހުގެ ހެނދުނު 11:00 ހާއިރު ކަމަށެވެ. އުމުރުން 41 އަހަރުގެ އަންހެނަކު މޫދަށް އެރި އުޅެނިކޮށް ވީގޮތެއް ނޭނގިގެން ފުލުހުން ހޯދަމުންދާ އިރު އެމްއެންޑީއެފް ނޮދާން އޭރިއާގެ ސިފައިން އެރަށުގެ ވަށައިގެން ކަނޑުގެ ސަރަހައްދު ބެލުމުގައި ހަރަކާތްތެރިވާ ކަމަށް އެމްއެންޑީއެފް އިން ބުނެއެވެ.

ނޮޅިވަރަމް ކައުންސިލްގެ މެންބަރު އިބްރާހިމް ނަސީރު ވިދާޅުވީ، ގެއްލިގެން ހޯދަމުން ދަނީ ނަފްސާނީ ބައްޔަކަށް ފަރުވާ ހޯދަމުންދާ މީހެއް ކަމަށާއި އޭނާ ހެނދުނު މޫދަށް ގޮސްފައިވަނީ އޭނާ ދިރިއުޅޭ ގޭ މީހުންނަށް ވެސް ނޭނގި ކަމަށެވެ. އެެހެން ނަމަވެސް އޭނާ މޫދުން އަރައިގެން އައިތަން ހެނދުނު 08:30 ހާއިރު ފެނުނު މީހުން ތިބި ކަމަށް ނަސީރު ވިދާޅުވި އެވެ.

އެހެން ނަމަވެސް ފުލުހުން މި އަންހެން މީހާ ހޯދަނީ މޫދަށް އެރި އުޅެނިކޮށް ގެއްލިގެން އުޅޭ މީހެއްގެ ގޮތުގަ އެވެ.

ކައުންސިލް މެންބަރު ނަސީރު ވިދާޅުވީ، ހޯދަމުންދާ އަންހެން މީހާ އެންމެފަހުން ފެނިފައިވަނީ ގަބުރުސްތާނާ ހަމައިން ކަމަށާއި އެއީ މޫދާ އެހާ ދުރު ހިސާބެއް ނޫން ކަަމަށެވެ. ގެއްލިގެން ހޯދަމުންދަނީ އެރަށު މަންޒަރުގެ، ޝާހިދާ އަލީ ކަމަށް އެރަށު ކައުންސިލުން ބުނެ އެވެ.