އާސަންދަ އަކީ ދައުލަތުގެ އިގްތިސާދަށް އޮތް ބޮޑު ބުރައެއް ކަމަށާއި، އެ ބުރަ ލިބުމަކީ ރައްޔިތުން އެދޭ ގޮތް ނޫން ކަމަށް މިނިސްޓަރ އޮފް ހެލްތް އަބްދުﷲ ނާޒިމް ވިދާޅުވެއްޖެއެވެ.
2004 ވަނަ އަހަރުން ފެށިގެން ޚިދުމަތް ދެމުން އަންނަ، ހުޅުމާލޭ ހޮސްޕިޓަލް ހުޅުވުމަށް ހޮނިހިރު ދުވަހު ބޭއްވި ރަސްމިއްޔާތުގައި ނާޒިމު ވިދާޅުވީ، ރައްޔިތުން ބޭނުންވަނީ ސިއްހީ ނިޒާމަކީ އެންމެ ހައްގުވެރިންނަށް އެންމެ ފައިދާވާނެ ނިޒާމަކަށް ވުން ކަމަށެވެ.
ޚިދުމަތްތަކެއް އަލަށް ޤާއިމްކޮށް ޓަރޝަރީ ފެންވަރުގައި ހުޅުމާލެ ހޮސްޕިޓަލް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި މިނިސްޓަރު ވިދާޅުވީ، އާސަންދަ ނިޒާމަށް ދައުލަތުގެ ބަޖެޓުން ކޮންމެ އަހަރަކު ވަކި އަދަދެއް ހަމަޖައްސާފައި ވީނަމަވެސް، އެ ފައިސާއިން މިހާތަނަށް އެއްވެސް އަހަރެއްގައި ފޫބެއްދިފައި ނުވާ ކަމަށެވެ.
"އެއްވެސް އަހަރެއްގައި އެކަމަށް ރައްޔިތުންގެ މަޖިލީހުން ފާސްކުރާ ބަޖެޓުން ނުފުދި، ކޮންމެ އަހަރަކު އެއަށް ފައިސާ އަޅައަޅަ ތިބެންޖެހުމުގެ ސަބަބުން މުޅި ނިޒާމުވަނީ ދައުލަތުގެ އިގްތިސާދަށް ބޮޑުބުރައަކަށް ވެފަ، މީ ދިވެހި ރައްޔިތުން އެދޭ ގޮތެއް ނޫން،" ނާޒިމް ވިދާޅުވިއެވެ.
މިނިސްޓަރު ނާޒިމް ވިދާޅުވީ، ސިޔާސީ ގޮތުން އުފުލަންޖެހޭ ބުރަ ބޮޑުވެދާނެތީ އާސަންދަ ނިޒާމު އިސްލާހު ކުރުމަށް މިހާތަނަށް އެއްވެސް ސަރުކާރަކުން މަސައްކަތް ކޮށްފައި ނުވާ ކަމަށެވެ. ނަމަވެސް މި ސަރުކާރުން ވަނީ އާސަންދަ ނިޒާމުގެ އިސްރާފު ކުޑަކުރުމަށް ހާއްސަ ޕްލޭނެއް އެކަށައަޅައި ތަންފީޒު ކުރަން ފަށާފައި ކަމުގައެވެ.
"ގަޔަށް ދޫ. ހައްޓަށް ލުއި ސިޔާސަތުތަކެއް ކުރީގަ ގެންގުޅެވިފަ އޮތުމުގެ ސަބަބުން ނޫނީ ސިޔާސީގޮތުން އަދާކުރަންޖެހިދާނެ އަގެއްގެ ބޮޑުކަމުގެ ސަބަބުން ފަސްއެނބުރި ބަލާލާ މި ނިޒާމު ގެންދެވެނީ ދިވެހި ރައްޔިތުންނަށް އެންމެ ލާބަޔާ މަންފާހުރި ގޮތުގަތޯ އެސުވާލު އުފައްދާނެ ސިޔާސީ ވެރިން މަދުވިކަން އެއީ ހިތާމަ ކުރަންޖެހޭކަމެއް،" ނާޒިމް ވިދާޅުވިއެވެ.
ކޮންމެ އަހަރެއްގެ ބަޖެޓު ދިރާސާކޮށް ބަލާއިރު، ކަނޑައަޅާ އަދަދަށްވުރެ ބޮޑު ހޭދައެއް ކުރަންޖެހޭ ކަމަށާއި މިކަމުން އެނގެނީ އެ ނިޒާމުގައި އިސްލާހުކުރަންޖެހޭ ކަންތައްތަކެއް ހުރިކަންކަމަށް މިނިސްޓަރު ފާހަގަކުރެއްވިއެވެ.
މި ސަރުކާރުން ވަނީ އާސަންދަ ނިޒާމު ހަރުދަނާ ކުރުމަށް މަހަކު 60،000 ރުފިޔާއަށް ވުރެ ގިނައިން އާމްދަނީ ލިބޭ ނުވަތަ އިންކަމް ޓެކްސް ދައްކަންޖެހޭ ފަރާތްތަކުގެ އަތުން ހެލްތް ކޮންޓްރިބިއުޝަން އެއް ދައްކަން ޖެހޭ ގޮތަށް ހަދަން އަންނަ އަހަރަށް ލަފާކުރާ ބަޖެޓުގައި ހިމަނައިފައެވެ..
މީގެއިތުރުން ސަރުކާރުންވަނީ ޕްރައިވެޓް އިންޝުއަރެންސް ހުސްނުވަނީސް އާސަންދަ ބޭނުން ނުކުރެވޭ ގޮތް ހެދުމާ ގުޅިގެން އުފެދުނު ހިތްހަމަނުޖެހުންތަކަށް ހައްލެއް ގެނައުމުގެ ގޮތުން، އަމިއްލަ ޖީބުން ފައިސާ ދައްކަން ޖެހޭ ހުރިހާ ހާލަތެއްގައި އާސަންދަ ލިބޭނެކަމަށް ބުނެފައެވެ.
ރާއްޖޭގެ ހުރިހާ ރައްޔިތުންނަށް އާސަންދަ ނިޒާމުގެ ޚިދުމަތް ލިބޭތާ 15 އަހަރު ވެފައިވާއިރު އެއްވެސް ވެރިކަމެއްގައި އާސަންދަ ލިބުމުގައި ރައްޔިތުންނަށް ދަތިވާނެ އެއްވެސް ކަމެއް ކޮށްފައި ނުވާކަން ފާހަގަ ކުރެވެއެވެ.
