ވަކި ފަރުދެއްގެ ސަބަބުން އިއްތިހާދަށް ބުރޫ އަރައިގެން ނުވާނެ ކަމަށާއި، އަދި ޖުމްހޫރީ ޕާޓީން އެކަން ވުމަށް ފުރުސަތު ވެސް ނުދޭނެ ކަމަށް އެ ޕާޓީގެ ލީޑަރު ޤާސިމް އިބްރާހިމް ވިދާޅުވުމުން އެކަމަށް ކުރީގެ ރައީސް މުހައްމަދު ނަޝީދު ޝުކުރު އަދާކުރައްވައިފިއެވެ.
ޤާސިމް ކުރެއްވި ޓްވީޓެއްގައި ވިދަޅުވީ ވަކި ފަރުދަކު ޖޭޕީއާ ގުޅުމަކުން އަދި މެންބަރަކު ވަކި ކަމެއްގައި ތަފާތު ވިސްނުމެއް ގެންގުޅޭ ގޮތަކުން، ރާއްޖެ އިސްލާހީ މަގަށް ގެނައުމަށް ޖޭޕީ ބައިވެރިވެފައިވާ އިއްތިހާދުގެ ގުޅުމަށް ބުރޫއަރައިގެން ނުވާނެ ކަމަށެވެ. އަދި ޖޭޕީ އިން އެކަހަލަ ކަމެއް ވުމަށް ފުރުސަތު ނުދޭނެ ކަމަށް ވެސް ގާސިމް ވަނީ ވިދާޅުވެފައެވެ.
Vaki farudhaku JP ah gulhumakun, adhi membaraku vaki kamehgai thafaathu visnumeh gengulheygothakun raajje islaahee magah genaumah JP baiverivefaivaa iththihaadhuge gulhumah buroo araigen nuvaane. Adhi JP in ekan viyakaves nudheynan.
— Qasim Ibrahim (@qasimibrahim) December 18, 2017
ޤާސިމް އެ ޓްވީޓް ކުރެއްވިތާ ގިނަ އިރުތަކެއް ނުވެ، ރައީސް ނަޝީދު ކުރެއްވި ޓްވީޓެއްގައި ވިދާޅުވީ ޝުކުރިއްޔާ ކަމަށެވެ. އިތުރު އެއްވެސް އެއްޗެއް ޓްވީޓްގައި ވިދާޅުވެފައެއް ނުވެއެވެ.
Shukuriya! https://t.co/3R5Hi2fcGt
— Mohamed Nasheed (@MohamedNasheed) December 18, 2017
އުމަރު ނަޝީރު ޖުމްހޫރީ ޕާޓީއާ ގުޅިވަޑައިގެންނެވުމުން އެމްޑީޕީ ހިތްހަމަނުޖެހިފައިވާއިރު ޕާޓީގެ ޗެއަރޕާސަން ހަސަން ލަތީފް ވިދާޅުވެފައި ވަނީ އެޕާޓީ ހަލާކުކޮށްލަން އުމަރު ނަސީރު އެމްޑީޕީއާ ވައި ވެސް އެޅުނަ ނުދޭނެ ކަމަށެވެ.
