ށ.އަތޮޅުގައި ވެރިކަން ކުރާ ފުނަދޫއަކީ ގުދުރަތީ ގޮތުން އެތައް މުއްސަންދިކަމާއި، ރީތިކަން ލިބިފައިވާ އެއްރަށެވެ. މުޅި ރާއްޖޭގެ އިތުރުން އެ އަތޮޅަށް ވެސް އެރަށުގެ ގުދުރަތީ ރީތިކަން މަޝްހޫރެވެ. ކުދިކުދި ޖަޒީރާ މިރަށްތަކުގެ ތެރޭގައި ފުނަދޫ ޚާއްސަވެފައިވަނީ އެރަށުގެ ދިގު މިނަށް އޮންނަ ދަށްފަޅު ކުޅީގެ ސަބަބުންނެވެ. ފުނަދޫ ފަޅުތެރޭގައި އޮންނަ ކުޑަ ދެރަށާއި ކުޑަހުރައަކާ ދޭތެރޭގައި އޮންނަ ރީތި ތިލަ ފަޅަށް ''ދަށްފަޅު'' މި ނަންދާފައިވާއިރު، މި ސަރަހައްދު ބަލާލުމަށް ގިނަ އަދަދެއްގެ ބަޔަކު މިރަށަށް ޒިޔާރަތް ކުރެއެވެ. މީގެ އިތުރުން ހިޖުރަކުރާ ދޫނީގެ ތެރެއިން އެކި ބާވަތުގެ ދޫނިތައް ވެސް މިސަރަހައްދަށް އެކި މޫސުންތަކުގައި އާދެއެވެ. އޭގެތެރޭގައި ފްލެމިންގޯ ހިމެނެއެވެ.

ދަށްފަޅުގެ ފުއްޓަރު ފަރާތުގައި ހެދިފައި ހުންނަ ކުރެދި އަދި ރަނޑޫ ގަހުގެ އިތުރުން މިފަދަ ކުޅިތަކުގެ ކައިރީގައި ހެދޭ ބޮޑަވަކި ފަދަ އެތައް ބާވަތެއްގެ ގަސްތަކެއްގެ ސަބަބުން މިސަރަހައްދުގެ ގުދުރަތީ ރީތިކަމަށް އިތުރު ފުރިހަމަކަން ލިބެއެވެ. ދަށްފަޅުގެ އެންމެ ޚާއްސަ އެއް ކަމަކީ އެތާ އުޅޭ ނޫމާ ނަމަކަށް ކިޔާ ކަކުންޏެވެ. މީގެ އިތުރުން އެކި ބާވަތްބާވަތުގެ މަހާއި، މަޑިއާއި، މިޔަރުވެސް މިސަރަހައްދުގައި ދިރިއުޅެއެވެ.

މާލެއާ 221 ކިލޯމީޓަރު ދުރުގައި އޮންނަ ފުނަދޫ ރައްޔިތުން ބޭނުންވަނީ ދަށްފަޅު ސަރަހައްދު ތަރައްގީކޮށް އިތުރު އާމްދަނީ ހޯދާނެ ގޮތެކެވެ. އެހެން ބަޔަކަށް ބަރޯސާނުވެ ރަށް ތަރައްގީ ކުރަން ބޭނުންވެއެވެ. އެހެންކަމުން މުޅި ރަށަށް ރީތިކަން ގެނެސްދޭ ދަށްފަޅު ސަރަހައްދުގެ ރީތިކަން ދަމަހައްޓަައި، އެތަނުން އާމްދަނީ ހޯދާނެ ޕްލޭންތައް ކައުންސިލުން ދަނީ ކުރަމުންނެވެ.

ރާއްޖެއެމްވީއަށް އެރަށު ކައުންސިލްގެ ރައީސް އަހުމަދު އިބްރާހިމްފުޅު ވިދާޅުވީ ދަށްފަޅު ސަރަހައްދުގައި ފަތުރުވެރިކަން ކުރިއެރުވުމަށް މަސައްކަތް ކުރަމުންދާތީ 9 އަހަރު ވެފައިވާ ކަމަށާއި، މިއީ ރައްޔިތުން ނުހަނު ބޭނުންވާ ކަމެއް ކަމަށެވެ. މިހާތަނަށް ކުރެވުނު މަސައްކަތުން ޓޫރިޒަމް މިނިސްޓްރީއާއެކު އަވަސް މުސްތަގުބަލެއްގައި އެކަމާ ގުޅޭ އެއްބަސްވުމުގައި ސޮއި ކުރެވޭނެކަމުގެ އުންމީދު އެބައޮތް ކަމަށް އޭނާ ވިދާޅުވިއެވެ.

ކައުންސިލުން ވަނީ ރަށުގެ ރައްޔިތުންގެ މަޝްވަރާއާއެކު، ދަށްފަޅު ސަރަހައްދުގައި ސިޓީ ހޮޓަލެއްގެ އިތުރުން އީކޯޕާކެއް ތަރައްގީ ކުރުމަށް ނިންމާފައެވެ. އެއާއެކު ސަރުކާރު ހިމާޔަތްކޮށްފައިވާ ފަރުކޮޅުން ވެސް އާމްދަނީ ހޯދާނެ ގޮތްތަކުގެ ޕްލޭން އޮތް ކަމަށް ކައުންސިލުންގެ ރައީސް ވިދާޅުވެފައިވެއެވެ.

ފުނަދޫ ރައްޔިތުން ގަބޫލުކުރާ ގޮތުގައި އެރަށުގެ ގުދުރަތީ ރީތި ކަމަކީ އެރަށުގެ ރައްޔިތުން ނަސީބެވެ. އެނަސީބުގެ ބޭނުން ހިފައި އެރަށުގެ ރައްޔިތުން މިއަދު ތިބީ ގުދުރަތީ ވަސީލަތްތައް ވިއްކައިގެން އާމްދަނީ ހޯދުމަށް ކެތްމަދުވެފައެވެ.

78 ހެކްޓަރުގެ ބޮޑު ސަރަހައްދެއް އޮންނަ މި ރަށަކީ އަތޮޅުގެ މީހުން ދިރިއުޅޭ ރަށްތަކުގެ ތެރެއިން ތިންވަނައަށް އެންމެ ބިން ބޮޑު ރަށް ކަމަށްވާއިރު، ކާމިޔާބުކަމާއެކު މިރަށުގައި ފަތުރުވެރިކަން ތަރައްގީ ކުރެވިއްޖެކަމަށްވާނަމަ މިއީ ރަށާއި، އަތޮޅުގެ އިތުރުން މުޅި ގައުމަށް ލިބޭނެ ކުރިއެރުމެއްނުންތޯއެވެ.