2024 ގައި ތަރައްގީކޮށް ނިންމައި ހުޅުވަން ވައުދުވި މަކުނުދޫ އެއަރޕޯޓު ނުހުޅުވުމުން ރައީސުލް ޖުމްހޫރިއްޔާގެ އައު ވައުދުފުޅަކާއެކު މަކުނުދޫ އަށް ވަޑައިގެންފި އެވެ.

ހދ. މަކުނުދޫ އެއާޕޯޓު ތަރައްގީކޮށް ނިންމައި ހުޅުވުމުގެ މަސައްކަތް ކުރައްވަމުން ދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ މިދިޔަ އަހަރު ފެބުރުއަރީ 26 ވަނަ ދުވަހު އެވެ. އެދުވަހު ރައީސް ވިދާޅުވީ ހދ. މަކުނުދޫ، އިފާސާ އަހްމަދު ކުރި ސުވާލަކަށް "ރައީސްގެ ޖަވާބު" ޕްރޮގްރާމް ތެރެއިން ޖަވާބު ދެއްވަމުންނެެވެ. އިފާސާގެ ސުވާލަކަށްވީ އެކަހެރިކޮށް އޮތް މަކުނުދޫ އެއާޕޯޓުގެ މަސައްކަތް ނިމި ދަތުުރުފަތުރުގެ ދަތިތަކަށް ހައްލެއް ލިބޭނީ ކޮން އިރަކުތޯ އެވެ.

އެ ސުވާލަށް ޖަވާބު ދެއްވަމުން ރައީސް ވިދާޅުވީ މިހާރު ކުރިއަށްދާ މަކުނުދޫ އެއާޕޯޓުގެ މަސައްކަތައް ސަރުކާރުން ވަރަށް ބޮޑަށް އިސްކަންދޭ ކަމަށެވެ. އަދި އެ މަސައްކަތް ބައްޓަން ކުރާނީ ރަށުގެ ރައްޔިތުންގެ އެދުމާ އެއްގޮތަށް ކަމަށް ރައީސް ވިދާޅުވި އެވެ. އެގޮތުން 15،00 މީޓަރަށް ހަދަން ހަމަޖެހިފައި އޮތް ރަންވޭ މިހާރު 18،00 މީޓަރަށް ދިގުކުރުމަށް ހަމަޖައްސާފައިވާކަން ވެސް ރައީސް ފާހަގަކުރެއްވި އެވެ.

2024 ވަނަ އަހަރުގެ ފެބްރުއަރީ މަހުގެ 26 ވަނަ ދުވަހު އެ ވީޑިއޯގައި ރައީސް ވިދާޅުވީ މަކުނުދޫ އެއާޕޯޓުގެ މަސައްކަތް ވަރަށް ބާރު ދުވެލީގައި ކުރިއަށްދާ ކަމަށާއި، އެ އަހަރުގެ ތެރޭގައި އެ އެއާޕޯޓު ހުޅުވުމުގެ މަސައްކަތް ކުރައްވަމުންދާ ކަމަށެވެ.

އޭގެ ފަހުން މި އަހަރު ހދ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން އަންގާރަ ދުވަހު މަކުނުދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ރައިސް ވިދާޅުވީ މަކުނުދޫއަކީ ވަރަށް އެކަހެރިކޮށް ވަކިން އޮންނަ ރަށެއް ކަމަށާއި ދަތުރު ފަތުރު ކުރުމުގައި ވެސް އެންމެ އުނދަގޫ އެއް ހިސާބު ކަމަށެވެ. އެހެން ކަމުން ދެމެހެއްޓެނިވި ތަރައްގީގެ ސިޔާސަތުން ބަލާއިރު މަކުނުދޫގައި އެއަރޕޯޓެއް ގާއިމް ކުރުމަކީ ޒަރޫރި ކަމެއް ކަމަށް ރައިސް ވިދާޅުވި އެވެ.

ރައީސް ވިދާޅުވީ އެއަރޕޯޓުގެ ސަބަބުން ދަތުރުފަތުރު ކުރުމަށް ލިބޭ ކުރިއެރުމުގެ ސަބަބުން މަކުނުދޫގައި އިގްތިސޯދީ ތަރައްގި އެހެން ހަރުފަތަކަށް ގެންދިއުމަށް ރައްޔިތުންނަށް ލިބޭނެ ވަރަށް ބޮޑު ވަސީލަތަކަށްވެ ވަރަށް މުހިންމު ދޮރާއްޓަކަށް އެ އެއަރޕޯޓު ވެގެން ދާނެ ކަމަށެވެ.

ރައީސް ވިދާޅުވީ ރަށުގެ ބޭނުމަށް 22 ހެކްޓަރުގެ ބިން ހިއްކޭނެ ކަމަށާއި އަދި އެއަރޕޯޓުގެ ހުރިހާ ކަމެއް ފުރިހަމަ ވާނެ ކަމަށެވެ. އަދި އެއަރޕޯޓު އޮޕަރޭޓު ކުރަން ހަވާލުވަނީ އެމްއޭސީއެލް ކަމަށާއި މިހާރުން ފެށިގެން އެމްޓިސީސީ އާއި ސަރުކާރުގެ ކަމާބެހޭ ވުޒާރާއާ އެކީގައި ވަރަށް ގާތުން މަސައްކަތްތައް ކުރަން ފަށާނަން ކަމަށްވެސް ރައީސް ވިދާޅުވި އެވެ.

ރައީސް މުޢިއްޒު ވަނީ މަކުނުދޫ އެއަރޕޯޓުގެ މަސައްކަތް އެންމެ އިސްކަމެއްދީގެން ވަރަށް ބާރު ސްޕީޑުގައި ނިންމައިދޭނެ ކަމުގެ ޔަގިންކަން މަކުނުދޫ ރައްޔިތުންނަށް ދެއްވާފަ އެވެ.