ޑްރައިވަރަކު ނެތި އެއް ތަނުން އަނެއް ތަނަށް މީހުން އުފުލުމަށް ޑުބާއީގައި ބޭނުން ކުރަން އުޅޭ އުދުހޭ ޓެކްސީ ހަރަކާތްތެރިވާ ގޮތް ދައްކާލައިފިއެވެ.
ޑުބާއީގެ އޮފިޝަލުން ބުނަނީ މަސައްކަތް ކުރަމުންދަނީ 2017 ގެ ނިޔަލަށް އަޖުމަ ބެލުމުގެ ދަތުރުތައް ފެށުމަށް ކަމަށެވެ. އެމިރޭޓްސް އިން ހާމަ ކޮށްފައިވާ ގޮތުގައި 2022 ގެ ތެރޭގައި ކަސްޓަމަރުންނަށް އުދުހޭ ޓެކްސީގެ ޚިދުމަތް ދެވޭ ވަރުވާނެއެވެ.
ޑުބާއީން މަސައްކަތް ކުރަމުންދަނީ ދުނިޔޭގެ ފުރަތަމަ އުދުހޭ ޓެކްސީގެ ޚިދުމަތް ދޭ ތަނަކަށް ޑުބާއީ ހެދުމަށެވެ.
އުދުހޭ ޓެކްސީ އުފެއްދުމުގެ މަސައްކަތް އެމިރޭޓްސް އިން ހަވާލު ކޮށްފައިވަނީ ޖަރުމަނު ވިލާތުގެ ވޮލޮކޮޕްޓަރ ކުންފުންޏަށެވެ. އުދުހޭ ޓެކްސީގެ ޓެސްޓް ފްލައިޓްގެ ހަރަކާތްތައް ބައްލަވާލެއްވުމަށްފަހު އެމިރޭޓްސްގެ ވަލީ އަހްދު ޝެއިޚް ހަމަދް ބިން މުހައްމަދު ބިން ރާޝިދު އަލް މަޚްތޫމް ވަނީ އުދުހޭ ޓެކްސީގެ އައު ޓެކްނޮލޮޖީއަށް ތައުރީފް ކުރައްވާފައެވެ.
އާއްމުންނަށް މި ޚިދުމަތް ހުޅުވާލުމުގެ ކުރިން ފަސް އަހަރުގެ މުއްދަތައް އެމިރޭޓްސްގެ ރޯޑް ޓްރާންސްޕޯޓް އޮތޯރިޓީ އާއި ސިވިލް އޭވިއޭޝަން އޮތޯރިޓީން ޓެސްޓް ކުރުމަށް ވަނީ ހަމަޖެހިފައެވެ.
އުދުހޭ ޓެކްސީގެ ޚިދުމަތް ތައާރުފް ކުރުމަކީ ދުނިޔޭގެ އެންމެ ސްމާޓް ސިޓީއަށް ޑުބާއީ ހެދުމަށް ކުރިއަށް ގެންދާ ޕްރޮގްރާމްގައި ހިމެނޭ ކަމެކެވެ.
