ޔުކްރެއިންގެ ރައީސް ވުލޮޑިމިއަރ ޒެލެންސްކީއާ ބައްދަލު ކުރުމަށް، ރަޝިޔާގެ ރައީސް ވޮލަޑިމިއަރ ޕުޓިން އެއްބަސްނުވެއްޖެ ނަމަ، އެއީ އެމެރިކާގެ ރައީސް ޑޮނަލްޑް ޓްރަމްޕް މަކަރު ހެއްދެވުން ކަމަށް ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ.

ޖަރުމަނުގެ ޗާންސެލަރ ފްރިޑްރިޗް މާޒްއާ އެކު ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މެކްރޮން ވިދާޅުވީ، އެމެރިކާގެ ރައީސް ޓްރަމްޕް ކަނޑައަޅުއްވާފައިވާ ސުން ގަޑި އަށް އެކަން ނުވެއްޖެ ނަމަ، އެއީ ޓްރަމްޕް މަކަރު ހެއްދެވުން ކަމަށާއި، ޕުޓިން ޓްރަމްޕް އަށް އޮޅުވާލެއްވީ ކަމަށެވެ.

ޓްރަމްޕް ވަނީ އެލަސްގާއި ދާދި ފަހުން ޕުޓިންއާ އެކު ބައްދަލު ކުރައްވައިފަ އެވެ. އޭގެ ފަހުން ޒެލެންސްކީ އަދި ޔޫރަޕުގެ ޤައުމު ތަކުގެ ވެރިން ވަނީ އެމެރިކާ އަށް ވަޑައިގެން ޓްރަމްޕްއާ ބައްދަލު ކުރައްވައިފަ އެވެ. ޓްރަމްޕް ވިދާޅުވެފައި ވަނީ، އެލަސްކާގެ ބައްދަލުވުމަށް ފަހު، ޕުޓުން އާއި ޒެލެންސްކީ އަދި ޓްރަމްޕްގެ ބައްދަލުވުމެއް ވެސް އޮންނާނެ ކަމަށެވެ.

އޭގެ ފަހުން ޓްރަމްޕް ވިދާޅުވަމުން ގެންދަވަނީ، ރަޝިޔާ އަދި ޔުކްރެއިންގެ ލީޑަރުން ބައްދަލު ނުކުރައްވައިފި ނަމަ، އެކަމުގެ ސަބަބުން އެހެން ނަތީޖާ ތަކެއް ވެސް ނިކުމެދާނެ ކަމަށެވެ. ޓްރަމްޕްގެ އެ އިންޒާރު ދިނުން އައިސްފައި ވަނީ، ރަޝިޔާ އާއި ޔުކްރެއިންގެ ރައީސުންގެ ބައްދަލުވުމަކަށް މިހާތަނަށް އެއްބަސްވެވިފައި ނުވާ ކަމަށް ރަޝިޔާ އިން ވެސް ބުނެފައި ވަނިކޮށެވެ.

ހުކުރު ދުވަހު ޔުކްރެއިންގެ ރައީސް ޒެލެންސްކީ ވިދާޅުވެފައި ވަނީ، ރަޝިޔާގެ ރައީސް ޕުޓިންއާ އެކު ދެ ފަރާތުގެ ބައްދަލުވުމަކަށް އެއްބަސްވުމަށް، އެ ހަފުތާ ނުވަތަ ދެ ހަފުތާގެ މުއްދަތެއް ދެއްވާނެ ކަމަށް ޓްރަމްޕް ވިދާޅުވެފައިވާ ކަަމަށެވެ. އަދި އެ މުއްދަތުގެ ތެރޭގައި އެއްބަސް ނުވެއްޖެ ނަމަ، ރަޝިޔާއާ ދެކޮޅަށް އިތުރު ފިޔަވަޅު ތަކެއް އަޅުއްވާނެ ކަމަށް ޓްރަމްޕް ވިދާޅުވެފައިވާ ކަމަށް ޒެލެންސްކީ ހާމަކުރެއްވި އެވެ.

ޒެލެންސްކީ ވިދާޅުވީ ޓްރަމްޕް ދެއްވާފައިވާ ދެ ހަފުތާގެ މުއްދަތު، އަންނަ ހޯމަ ދުވަހުގެ ނިޔަލަށް ހަމަވާނެ ކަމަށާއި، އެކަން ހުރިހާ ފަރާތްތަކަށް ވެސް ހަނދާން ކޮށްދޭން ބޭނުންވާ ކަމަށެވެ. އަދި ޔުކްރެއިން އޮތީ ޖަވާބެއްގެ އިންތިޒާރުގައި ކަމަށާއި، ދިގު ދަންމައިގެން ކަންކަން ކުރުމަަކީ ޙައްްލެއް ނޫން ކަމަށް ވެސް އޭނާ ވިދާޅުވި އެވެ.

ރަޝިޔާގެ ރައީސް ޕުޓިން އަދި ޔުކްރެއިންގެ ރައީސް ޒެލެންސްކީގެ ބައްދަލުވުމަކަށް ޤައުމު ތަކުން ބާރުއަޅަމުން އަންނައިރު، އެ ބައްދަލުވުމަކީ ރަޝިޔާ-ޔުކްރެިން ހަނގުރާމައިގެ ޙައްލެއް ހޯދުމަށް ކުރެވޭ މަސައްކަތްތަކުގެ ތެރެގައި މުހިންމު ކަމެއް ކަމަށް ގިނަ ފަރާތްތަކުން ދެކެ އެވެ.

އެފަދަ ބައްދަލުވުމެއް ބޭއްވުމަށް، އެމެރިކާ އާއި ޔޫރަޕުގެ ލީޑަރުން އަދި ބައިނަލްއަޤުވާމީ މުޖުތަމައުން ވެސް އަންނަނީ ވަރަށް ބޮޑަށް ބާރު އަޅަމުންނެވެ. އަދި ޔުކްރެއިން އޮތީ އެ ބައްދަލުވުމަށް ތައްޔާރަށް ކަމަށް މީގެ ކުރިން ވެސް ޒެލެންސްކީ ވިދާޅުވެފައިވެ އެވެ.