އެހެން ޤައުމުތަކާ އެކު ރާއްޖެ އިން ސޮއި ކޮށްފައިވާ އެއްބަސްވުންތައް ހާމަ ކުރައްވާނެ ކަމަށް މީގެ ކުރިން ވިދާޅުވި ނަމަވެސް، އެ އެއްބަސްވުންތައް ހާމަ ކުރެވޭނީ ޤައުމުތަކުން ރުހިގެން ކަމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެއްޖެ އެވެ.

2023 ވަނަ އަހަރު އޮތް ރިޔާސީ އިންތިޚާބުގައި އޭރުގެ އިދިކޮޅު ކެންޑިޑޭޓުގެ ގޮތުގައި ހުންނަވައި، ރައީސް މުޢިއްޒު އޭރު އެންމެ ބޮޑަށް ދެއްކެވި އެއް ވާހަކަ އަކީ ރާއްޖެ އިން އިންޑިއާ އާއެކު ސޮއި ކޮށްފައިވާ އެއްބަސްވުންތަކުގެ ވާހަކަ އެވެ.

"އިންޑިއާ އައުޓް" ކެމްޕެއިންގައި ވެސް އިސްކޮށް އުޅުއްވި ރައީސް މުޢިއްޒު އޭރު ވިދާޅުވެފައި ވަނީ، ސަރުކާރަށް ވަޑައިގެން އެ އެއްބަސްވުންތައް ހާމަ ކުރައްވާނެ ކަމަށާއި، ދިވެހި ރައްޔިތުންނަށް ސިއްރު ކުރާނެ އެއްވެސް ކަމެއް ނުބާއްވަވާނެ ކަމަށެވެ.

އެހެން ނަމަވެސް، ހޮނިހިރު ދުވަހު ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، އެ އެއްބަސްވުންތަކުގައި "ކޮންފިޑެންޝިއަލިޓީ ކްލޯޒް"ތައް ހިމެނޭ ކަމަށެެވެ.

ރައީސް މުޢިއްޒު ވިދާޅުވީ މިއަދާ ހަމައަށް އައިއިރު، އެއްބަސްވުންތަކުގައި ސޮއި ކޮށްފައިވާ ޤައުމުތަކުގެ ރުހުމާ ނުލައި އެއްބަސްވުން ހާމަ ކުރުމުގެ ފުރުސަތު ނެތް ކަމަށެވެ. އަދި އެކަމުގައި ޤާނޫނީ މައްސަލަތަކެއް ކުރިމަތިވާ ކަމަށް ވެސް ވިދާޅުވި އެވެ.

މީގެ އިތުރުން ރައީސް މުޢިއްޒު ވިދާޅުވީ އެކަމާ ގުޅުން ހުރި ބައިލެޓްރަލް މަޝްވަރާތައް ކުރިއަށް ގެންދަމުން އަންނަ ކަމަށެވެ.