ކ. މާލެ
|
2 އޭޕްރިލް 2025 | ބުދަ 15:29
އައިޖީއެމްއެޗް
އައިޖީއެމްއެޗް
ރާއްޖެއެމްވީ
ސިއްހީ ޚިދުމަތް ފުޅާކުރުން
އައިޖީއެމްއެޗްއަށް 75 އެނދުގެ އިތުރު ކުރުމުގެ މަޝްރޫއު ނިންމައި، އަންނަ މަހު ޚިދުމަތް ދޭން ފަށަނީ
ސަރުކާރުގެ މަރުކަޒުތަކުގެ ޚިދުމަތްތައް ފުޅާ ކުރުމަށް އިސްކަންދެން
ޖެނެރަލް ވޯޑުގެ ގޮތުގައި 44 އެނދު، އެޗް.ޑީ.ޔޫ އެނދުގެ ގޮތުގައި 15 އެނދު އިތުރު ކުރެވޭ
ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްގީ ކުރާނެ

އިންދިރާ ގާނދީ މެމޯރިއަލް ހޮސްޕިޓަލް (އައި.ޖީ.އެމް.އެޗް)ގެ ޖާގައިގެ ދަތިކަމަށް ހައްލު ހޯދުމުގެ ގޮތުން ކުރިއަށް ގެންދިޔަ 75 އެނދުގެ މަޝްރޫއު ނިންމައި، އަންނަ މަހު ޚިދުމަތް ދޭން ފެށޭނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.

ބުދަ ދުވަހު ކުރިއަށް ގެންދިޔަ ''ރައްޔިތުންނާއެކު ރައީސުލްޖުމްހޫރިއްޔާ ޕޮޑްކާސްޓް'' ގައި ރައީސް މުއިއްޒު ވިދާޅުވީ ސަރުކާރުގެ މަރުކަޒުތަކުގެ ޚިދުމަތްތައް ފުޅާ ކުރުމަށް އިސްކަންދޭ ކަމަށާއި، ރާއްޖޭގެ އާބާދީގެ ދެބައިކުޅަ އެއްބައެއްހާ މީހުން ދިރިއުޅެމުންދަނީ މާލެ ސަރަހައްދުގައި ކަމަށްވާއިރު، މާލެ ސަރަހައްދަށް ވަރަށް ބޮޑު އިސްކަމެއް ދޭ ކަމަށެވެ. އެއީ ވަކި ރަށެއް ތަފާތު ކުރުން ނޫން ކަމަށާއި، ރާއްޖޭގައި މީހުން ދިރިއުޅޭ ހުރިހާ ރަށެއްގައި ވެސް ސިއްހީ ޚިދުމަތް ފޯރުކޮށްދޭ މަރުކަޒުތަކާއި ހަސްފަތާލުތައް ގާއިމު ކުރެވި، ތަރައްގީ ކުރެވޭނެ ކަމަށް އެމަނިކުފާނު ވިދާޅުވި އެވެ.

އައިޖީއެމްއެޗަށް އިޝާރާތް ކުރައްވައި ރައީސް މުއިއްޒު ވިދާޅުވީ އައިޖީއެމްއެޗަށް ދިމާވެފައިވާ ޖާގައިގެ ދަތިކަމަށް ހައްލު ހޯދުމުގެ ގޮތުން 75 އެނދުގެ މަޝްރޫއެއް ނިންމަވައި، މެއި މަހު ޚިދުމަތް ދޭން ފެށޭނެ ކަމަށެވެ. އަދި މި މަޝްރޫއުގައި ޖެނެރަލް ވޯޑުގެ ގޮތުގައި އިތުރު ކުރެވޭ 44 އެނދާއި، ހައި ޑިޕެންޑަންސީ ޔުނިޓް (އެޗް.ޑީ.ޔޫ) އެނދުގެ ގޮތުގައި އިތުރު ކުރެވޭ 15 އެނދާއި، 14 ޕްރައިވެޓް ޔުނިޓް ހިމެނޭ ކަމަށް އެމަނިކުފާނު ވިދާޅުވި އެވެ.

އޭރުން ވަރަށް ބޮޑުތަނުން ޖާގަ ބޮޑުވެގެން އެބަދޭ. އެތަން ހުޅުވިގެންދިޔާމަ މިހާރު އައިޖީއެމްއެޗަށް ދިމާވެފައިވާ ޖާގައިގެ ދަތިކަން ވަރަށް ބޮޑުތަނުން ހައްލު ވެގެން އެބަދޭ. އެ ޕްރޮޖެކްޓް އަޅުގަނޑުގެ ރިޔާސީ ބަޔާނުގައި ވެސް ދެންނެވިން. އެތަން ހުޅުވިގެންދާނެ ވާހަކަ. މެއި މަހުގެ ތެރޭގައި އިރާދަކުރެއްވިއްޔާ އެތަން ހުޅުވޭނެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު

ޓާޝަރީ ފެންވަރުގެ ޚޮސްޕިޓަލްތަކާ ގުޅޭގޮތުން ރައީސް މުއިއްޒު ވިދާޅުވީ ހުޅުމާލޭ ހޮސްޕިޓަލުން ފޯރުކޮށްދޭ ޚިދުމަތްތައް ތަރައްގީ ކުރުމުގެ މަސައްކަތްތައް ކުރިއަށްދާ ކަމަށާއި، ޗައިނާއިން ފޯރުކޮށްދޭ ހިލޭ އެހީގެ ތެރެއިން، ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްގީ ކުރުމަށް ހަމަޖެހިފައިވާ ކަމަށެވެ.

މީގެ އިތުރުން، ރައީސް މުއިއްޒު ވިދާޅުވީ މާލެ ސަރަހައްދުގައި ވަކިވަކި ކަންކަމަށް ޚާއްސަ ހަސްފަތާލުތައް ތަރައްގީ ކުރުމަށް މަސައްކަތް ކުރަމުންދާ ކަމަށެވެ.

އެގޮތުން ކެންސަރ ހޮސްޕިޓަލުގެ މަސައްކަތާއި، ތެލަސީމިއާއަށް ޚާއްސަކޮށްގެން ހުޅުމާލޭގައި ތަރައްގީ ކުރާ ހަސްފަތާލާއި، އަންހެނުންނާއި ކުޑަކުދިންނަށް ޚާއްސަ ހަސްފަތާލެއްގެ މަސައްކަތްތައް މި ދައުރުގެ ތެރޭގައި ކޮށްދެއްވާނެ ކަމުގެ ޔަގީންކަން އެމަނިކުފާނު ދެއްވި އެވެ.

މީގެ އިތުރުން ރައީސް މުއިއްޒު ވިދާޅުވީ ސަރުކާރުން ތަންފީޒު ކުރުމަށް މަސައްކަތް ކުރަމުންދަނީ ވަށައިޖެހޭ ސިއްހީ ޚިދުމަތުގެ ސިޔާސަތެއް ކަމަށެވެ.

ނަމަވެސް، އަދުގެ ހާލަތު އޮތް ގޮތުން ރާއްޖެއިން ބޭރަށް ގޮސް ސިއްހީ ޚިދުމަތް ހޯދަންޖެހޭ ހަލަތްތައް މެދުވެރިވާ ކަމަށާއި، ބަލިޖެހޭ ހިސާބުން ރާއްޖޭގައި ތިބެގެން ފަރުވާ ކުރެވޭނެ އިންތިޒާމުތައް ހަމަޖެހިފައި އޮންނަންޖެހޭ ކަމުގައި ރައީސް މުއިއްޒު ވިދާޅުވި އެވެ.

- ކޮމެންޓް