ރަޝިޔާ އިން ޔުކްރެއިންގައި ހިންގަމުން އަންނަ ހަނގުރާމަ ދިފާއު ކުރައްވައި، އެ ހަނގުރާމައިގެ ޒިންމާ ނަގަން ޖެހޭނީ ހުޅަނގުގެ ޤައުމު ތަކުން ކަމަށް، ރަޝިޔާގެ ރައީސް ވޮލަޑިމިއަރ ޕުޓިން ވިދާޅުވެއްޖެ އެވެ.

ޕުޓިން މިހެން ވިދާޅުވެފައި ވަނީ ޗައިނާގައި ކުރިއަށް ދިޔަ ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ގެ ސަމިޓުގައި ބައިވެރިވެ ވަޑައިގެން ވާހަކަ ދައްކަވަމުންނެވެ. އެ ސަމިޓުގައި ވާހަކަ ދައްކަވަމުން ޕުޓިން ވަނީ އެ ހަނގުރާމަ ވަރަށް ބޮޑަށް ދިފާއު ކުރައްވައިފަ އެވެ. އަދި އެ ހަނގުރާމަ ފެށުނީ ހުޅަނގުގެ ޤައުމު ތަކުގެ ސަބަބުން ކަމަށް ވެސް ޕުޓިން ވިދާޅުވި އެވެ.

ޗައިނާގެ ޓިއަންޖިން ސިޓީ ގައި ކުރިއަށް ގެންދިޔަ އެސްސީއޯ ސަމިޓުގައި ޕުޓިން ވިދާޅުވީ، އެ ހަނގުރާމަ ފެށެން މެދުވެރިވި މައިގަނޑު ސަބަބަކީ ރަޝިޔާ އިން ޔުކްރެއިން އަށް ހަމަލާ ދިނުން ނޫން ކަމަށެވެ. އޭގެ ބަދަލުގައި އެއީ ހުޅަނގުގެ ޤައުމު ތަކުން އެއްބައިވެގެން ޔުކްރެއިންގައި ހިންގި ސަރުކާރު ވައްޓާލުން، ނުވަތަ ބަޣާވާތެއްގެ ނަތީޖާ ކަމަށް ޕުޓިން ވިދާޅުވެފައިވެ އެވެ.

ޕުޓިން އެ އިޝާރާތް ކުރައްވާފައި ވަނީ 2013 އިން 2014 އަށް، ޔުކްރެއިންގައި ހިންގި ޔޫރަޕު-ރައްޓެހި އިންޤިލާބަށެވެ. އެ އިންޤިލާބުގައި ރަޝިޔާއާ ރައްޓެހި ރައީސަކު ވަނީ ވެރިކަމުން ވައްޓާލެވިފަ އެވެ. އޭގެ ބަދަލުގައި ރަޝިޔާ އިން ކްރައިމިއާ އަތުލައި، އިރުމަތީ ޔުކްރެއިންގެ ވަކި ވަކި ޙަރަކާތްތަކަށް އެހީތެރިވެދީ، ހަނގުރާމަ އަށް މަގު ފަހި ކުރި އެވެ.

އިތުރަށް ޕުޓިން ވިދާޅުވެފައި ވަނީ، އެ ހަނގުރާމަ ފެށުމަށް މެދުވެރިވި ދެ ވަނަ ސަބަބަކީ ހުޅަނގުގެ ޤައުމު ތަކުން، ޔުކްރެއިން ނޭޓޯ އަށް ވެއްދުމަށް ކުރަމުން އަންނަ ދެމެހެއްޓެނިވި މަސައްކަތް ކަމަށެވެ. ޕުޓިން މީގެ ކުރިން ވެސް ވަނީ، ނޭޓޯ އިން ޔުކްރެއިން އަށް ފުރުސަތު ދިނުމާ ދެކޮޅަށް ވާހަކަ ދައްކަވައިފަ އެވެ.

އެ ބައްދަލުވުމުގައި ޕުޓިން ވިދާޅުވެފައި ވަނީ ދުނިޔެ އަށް މިހާރު ބޭނުން ވަނީ، ޔޫރަޕަށް އަމާޒުކޮށްފައިވާ މޮޑެލްތައް ބަދަލުކޮށް، ގިން ޤައުމު ތަކުގެ މަސްލަޙަތު ހިމާޔަތް ކުރާނެ ނިޒާމެއް ކަމަށެވެ. އެ ބައްދަލުވުމުގައި ޕުޓިން އެ ވާހަކަތައް ދެއްކެވިއިރު، އެ ބައްދަލުވުމުގައި ޗައިނާގެ ރައީސް ޝީ ޖިންޕިންގެ އިތުރުން، އިންޑިއާގެ ބޮޑު ވަޒީރު ނަރެންދްރަ މޯދީ އަދި އީރާންގެ ރައީސް މަސްއޫދު ޕެޒެޝްކިއާ ފަދަ ރަޝިޔާގެ އެކުވެރިން ބައިވެރިވި އެވެ.

ރަޝިޔާ-ޔުކްރެއިން ހަނގުރާމައާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ، ހަނގުރާމަ ހުއްޓާލުމަށް ދެ ޤައުމަށް ވެސް ގޮވާލައްވައިފަ އެވެ. ނަމަވެސް، ސުލްޙަވެރިކަން ޤާއިމު ކުރުމަށް ކުރަމުން އަންނަ މަސައްކަތުގެ މާބޮޑު ނަތީޖާތަކެއް ފެނިފައި ނުވެ އެވެ. ޕުޓިން ވަނީ ހަނގުރާމަ ހުއްޓާލުމަށް ގޮވާލައި އަޑުތައް ބަލައި ނުގަނެ، ޔުކްރެއިންގެ އިތުރު ސަރަހައްދުތައް ދޫކޮށްލުމާއި، ހުޅަނގުގެ އެހީތެރިކަން ދޫކޮށްލުމަށް ވެސް ގޮވާލައްވައިފަ އެވެ.

ނަމަވެސް، އެކަމާ ގުޅިގެން ޔުކްރެއިން އިން ވަނީ އެ ޝަރުތު ތަކަށް އެއްބަސް ނުވާނެ ކަމަށް ތަކުރާރުކޮށް ހާމަކޮށްފަ އެވެ. ޔުކްރެއިން އިން ބުނަމުން ގެންދަނީ އެ ޤައުމުގެ ބިމުން އެއްވެސް ބައެއް ދޫކޮށް ނުލާނެ ކަމަށާއި، އެ ޤައުމުގެ ޤާނޫނު އަސާސީއާ ޚިލާފު އެއްވެސް ހުށަހެޅުމެއް ބަލައި ނުގަންނާނެ ކަމަށެވެ. އަދި ހަނގުރާމަ ހުއްޓާލަން ވަނީ އެއްވެސް ޝަރުތެއް ނެތި ކަމަށް ޔުކްރެއިން އިން އަންނަނީ ބުނަމުންނެވެ.

ދާދި ފަހުން ޕުޓިން ވަނީ، އެމެރިކާގެ ރައީސް ޓްރަމްޕްއާ އެކު އެލަސްކާގައި ބައްދަލު ކުރައްވައިފަ އެވެ. އެ ބައްދަލުވުމަށް އިޝާރާތް ކުރައްވައި ޕުޓިން ވިދާޅުވީ، އެ ހަނގުރާމަ ނިންމުމުގެ ޑިޕްލޮމަސީއާ ގުޅޭ ގޮތުން ޓްރަމްޕާ އެކު އިތުރު މަޝްވަރާ ކުރުންތައް ވެސް ކުރިއަށް ގެންދަވާނެ ކަމަށެވެ.

އެ ބައްދަލުވުމުގައި ޕުޓިން ވަނީ، އިންޑިއާގެ ބޮޑު ވަޒީރު މޯދީ އާއި، އީރާންގެ ރައީސް ޕެޒެޝްކިއާން ވެސް ބައްދަލު ކުރައްވައިފަ އެވެ.