ޗައިނާއާ އެކު ހެދި މިނިވަން ވިޔަފާރީގެ އެއްބަސްވުން މުރާޖާކުރަން އާ ސަރުކާރަށް މަޖުބޫރުވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ޗައިނާއާ އެކު ހެދި މިނިވަން ވިޔަފާރީގެ އެއްބަސްވުން މަޖިލިސް ތެރެއިން ނިންމާލީ ވަރަށް އަވަސް އަރުވާލައިގެން ކަމަށާއި، އަލަށް އިންތިހާބުވާ ސަރުކާރަށް އެ އެއްބަސްވުން އަލުން މުރާޖާކުރަން މަޖުބޫރުވާނެ ކަމަށެވެ.
ރައީސް ނަޝީދު މީގެ ކުރިން ޔޫޓިއުބްގައި އާންމުކުރެއްވި އޯޑިއޯ މެސެޖެއްގައި ވިދާޅުވީ، ރާއްޖެ އާއި ޗައިނާއާ ދެމެދު ވެވުނު މިނިވަން ވިޔަފާރީގެ އެއްބަސްވުން، އިނގިރޭސީންގެ ހިމާޔަތަށް ދިއުމަށް ދިވެހިން ވި އެއްބަސްވުމާ އެއްގޮތްވާ ކަމަށާއި، އެ އެއްބަސްވުމަކީ ދިވެހިންނަށް ފައިދާއެއް ނުލިބި، އެއްބަސްވުމުގެ ހުރިހާ ފޮނި މީރު ކަމެއް ޗައިނާއަށް ލިބޭ އެއްބަސްވުމެއް ކަމަށެވެ.
The FTA with China was unlawfully rushed through parliament. Beijing should understand that a new Gov. will be forced to review it.
— Mohamed Nasheed (@MohamedNasheed) December 15, 2017
ގިނަ ބައެއްގެ ފާޑުކިޔުންތައް އަމާޒުވެފައިވާ މި އެއްބަސްވުމުގައި ދިވެހި ސަރުކާރުން ސޮއިކޮށްފައި ވަނީ މިދިޔަ ހަފްތާގައެވެ. މި އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސައީދެވެ.
މިދިޔަ ހަފްތާގައި ރައީސް ޔާމީން ވަނީ ޗައިނާ އަށް ކުރެއްވި ރަސްމީ ދަތުރުފުޅެއްގައި އެ ގައުމާ ގުޅުން ބަދަހިކުރުމުގެ ގޮތުން 12 އެއްބަސްވުމެއްގައި ވަނީ ސޮއިކުރައްވާފައެވެ.
މި އެއްބަސްވުންތަކުގެ ތެރޭގައި ވިޔަފާރި އާއި އިޤްތިޞާދީ އަދި އިޖްތިމާޢީ ދާއިރާ އިން ދެޤައުމުގެ ގުޅުން އިތުރަށް ފުޅާ ކުރުމާއި، ޓެކްނޮލޮޖީގެ ދާއިރާއިން ރާއްޖެއަށް އިތުރު ކުރިއެރުންތައް ހޯދުމާއި، މިނޫން ވެސް ބައެއް އެއްބަސްވުންތައް ހިމެނެއެވެ.
