އެމެރިކާގެ ރައީސް ޑޮނަލްޑް ޓްރަމްޕްގެ ޞިއްޙީ ޙާލަތާ ގުޅޭ ގޮތުން ގިނަ ކަންބޮޑުވުން ތަކެއް އުފެދިފައިވާ މި ދަނޑިވަޅުގައި، ޓްރަމްޕް ނެތް ޙާލަތެއްގައި ރައީސްކަމާ ހަވާލުވާން ތައްޔާރަށް ހުންނެވި ކަމަށް އޭނާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

ދާދި ފަހުން ނައިބު ރައީސް ވޭންސް ދެއްވި އިންޓަވިޔުއެއްގައި އޭނާ ވިދާޅުވީ، ޓްރަމްޕް އަށް ނުރައްކާތެރި ހާދިސާއެއް، ނުވަތަ ކަމެއް ދިމާ ވެއްޖެ ނަމަ، ރައީސް ކަމުގެ މަޤާމާ ހަވާލުވާން ތައްޔާރަށް ހުންނެވި ކަމަށެވެ. މި ވާހަކަރައް ވޭންސް ދައްކަވާފައި މި ވަނީ، ޓްރަމްޕްގެ ޞިއްޙީ ޙާލުކޮޅާ ގުޅޭ ގޮތުން އެމެރިކާގެ ރައްޔިތުންގެ މެދުގައި ވެސް ކަންބޮޑުވުން ތަކެއް އުފެދިފައި ވަނިކޮށެވެ.

މިދިޔަ ޖުލައި މަހުގެ ތެރޭގައި ވަނީ، ޓްރަމްޕްގެ އަތް ތިލައިގައި ލޭ ގަނޑުވެފައި ހުންނަ މަންޒަރު ފެންނަ ވީޑިއޯ އަދި ފޮޓޯ ސޯޝަލް މީޑިއާގައި ދައުރުވެފަ އެވެ. އެކަމާ ގުޅިގެން އެމެރިކާގެ ރިޔާސީ ގަނޑުވަރު ވައިޓް ހައުސް އިން ބުނެފައި ވަނީ، ޓްރަމްޕް އަށް ކްރޮނިކް ވީނަސް އިންސަފިޝެންސީ (ސީވީއައި)ގެ ބައްޔެއް ޖެހިފައިވާ ކަމަށެވެ.

އެ ބައްޔަށް ޓްރަމްޕް ފަރުވާ ހޯއްދަވަމުން ގެންދަވާ ކަމަށާއި، އެ ބައްޔަކީ އާންމު އަދި ނުުރައްކާތެރި ކަމެއް ނެތް ބައްޔެއް ކަމަށް ޑޮކްޓަރުން ބުނެފައިވާ ކަމަށް ވައިޓް ހައުސް އިން ހާމަކޮށްފައިވެ އެވެ. އަދި ޓްރަމްޕް ހުންނެވީ ޞިއްޙީ ގޮތުން "ގަދަފަދަ"ކޮށް ކަމަށާއި، ރައީސް ކަމުގެ މަސްއޫލިއްޔަތު އަދާ ކުރެވޭ ޙާލަތުގައި ކަމަށް ވެސް ބުނެފައިވެ އެވެ.

ނަމަވެސް، މިދިޔަ ހަފުތާގެ ބުދަ ދުވަހުން ފެށިގެން ހުކުރު ދުވަހާ ހަމައަށް ވެސް، އާންމުންނަށް ޓްރަމްޕް ފެނިފައި ނުވާ ކަމަށް މީޑިއާ ތަކުގައި ބުނެފައިވެ އެވެ. އެގޮތުން މީޑިއާތަކާ ވެސް ގާތް ގުޅުމެއް ބާއްވަވާ ޓްރަމްޕް، މީޑިއާތަކަށް، އަދި ކެމެރާތަކުގެ ކުރި މައްޗަށް ވެސް ނިކުމެ ވަޑައިގެންފައި ނުވާ ކަމަށް ބުނެފައިވެ އެވެ.

އެކަމާ ގުޅިގެން ސޯޝަލް މީޑިއާ ގައި އެމެރިކާގެ ގިނަ ބަޔަކު ވަނީ ޝުއޫރު ފާޅު ކުރަން ފަށައިފަ އެވެ. އެގޮތުން ސޯޝަލް މީޑިއާގެ ޕްލެޓްފޯމެއް ކަމަށްވާ ޓިކްޓޮކްގައި "ރައީސް ޓްރަމްޕް އަވަހާރަވެއްޖެ ކަމަށް މަގުމަތީގައި ދެކެވޭ". މި ސުރުޚީގެ ދަށުން ޕޯސްޓު ކޮށްފައިވާ ވީޑިއޯ ވެސް ވަނީ، 3.5 މިލިއަން ފަހަރު ބަަލައިފަ އެވެ.

ޔޫއެސް ޓުޑޭ އަށް ދެއްވި އިންޓަވިޔުގައި ނައިބު ރައީސް ވޭންސް ވިދާޅުވީ، ރައީސް ޓްރަމްޕްގެ ޞިއްޙީ ޙާލަތު ރަނގަޅު ކަމަށާއި، އެއްވެސް ނުރައްކާތެރި ހާދިސާއެއް ދިމާވެއްޖެ ނަމަ، ރައީސް ކަމުގެ މަޤާމާ ހަވާލުވުމަށް އޭނާ ތައްޔާރަށް ހުންނެވި ކަމަށެވެ.

މީޑިއާ ތަކުގައި އެމެރިކާގެ ގިނަ ރައްޔިތުން އެކަމުގެ ކަންބޮޑުވުން އަދި ޝުއޫރު ފާޅު ކުރަމުން ގެންދިޔަ ނަމަވެސް، ރައީސް ޓްރަމްޕް މަސައްކަތުގައި އުޅުއްވާ ކަމަށް ވަނީ ރިޕޯޓު ކޮށްފަ އެވެ. ހޮނިހިރު ދުވަހު ޓްރަމްޕް ބައެއް ނޫސްވެރިންނަށް ފެނިފައިވާ ކަމަށާއި، މީޑިއާތަކާ ވާހަކަ ދައްކަވާފައިވާ ކަމަށް ވެސް ރިޕޯޓު ކޮށްފައިވެ އެވެ.

އެމެރިކާގެ ރައީސް ކަމުގެ ބާރުތައް ލިބޭ ތަރުތީބި ކަނޑައަޅާފައި ވަނީ، 1792 ވަނަ އަހަރު ފާސްކޮށްފައިވާ "ޕްރެޒިޑެންޝަލް ސަކްސެޝަން އެކްޓް"ގެ ދަށުންނެވެ. މި ޤާނޫނުގެ ދަށުން ރައީސް އަށް މަގާމުގެ އަދާ ނުކުރެވޭ ޙާލަތެއްގައި، ނައިބު ރައީސް، ހައުސް ސްޕީކާ، އަދި ކެބިނެޓުގެ މެމްބަރުންނަށް ވާރުތަވާ ގޮތަށް އޮތީ ލިޔެވިފައިވެ އެވެ.

އެމެރިކާގެ ތާރީޚަށް ބަލާއިރު، 15 ފަހަރެއްގެ މަތިން ނައިބު ރައީސުން ވަނީ ރައީސް ކަމުގެ މަޤާމާ ހަވާލުވެ ވަޑައިގެންފަ އެވެ. މީގެ ތެރެއިން އަށް ފަަހަރެއްގެ މަތިން ހަވާލުވެފައި ވަނީ ރައީސް އަވަހާރަވުމާ ގުޅިގެންނެވެ. އަދި ހަތަރު ނައިބު ރައީސަކު ވަނީ ފަހުން އިންތިޚާބުގައި ވާދަކުރައްވައި ކާމިޔާބު ހޯއްދަވައިފަ އެވެ.

އެމެރިކާގައި އަމަލު ކުރަމުން އަންނަ "ޓްވެންޓީ ފިފިތް އެމެންޑްމެންޓް" ތައާރަފު ކޮށްފައި ވަނީ 1965 ވަނަ އަހަރު ރައީސް ޖޯން އެފް ކެނެޑީ އަވަހާރަވުމާ ގުޅިގެންނެވެ. މި އިސްލާހުގެ ދަށުން، ރައީސަކު މަގާމުން ވަކި ކުރުމާއި، އަވަހާރަވުމާއި، އިސްތިއުފާ ދިނުމުގެ ޙާލަތްތަކުގައި ނައިބު ރައީސް ކަމުގައި ހުންނަވައި ބޭފުޅަކު، ރައީސް ކަމާ ހަވާލުވާނެ ގޮތް ސާފުކޮށް ބަޔާން ކޮށްފައިވެ އެވެ.