ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުންގައި ރ. އަލިފުށީ އެއަރޕޯޓު ތަރައްގީ ކުރުމުގެ އެއްވެސް މަސައްކަތެއް ކުރިއަށް ނުދާ ކަމަށާއި، އެ މަޝްރޫއު ކުރިއަށް ގެންދިއުމުގައި މިސަރުކާރުގެ އެއްވެސް އިހުލާސްތެރިކަމެއް ނެތް ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

ހޯމަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ބިގޭ ވިދާޅުވީ އަލިފުށީގައި އެއަރޕޯޓެއް ތަރައްގީ ކުރެވިގެން ދިއުމަކީ މިރަށުގެ ރައްޔިތުންގެ ޒަމާންވީ އުންމީދެއް ކަަމަށާއި، ވަރަށް ބޮޑު ހުވަފެނެއް ކަމަށެވެ.

އަލިފުއްޓަކީ ވަކިން އޮންނަ ރަށެއްގެކަން ފާހަގަކުރައްވައި ބިގޭ ވިދާޅުވީ ރަށުގެ ތަރައްގީއަށް މުހިންމު މަޝްރޫއެއް ކަމަށް ދެކި، އެމަޝްރޫއުގެ އަމަލީ މަސައްކަތް ކުރީގެ ރައީސް އިބްރާހިމް މުހައްމަދު ސާލިހު ސަރުކާރުގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށް، އެމަޝްރޫއުގެ އަމަލީ މަސައްކަތް ފެށިގެން ދިޔަ ކަމަށެވެ.

ބިގޭ ވިދާޅުވީ އެއަރޕޯޓަށް ބޭނުންވާ ބިން ހިއްކުމުގެ މަސައްކަތް ފަށައި، 90 އިންސައްތަ ނިމިފައިވާ ކަމަށާއި، ފަޔަރ އިމާރާތާއި، ޓާމިނަލްގެ ސްޓަރަކްޗަރ މަސައްކަތް ނިމިފައިވާ ކަމަށެވެ. މިހިސާބަށް މަސައްކަތް ދިޔަ ފަހުން ސަރުކާރު ބަދަލުވި ކަމަށާއި، އޭގެފަހުން މިއަދާ ހިސާބަށް މަސައްކަތުގެ އެއްވެސް އަމަލީ މަސައްކަތެއް ފެށިފައިނުވާ ކަމަށް އޭނާ ވިދާޅުވިއެވެ. އަދި ވިދާޅުވީ މިހާރު އިމާރާތުގައި ހުރި ދަގަނޑުތައް ވެސް ދަބަރަށް ވަމުންދާ ކަމަށެވެ. މިއީ ރައްޔިތުންގެ ޓެކްސް ފައިސާ އިސްރާފު ކުރުން ކަމަށް އޭނާ ވިދާޅުވިއެވެ.

ބިގޭ ވިދާޅުވީ ސިޔާސީ ބޭނުމަށް ކޮންމެ އިންތިޚާބެއްގައި ވެސް އެއަރޕޯޓުގެ މަޝްރޫއު ވަރަށް ފުރިހަމައަށް ކުރިއަށް ގެންދާނެ ކަމަށް ރައީސް މުއިއްޒު ވައުދުވެވަޑައިގެންނެވި ކަމަށެވެ. އެގޮތުން ރިޔާސީ އިންތިޚާބުގެ ކެންޕޭން ތެރޭގައި ވެސް އަދި ރައްޔިތުން މަޖިލިސް އިންތިޚާބުގެ ތެރޭގައި ވެސް އެމަނިކުފާނު ވައުދުފުޅު ކުރެއްވި ކަމަށް ބިގޭ ވިދާޅުވިއެވެ.

ކުރީ ސަރުކާރުގައި ސަމާލުކަން ދިން މިންވަރަށް ވުރެ ބޮޑަށް މިސަރުކާރުން އެއަރޕޯޓުގެ މަޝްރޫއުއަށް ސަމާލުކަން ދެއްވާނެ ކަމަށް ރައީސް މުއިއްޒު ވިދާޅުވި ނަމަވެސް އެމަނިކުފާނުގެ ވެރިކަމުގައި އެއަރޕޯޓުގެ މަޝްރޫއު ކުރިއަށް ގެންދިއުމަށް ގެނެސްފައިވާ އާލާތްތައް އަނބުރާ ރަށުން ބޭލުވީ ކަމަށް އޭނާ ވިދާޅުވިއެވެ.

ބިގޭ ވިދާޅުވީ މިރަށުގެ ރައްޔިތުންނަކީ ތަރައްގީއަށް ގުރުބާންވާ ބައެއް ކަމަށާއި، ނަމަވެސް މި ސަރުކާރުން ރައްޔިތުންގެ ލޮލުގައި އަނދުން އަޅުވާފައިވާ ކަމަށެވެ. އަދި އެއަރޕޯޓު މަޝްރޫއު ކުރިއަށް ގެންދިއުމުގައި މިސަރުކާރުގެ އެއްވެސް އިހުލާސްތެރިކަމެއް ނެތް ކަމަށް އޭނާ ވިދާޅުވިއެވެ.

އަލިފުށީ އެއަރޕޯޓުގެ މަސައްކަތަކީ އެމްޓީސީސީގެ ތާރީޚުގައި ވެސް ހަވާލުކުރެވުނު އެންމެ ބޮޑު އުމްރާނީ ތަރައްގީގެ މަޝްރޫއެވެ. މި މަޝްރޫއު އެމްޓީިސީސީއާ ހަވާލުކޮށް، އެއްބަސްވުމުގައި ސޮއިކުރައްވާފައިވަނީ 1 ސެޕްޓެންބަރު 2021 ގައެވެ.

ޑިޒައިން އެންޑް ބިލްޑް އުސޫލުން ހަވާލުކުރެވުނު މި މަޝްރޫއުގެ ދަށުން، އަލިފުށީގެ 50.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި ބިމުގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީއާއި ގެދޮރުވެރިކަމުގެ ބޭނުމަށް ޚާއްސަކުރެވިގެން ހިއްކޭ ބިމެކެވެ. އަދި ބާކީ 40.5 ހެކްޓަރު ބިމަކީ އެއަރޕޯޓް ތަރައްގީކުރުމަށް ހިއްކޭ ބިމެވެ.

އެއަރޕޯޓް މަޝްރޫއުގެ ދަށުން، 1200 މީޓަރުގެ ރަންވޭއެއް އެޅުމާއި، ޓެކްސީވޭ، އޭޕްރަން އަދި ސަރވިސް ރޯޑު ހެދުމުގެ މަސައްކަތްވެސް ވަނީ އެމްޓީސީސީއާއި ހަވާލުކޮށްފައެވެ. އަދި ހިއްކާ ބިމުގެ ގޮނޑުދޮށް ހިމާޔަތްކުރުމުގެ ގޮތުން 2871 މީޓަރުގެ ރިވެޓްމަންޓަކާއި، 480 މީޓަރުގެ ގްރޮއިންއެއް ވެސް ގާއިމުކުރާނެއެވެ.

އަލިފުށީ ބިން ހިއްކުމާއި އެއާޕޯޓް ތަރައްގީ ކުރުމުގެ މަޝްރޫއު އެމްޓީސީސީއާ ހަވާލުކޮށްފައިވަނީ 451.6 މިލިއަން ރުފިޔާއަށެވެ.