އެމެރިކާގެ ރައީސް ޑޮނަލްޑް ޓްރަމްޕް އާއި، ކެނެޑާގެ ބޮޑު ވަޒީރު މާކް ކާނީ ބައްދަލު ކުރައްވައި މަޝްވަރާ ކުރައްވައިފި އެވެ.

ޓްރަމްޕް އާއި ކާނީ ބައްދަލު ކުރައްވާފައި ވަނީ އެމެރިކާގެ ރިޔާސީ ގަނޑުވަރު، ވައިޓް ހައުސްގަ އެވެ. އެ ބައްދަލުވުމުގައި ޓްރަމްޕް އާއި ކާނީ ވަނީ ގިނަ ކަންތައްތަކާ ގުޅޭ ގޮތުން މަޝްވަރާ ކުރައްވައިފަ އެވެ. އަދި ދެ ބޭފުޅުން ވަނީ، އެކަކު އަނެކަކަށް ހެޔޮ ބަސްތައް ވިދާޅުވެފަ އެވެ.

މިއީ އެމެރިކާގެ ރައީސް ކަމުގެ ދެ ވަނަ ދައުރަކަށް ޓްރަމްޕް ވަޑައިގެންނެވި ފަހުން، ކާނީ އެ ޤައުމަށް ކުރައްވާ ދެ ވަނަ ދަތުރުފުޅެވެ. ކާނީ އެމެރިކާ އަށް ވަޑައިގެންފައި ވަނީ، ޓްރަމްޕްގެ ވިޔަފާރީގެ ހަނގުރާމަ އާއި އިންޒާރު ތަކުގެ ސަބަބުން ދެ ޤައުމުގެ ގުޅުން ހީނަރުވެފައިވާ ދަނޑިވަޅެއްގަ އެވެ.

ޓްރަމްޕް އާއި ކާނީގެ ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެެވުނީ ވިޔަފާރި އާއި، އެމެރިކާ-މެކްސިކޯ-ކެނެޑާ އެއްބަސްވުމާ ގުޅޭ ގޮތުންނެވެ. އެ އެއްބަސްވުމަކީ ކެނެޑާގެ އިޤްތިސާދަށް ވަރަށް މުހިންމު، އަދި އަންނަ އަހަރު މުރާޖައާ ކުރަން ނިންމާފައިވާ އެއްބަސްވުމެކެވެ.

އެއްބަސްވުމާ ގުޅޭ ގޮތުން ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އޭނާގެ ރިޔާސީ ފުރަތަމަ ދައުރުގައި ސޮއި ކުރެވުނު ވިޔަފާރީގެ އެއްބަސްވުން އަލުން މުރާޖައާ ކުރުމަށް، ނުވަތަ ތަފާތު އެއްބަސްވުމަކަށް ހެދުމަށް އޭނާ ހުންނެވީ ތައްޔާރަށް ކަމަށެވެ.

ކާނީގެ ކުރިން ކެނެޑާގެ ބޮޑު ވަޒީރު ކަމުގައި ހުންނެވި ޖަސްޓިން ޓްރޫޑޯއާ ޓްރަމްޕްއާ ދެމެދު ގުޅުން ގޯސްވެ، ޓްރަމްޕް ވަނީ ޓްރޫޑޯ އަށް ރުޅިވެރި ކަމުގެ ރާގުގައި ވާހަކަ ދައްކަވައި، ފާޑު ވެސް ވިދާޅުވެފަ އެވެ. އެއާ ޚިލާފަށް، ޓްރަމްޕް ވަނީ ކާނީ އާއެކު ރަނގަޅު މަޝްވަރާތަކެއް ކުރްވައި، ގާތް ގުޅުމެއް ދައްކަވައިފަ އެވެ.

ކާނީ އަށް ނިސްބަތް ކުރައްވައި ޓްރަމްޕް ވިދާޅުވީ، ކާނީ އަކީ ދުނިޔޭގެ ފެންވަރުގައި ވެސް ފާހަގަކޮށްލެވޭ، އަދި ވަރުގަދަ ވާހަކަ ތަކެއް ދައްކަވާ ލީޑަރެއް ކަމަށެވެ. އެކަން ފާހަގަ ކުރައްވަމުން ޓްރަމްޕް ވިދާޅުވީ، އެމެރިކާ އިން ވެސް ބޭނުން ވަނީ ކެނެޑާ ކުރި އަރައިގެން ދާން ކަމަށެވެ. އޭނާ ވިދާޅުވީ ދެ ޤައުމަށް ވެސް ބޭނުން ވަނީ އެއްވަރެއްގެ ވިޔަފާރިއެއް ކަމަށެވެ.

އެމެރިކާ އާއި ކެނެޑާއާ ދެމެދު ވިޔަފާރީގެ އެއްބަސްވުމަކަށް ނާދެވެނީ ކީއްވެތޯ ސުވާލު ކުރުމުން ޓްރަމްޕް ވިދާޅުވީ، އެއީ ވަރަށް އުނދަގޫ މައްސަލައެއް ކަމަށެވެ. ޓްރަމްޕް ވިދާޅުވީ ދެ ޤައުމުގެ ދެ މެދުގައި ގިނަ ޚިޔާލު ތަފާތުވުން ތަކެއް ހުރި ކަމަށާއި، އެކަމަކު އެެއް ޤައުމު އަނެއް ޤައުމަށް ފުރިހަމަ އިޙުތިރާމް ވެސް އޮންނަ ކަމަށެވެ.

ޔޫރަޕިއަން ޔޫނިއަން އަދި އެމެރިކާގެ ވިޔަފާރީގެ އެހެން ބައިވެރިންނާ ޚިލާފަށް، އެމެރިކާގެ ސަރުކާރާއި ކެނެޑާއާ ދެމެދު ވިޔަފާރީގެ އެއްބަސްވުމަކަށް އާދެވިފައި ނުވެ އެވެ. ނަމަވެސް، ޓްރަމްޕްގެ ރިޔާސީ ފުރަތަމަ ދައުރުގައި އެއްބަސްވެފައިވާ އެމެރިކާ-މެކްސިކޯ-ކެނެޑާ (ޔޫއެސްއެމްސީއޭ) އެއްބަސްވުމާ އެއް ގޮތަށް އެންމެހާ މުދަލަށް ޓެރިފްގެ އިސްތިންސާ ދެމެހެއްޓިފައިވެ އެވެ.

ކެނެޑާގެ ބޮޑު ވަޒީރުގެ އޮފީހުން މީގެ ކުރިން ހާމަ ކޮށްފައިވާ ގޮތުގައި، އެ އެއްބަސްވުން ދެމެހެއްޓިފައި ވުމުގެ ސަބަބުން ކެނެޑާ އަކީ އެެމެރިކާގެ ވިޔަފާރި ބައިވެރިންގެ ތެރެއިން ޖުމުލަ ގޮތެއްގައި އެންމެ ދަށް ޓެރިފް ރޭޓު އޮތް ޤައުމެވެ. އެެގޮތުން ކެނެޑާގެ 85 އިންސައްތަ ވިޔަފާރި އެމެރިކާއާ އެކު ކުރެވެނީ ޓްރިފް ނުލައި ކަމަށް ހާމަ ކޮށްފައިވެ އެވެ.

ނަމަވެސް، ޓްރަމްޕްގެ ގްލޯބަލް، ސެކްޓަރ-ސްޕެސިފިކް ޓެރިފްތައް، ޚާއްސަކޮށް އޮޓޯމޯޓިވް، ސްޓީލް އަދި އެލުމިނިއަމް އަށް އަމާޒުކޮށްފައިވާ ޓެރިފް ތަކުން ކެނެޑާ އަށް ދަނީ ގެއްލުންތަކާ ކުރިމަތިލަމުންނެވެ. އެ ދާއިރާ ތަކުގައި ވަޒީފާ ގެއްލި، ދަތި އުނދަގޫ ޙާލަތެއްގައި އެ ސިނާއަތްތަކަށް އެހީވުމަށް ކާނީގެ ލިބަރަލް ސަރުކާރުން އެތައް ބިލިއަން އެމެރިކާ ޑޮލަރެއްގެ އިއުލާން ކުރަން ޖެހިފައިވެ އެވެ.